AVRÉKH

Termino a mangipamatmat iti dayaw ken dignidad; naipukkaw dayta iti sanguanan ti karuahe ni Josue kalpasan ti panamagbalin kenkuana ni Faraon kas maikadua iti pagarian. (Ge 41:43) No namunganay iti Hebreo, kas pagarupen ti nagkauna a managipatarus a ni Aquila ken kas patalgedan ti Latin a Vulgate, mabalin a kaipapananna ti “agparintumeng,” ken naipatarus a kasta iti adu a bersion. (AS, KJ, Da, Dy, ER, Ro, RS) Nupay kasta, saan nga anamongan ti adu daytoy a panangmatmat agsipud ta pilienda ti umasping a sasao a masarakan iti dadduma a pagsasao. Kas pagarigan, pagarupen ti sumagmamano a mabalin a titulo dayta ti nangato nga opisial ti Babilonia wenno Asiria, a kaipapananna ti “pumaparmata” wenno “naindaklan a managsirmata.” Ipapan ti dadduma a Coptic daytoy a termino ket kunaenda a kaipapananna ti “iruknoy ti ulo”; napaliiw ti dadduma a no dagiti Arabo bilinenda dagiti kamelioda nga agparintumeng, mangisawangda iti umasping a termino. Kastoy ti mabasa iti Syriac a Peshitta: “Ama ken Agturay!” Patien ti dadduma nga agsuksukimat a dayta ket termino dagiti Egipcio. Da Origen (katutubo iti Egipto) ken Jerome pagarupenda a kaipapananna ti “maysa a katutubo nga Egipcio,” ket gapu ta nababa ti panangmatmat dagiti Egipcio kadagiti ganggannaet, ikeddengda a dayta ket publiko a waragawag ti pannakapagbalin ni Jose kas umili ti Egipto. Ti maysa nga umasping nga ebkas, a nailanad iti maysa a natakuatan a papiro, kaipapananna ‘ti bilinmo isu ti tarigagayanmi,’ kayatna a sawen, ‘madadaankami nga agserbi kenka.’​—The Life and Times of Joseph in the Light of Egyptian Lore, ni H. Tomkins, London, 1891, p. 49, 50.

Saan pay ngarud a nasinunuo ti eksakto a kaipapanan daytoy a sao, gapuna saan a naipatarus iti sumagmamano a bersion. (NW, JP, JB) Daytoy di Hebreo a kaugalian a panangisawang iti publiko a pammadayaw iti sanguanan ti maysa a madaydayaw a tao bayat a sisasakay a lumasat iti ili ket makita met iti Ester 6:11, idi a napadayawan ni Mardokeo iti publiko kas imbilin ti Persiano nga Ari Asuero.