BINGGAS

Pennet ti bagi. Naikuna a nasangal a napagkaykaysa ti tao babaen iti tultulang ken bingbinggas.​—Job 10:11; kitaenyo met ti Job 40:15-18.

Bayat ti pannakigabbo ni Jacob iti maysa nga anghel, sinagid ti anghel ti lungog ti nagsuopan ti luppo ni Jacob, iti kasta nasulnot. Kunaen ti salaysay nga insurat ni Moises idi agangay: “Dayta ti makagapu a ti annak ti Israel saanda a nayugali a kanen ti binggas ti nerbio ti luppo, nga adda iti lungog ti nagsuopan ti luppo, agingga itoy nga aldaw [ni Moises], agsipud ta sinagidna ti lungog ti nagsuopan ti luppo ni Jacob iti binggas ti nerbio ti luppo.” (Ge 32:32) Daytoy pay laeng ti nakairuaman ti adu a Judio, nga ikkatenda ti kadakkelan nga urat iti luppo agraman dagiti urat ken pennet sakbay a kanenda ti animal. Ibilbilang ti sumagmamano a Judio a komentarista daytoy nga alagaden kas pammalagip iti panangiwanwan ti Dios iti Israel kas nailadawan iti kapadasan ni patriarka Jacob, ama ti 12 a tribu.

Piguratibo nga Usar. Iti piguratibo a kaipapanan, naikuna a ti lengnges dagiti Israelita ket “landok a binggas,” kayatna a sawen a nainget, nasubeg, natangken ti panaglenglengngesda. (Isa 48:4; idiligyo ti Ex 32:9.) Ti naespirituan a panangbiag manen ti Dios iti ilina ket nailadawan iti panangsangal iti tultulang ken ti panangikabil iti lasag ken bingbinggas kadakuada.​—Eze 37:6-8.