PLATANO, KAYO A

[Heb., ʽer·mohnʹ].

Kayo a nadaeg ti langana, dumakkel iti katayag nga agarup 20 m (70 pie), agsalumpayak ti sangsangana ket akaba a ngumisit a berde, arig lanut ti bulbulongna a makaipaay iti nangayed a linong. Ti aglikmut a rukod ti bungedna ket masansan a 3 agingga iti 4 m (10 agingga iti 13 pie). Ti kayo a platano (Platanus orientalis) tinawen a ti makinruar nga ukisna agliksab iti linaplapnit wenno binembenneg, a mangiparang iti nalamuyot a pumuraw a makin-uneg nga ukis.

Ti nagan daytoy a kayo iti Hebreo mabalin nga agtaud iti berbo nga ʽa·rahʹ, kaipapananna ti “iduyayyat; ipanayag.” (Sof 2:14; Isa 22:6) Iti Genesis 30:37, 38, ni Jacob nailadawan a mangikabkabil iti rawrawis daytoy a kayo, agraman ti rawrawis ti dadduma pay a kayo, iti sanguanan dagiti arban ni Laban idiay Haran iti Siria. Naukisan dagiti rawis, nga ‘induyayyatna,’ wenno inlatakna, ti “puraw a paspaset.”

Ti kayo ket maikari a maipadis, ngem saan nga aktual a maipadpad, iti nadaeg a sedro ti Libano, nga inusar ni Ezequiel kas ladawan ni Faraon ken ti intero a bunggoyna.​—Eze 31:8.

Masarakan dagiti kayo a platano iti igid ti karkarayan ken wawaig iti intero a Siria ken iti rehion ti kadaanan nga Asiria, kasta met a narasrasay iti Palestina ken Libano.