Nadalus a Panagibarbas

BABAEN TI KORESPONSAL TI AGRIINGKAYO! IDIAY AUSTRALIA

NO AGIBARBAS ti maysa a lalaki iti lima a minuto kada aldaw iti uneg ti 50 a tawen, agarup 63 nga aldaw iti biagna ti mabusbosna nga agibarbas! Kasano ti panagrikna dagiti lallaki iti daytoy inaldaw a rutina?

Impalgak ti maysa a nabiit pay nga impormal a surbey dagitoy a kapanunotan maipapan iti panagibarbas: “Diak magustuan.” “Makapasuron.” “Risgo ti biag.” “No mabalin la koma a liklikan.” No kasuron ti dadduma a lallaki ti agibarbas, apay ngarud nga ar-aramidenda? Ammuentayo ti dadduma pay maipapan iti panagibarbas. Nalabit a masarakantayo ti sungbat.

Manipud Kadagiti Kappo Agingga Kadagiti Disposable Razor

Mailadawanyo kadi ti agibarbas babaen ti kappo? Ngipen ti pating? Nalabit natadem a pamulinawen? Naglaing dagiti tattao a nangpili iti ramramit a pagibarbas! Iti nagkauna nga Egipto, nagibarbas dagiti lallaki babaen ti gambang a razor nga umarngi iti ulo ti bassit a wasay. Iti di pay nabayag, iti maika-18 ken maika-19 a siglo, dagiti naawagan a cutthroat ket damdamo a napartuat idiay Sheffield, Inglatera. Masansan a nalabor dagitoy a razor. Addaan iti tadem a naaramid iti asero a nagkurba ken maipilko iti putanna tapno natalged no saan a maus-usar. Masapul a naannad ti panangusar kadagitoy nga instrumento, ken sigurado ti pannakasugat sakbay a masursuro ti umiso a panangaramat kadagita. Makadidigra no damdamo kadagiti saan a naannad. Ngem adda rimmang-ayanna bayat ti maika-20 a siglo.

Idi 1901, maysa a lalaki idiay Estados Unidos nga agnagan King Camp Gillette ti nangpartuat iti natalged a razor a mabalin a masukatan ti tademna. Nagustuan dagiti tattao ti ideyana a nagbanag iti itataud ti nadumaduma a disenio, agraman ti razor a nakalupkopan iti pirak wenno balitok ti pagiggamanna. Dagiti nabiit pay a napartuat iramanda dagiti razor nga ibebelleng no malpas a mausar, razor a dua wenno tallo pay ketdi ti tademna, ken razor nga addaan kadagiti nalap-it ken mapusipos nga ulo.

Siempre, saan a malipatan ti de-koriente a razor, a damo a nailako idi 1931. Nagtultuloy a napasayaat ti kinaepisienteda ken ad-adda a limmatakda, ngem ti natadem a razor ti kaykayat latta ti adu nga agtarigagay iti nadaldalus a panagibarbas.

Agbaliwbaliw a Pakasaritaan

Nangrugi idi punganay, agbaliwbaliw ti panangmatmat dagiti tattao iti barbas. Sigun iti libro nga Everyday Life in Ancient Egypt, dagiti nagkauna nga Egipcio ket “saan nga agpatpatubo iti buok ken ipagpannakkelda ti nakiskisan a barbasda babaen ti panangusarda kadagiti nasayaat ti pannakaaramidna a razor a maidulin kadagiti nadalus a lalat a pagikabilan.” Daytoy a kustombre ti mabalin a mangilawlawag no apay a nagkiskis ti Hebreo a balud a ni Jose sakbay a simmaklang ken Faraon.​—Genesis 41:14.

Dagiti Asirio ket puli dagiti lallaki a naidumduma ti barbasda. Uray la pagtangsitda ti sobra ti pannakaaywan ken pannakaasikasona a barbasda, a kasta unay ti panangkulot, panangsallapid, ken panangurnosda kadagitoy.

Barbasan dagiti Israelita a lallaki idi ugma ngem kalkalainganna laeng ti kaatiddogna, ket putdanda a kanayon babaen ti razor. Ania ngarud ti kayat a sawen ti Linteg ti Dios idi imbilinna kadagiti Israelita a lallaki a saanda a ‘putdan ti buok iti sikigan ti uloda iti aglikmut’ wenno “dadaelen ti pingir” ti barbasda? Saan nga iparit daytoy a bilin ti panangputed iti buok wenno barbas. Imbes ketdi, idagadagna kadagiti lallaki nga Israelita a dida tultuladen dagiti aglablabes a narelihiosuan nga aramid dagiti kabangibangda a pagano a nasion.a​—Levitico 19:27, NW; Jeremias 9:25, 26; 25:23; 49:32.

Iti nagkauna a Griego a kagimongan, gagangay a barbasan dagiti amin a lallaki malaksid dagiti natan-ok a tattao, a masansan a nakiskisan ti barbasda. Idiay Roma, ti nayugali a panagibarbas ket agparang a nangrugi idi maikadua a siglo K.K.P., ket iti simmaruno a sumagmamano a siglo, nagtultuloy a kaugalian ti inaldaw a panagibarbas.

