Umadanika iti Dios
Ti Kadakkelan a Pammaneknek iti Ayat ti Dios
NI Abraham ay-ayatenna ti Dios. Dayta a matalek a patriarka ay-ayatenna met ni Isaac, a pinutotna idi lakayen. Ngem idi nalabit agtawen ni Isaac iti 25, naipasango ni Abraham iti pannubok a mangkalikagum kenkuana nga agaramid iti maikaniwas iti gagangay a rikna ti maysa nga ama—imbaga ti Dios kenkuana nga idatonna ti anakna. Ngem sigun iti salaysay, saan a natay ni Isaac. Idi duyoken koman ni Abraham ti anakna, inatipa ti Dios babaen iti maysa nga anghel. Dayta a salaysay ti Biblia a nailanad iti Genesis 22:1-18 ket mangted kadatayo iti naimpadtuan a panirpatan iti naindaklan nga ayat ti Dios kadatayo.
Ti “Dios sinubokna ni Abraham,” kuna ti bersikulo 1. Ni Abraham ket maysa a tao nga addaan pammati, ngem ita pay la a kasta kakaro ti pannakasubokna. Kinuna ti Dios: “Pangngaasim, alaem ti anakmo, ti kakaisuna nga anakmo nga ay-ayatem unay, ni Isaac, ket . . . idatonmo kas daton a mapuoran iti maysa kadagiti bantay nga itudingko kenka.” (Bersikulo 2) Laglagipem a saan nga ipalubos ti Dios a dagiti adipenna ket masubok iti nalablabes ngem iti maibturanda. Dayta ngarud a pannubok ti nangipakita nga adda panagtalek ti Dios ken Abraham.—1 Corinto 10:13.
Dagus a nagtulnog ni Abraham. Mabasatayo: “Bimmangon a nasapa ni Abraham iti bigat ket siniliaanna ti asnona ket inkuyogna ti dua kadagiti katulonganna ken ni Isaac nga anakna; ket pinisina ti kayo a maipaay iti daton a mapuoran. Kalpasanna timmakder ket nagdaliasat.” (Bersikulo 3) Nabatad nga awan a pulos ti nangibagaan ni Abraham kadagiti detalye ti pannubok.
Tallo nga aldaw a nagdaliasatda isu a naaddaan iti gundaway nga agutob. Ngem saan a kimmapuy ti determinasion ni Abraham. Dagiti sinaona ipalgakda ti pammatina. Apaman a nasirpatanna ti napili a bantay, kinunana kadagiti adipenna: “Agyankayo ditoy . . . , ngem siak ken ti ubing kayatmi ti mapan sadiay ket agdayawkami ket agsublikami kadakayo.” Idi dinamag ni Isaac no ayan ti karnero nga idatonda, kinuna ni Abraham: “Ti Dios ipaayannanto ti bagina iti karnero.” (Bersikulo 5, 8) Ninamnama ni Abraham nga agsubli a kaduana ti anakna. Apay? Agsipud ta “pinanunotna nga isu [ni Isaac] kabaelan ti Dios nga ibangon uray pay manipud kadagiti natay.”—Hebreo 11:19.
Idiay bantay, idi a ni Abraham innalana ti “imuko tapno papatayenna ti anakna,” adda anghel a nangatipa iti imana. Nangipaay ngarud ti Dios iti kalakian a karnero a naipanget dagiti sarana iti kasamekan tapno idaton ni Abraham “a sandi ti anakna.” (Bersikulo 10-13) Iti imatang ti Dios, kasla ni Isaac a mismon ti naidaton. (Hebreo 11:17) Inlawlawag ti maysa nga eskolar ti Biblia: “Iti imatang ti Dios, kaslanan indaton ti anakna gapu iti kinatulokna a mangaramid iti dayta.”
Napasingkedan nga adda nakaibasaran ti panagtalek ni Jehova ken Abraham. Nagunggonaan met ti panagtalek ni Abraham ken Jehova ta inulit ken pinalawa ti Dios ti saklawen ti tulagna kenkuana, a dayta a tulag ket addaan kari a pakabendisionan dagiti tattao iti amin a nasion.—Bersikulo 15-18.
Saan nga impalubos ti Dios nga idaton ni Abraham ti anakna a ni Isaac, ngem idi agangay, indaton ni Jehova ti mismo nga Anakna. Ti kinamasindadaan ni Abraham a mangidaton ken Isaac iladawanna ti panangidaton ti Dios iti bugbugtong nga Anakna a ni Jesus agpaay iti basbasoltayo. (Juan 3:16) Ti pannakaidaton ni Kristo ti kadakkelan a pammaneknek iti ayat ni Jehova kadatayo. Yantangay nangaramid ti Dios iti kasta a sakripisio agpaay kadatayo, nasayaat no iyimtuodtayo iti bagbagitayo, ‘Ania dagiti sidadaan nga isakripisiok tapno maparagsakko ti Dios?’