Ipapanaw iti Egipto

NI Jehova binilinna ni Moises nga agparang iti sanguanan ni Faraon ket, iti panagsaona iti nagan ni Jehova, kunaenna: “Palubosam ti ilik.” (Ex 5:1) Nagkedked ni Faraon. Saanna a kayat ti mapukawan iti nasion dagiti adipen. Nangnangruna pay, ni Faraon saanna idi nga am-ammo, wenno bigbigen, ni Jehova kas pudno a Dios. (Ex 5:2) Nagdaydayaw ni Faraon iti didios ti Egipto ket imbilangna pay ti bagina a dios! Gapuna limtaw ti isyu: Siasino ti pudno a Dios? Babaen ti sangapulo a saplit impakat ni Jehova ti pannakaukom “iti amin a didios ti Egipto,” a nagbanag iti pannakaluk-at ti Israel ken pannakaipaay ti pammaneknek a ni Jehova ti sibibiag ken pudno a Dios.—Ex 12:12.

Kas maysa a bunggoy, ti Israel pimmanaw iti Rameses idiay Egipto idi Nisan 15, 1513 K.K.P. Bayat ti panagpadaya ti sangabunggoyan, awan duadua a kimmadua kadakuada ti sabsabali pay manipud Gosen. Kalpasan a nakadanonda iti Etham, binilin ida ni Jehova nga “agsublida ket agpakarsoda iti sanguanan ti Pihahirot . . . iti igid ti baybay.” Iti panangmatmat dagiti Egipcio, agparang a nayaw-awan dagiti umili. (Ex 13:20; 14:1-3) Kasla napupokda iti nagbaetan ti Nalabaga a Baybay ken ti bambantay. Yantangay adda iti likudanda dagiti karuahe a pakigubat dagiti Egipcio, agparang nga awan pagtarayandan! Kadagitoy a kasasaad nga inispal ni Jehova ti Israel ket dinadaelna ni Faraon ken ti buyotna. (Ex 14:13-31) Gapuna, imparangarang ni Jehova ti dakkel a pannakabalinna ket pinagbalinna a pagsasaritaan “iti intero a daga” ti inaramidna maipaay iti Israel.—Ex 9:16; Jos 2:10; 9:9.