Nupay kasta, idi narbek ti Imperio ti Roma, naguso manen iti uneg ti 1,000 a tawen ti panagbalin a barbasan agingga idi ngalay ti maika-17 a siglo, idi nagbalin nga uso ti panagibarbas. Nagtultuloy nga uso ti nakiskisan a barbas agingga idi maika-18 a siglo. Ngem idi ngalay agingga iti arinunos ti maika-19 a siglo, uso manen ti barbasan. Isu a kadagiti retrato ni C. T. Russell, ti immuna a presidente ti Watch Tower Society, ken ti padana a Kristiano a ni W. E. Van Amburgh, makita a barbasanda nupay naestilo ken kalkalainganna ti kaatiddagna. Nadayaw ken maitutop ti kasta a barbas idi panawenda. Nupay kasta, idi rugrugi ti maika-20 a siglo, limmatak manen ti panagibarbas kadagiti kaaduan a pagilian agingga iti kaaldawantayo.

Maysakayo kadi kadagiti minilion a lallaki a mangar-aramat iti natadem a banag para iti dayta binigat a rutina iti sanguanan ti sarming? No wen, sigurado a kayatyo a saan koma a nasakit, a dikay masugsugat, ken epektibo koma no mabalbalin. Tapno maaramid dayta, mabalin a kayatyo nga usigen dagiti singasing iti kahon a “Dagiti Singasing no Agibarbas Babaen ti Natadem a Banag.” Nalabit nga ar-aramidenyon ti dadduma kadagitoy a singasing. Aniaman ti kasasaad​—tagiragsakenyo ti nadalus a panagibarbas!

[Footnote]

[Kahon/Dagiti ladawan iti panid 23]

Dagiti Singasing no Agibarbas Babaen ti Natadem a Banag

Dagiti sumaganad ket singasing ti libro a Men’s Hair para iti epektibo a panagibarbas babaen ti natadem a banag.b

1. Panangpalamuyot kadagiti whisker: Ti laeng pamay-an a lumamuyot a naimbag dagiti buok iti rupa isu ti panangbasa iti dayta iti napudot a danum. No mabalbalin, agibarbas kalpasan a nagdigus ta mangipaay daytoy iti ad-adu a tiempo a mapalamuyot ti danum dagiti whisker.

2. Panangusar kadagiti produkto a maaramat sakbay ti panagibarbas: Tallo a banag ti maaramidan dagiti amin a nadumaduma a klase ti sabon, lather, cream, ken gel. (1) Taginayonenda ti agneb kadagiti buok iti rupa, (2) pagtalinaedenda a nakatakder dagitoy, ken (3) pagbalinenda a nagalis ti kudil tapno naan-annayas ti pannakausar ti razor. Pilienyo ti produkto a kasayaatan kadakayo. Ay wen, napadasyo kadin ti hair conditioner? Nairanta met dayta a mangpalamuyot iti buok.

3. Umiso a panangaramat iti maitutop a razor: Ti maitutop a razor ket diay natadem. Dadaelen ti nangudel a razor ti kudilyo. Kiskisanyo sigun iti direksion ti barbas. Mabalin a nadaldalus no pakontra ti panagkiskisyo, ngem mabalin a maputedna dagiti barbas a naun-uneg ngem iti kudil ket agtubonto dagita kadagiti aglikmut a tisyu imbes a rummuar kadagiti abut ti kudil. Sigun iti dadduma a gubuayan, ti nakairuaman a di naannad a panagibarbas​—agpadpada dagiti lallaki ken babbai​—ket mabalin a pakaigapuan ti panangimpeksion ti virus nga agbanag iti tukaktukak.

4. Proteksion iti kudil kalpasan ti panagibarbas: Kada agibarbaskayo, adda maikkatyo a babassit a suson ti kudil, a mamagpeggad iti kudilyo. Masapul ngarud a maikkat amin nga ared-ed iti rupayo babaen ti nadalus a danum​—apag-anem-em nga umuna, sa nalamiis tapno agserra dagiti abut ti kudilyo ket agtalinaed ti agneb. No kayatyo, mabalinyo ti agusar iti moisturizing lotion a maar-aramat kalpasan ti panagibarbas tapno masalakniban ken mabang-aran ti kudilyo.

[Footnote]

[Kahon/Ladawan iti panid 24]

Ania Dagiti Whisker?

Dagiti whisker ket buok nga agtubo iti rupa. Keratin ken dagiti mainaig a protina ti mangbukel kadagitoy. Ti keratin ket napnuan iti binggas ken naglaon iti sulfur a protina a patauden ti bagi ti tao ken animal. Daytoy a protina ti kangrunaan a kasapulan iti pannakabukel dagiti buok, kuko, dutdot, hoof, ken sara. Iti amin a buok iti bagi ti tao, ti whisker ti maysa kadagiti kakidseran ken kasikkilan, a narigat a putden kas iti gambang a barut a kapadana iti kapuskol. Agarup 25,000 ti kaaduda iti rupa ti gagangay a lallaki, ket agtuboda iti kapartak a kagudua ti maysa a milimetro kada 24 nga oras.

[Credit Line]

Men: A Pictorial Archive from Nineteenth-Century Sources/Dover Publications, Inc.

[Dagiti ladawan iti panid 24]

Agbaliwbaliw ti pakasaritaan ti panagibarbas

Egipcio

Asirio

Romano

[Dagiti Credit Line]

Museo Egizio di Torino

Photographs taken by courtesy of the British Museum