Manipud Managbasatayo
Singapore Ti artikulo a “Singapore—Natulawan a Saniata ti Asia” (Hunio 8, 1997) imbutaktakna ti makapakellaat a panangtrato daytoy a moderno a gobierno kadagiti managayat-talna a Kristiano. Personal nga am-ammok ti adu a Kristiano a lallaki ken babbai sadiay, ket nagsasayaat, nadudungngoda a tattao. Daytat’ mangparparegta kaniak ta agserserbida ken ni Jehova iti laksid ti pannakaidadanes.
I. O., Malaysia
Pungtot Iti artikulo nga “Apay Kontrolem ti Pungtotmo?” (Hunio 8, 1997), kunayo a da Simeon ken Levi ket inlunod ni amada. Masiguradok nga adda nakabasaakon a ti pungtotda ti inlunod ni Jacob.
S. L., Estados Unidos
Umiso ti managbasami iti daytoy a punto. Inlawlawag ti “The Watchtower” a Hunio 15, 1962: “Idi a matmatayen, saan nga inlunod ni Jacob da Simeon ken Levi a mismo. Inlunodna ti pungtotda, ‘agsipud ta naulpit dayta.’ Inlunodna ti ungetda, ‘agsipud ta narungsot daytoy.’”—ED.
Taraon Ti artikulo a “Ti Taraonmo—Mapapataynaka Aya?” (Hunio 22, 1997) inispalna ti biagko. Kalpasan a nabasak dayta, imbagak ken ni baketko nga ayabanna a dagus ti doktor, tangay siuumiso a dineskribir ti artikulo ti kasasaadko. Kalpasan nga ineksamennak, inyeskediul ti doktor ti pannakaoperak kabigatanna. Impayospitalnak a dagus, tangay madanagan a diak malasatanen dayta a rabii. Addaak itan ditoy balay nga agpapaungar manipud iti operasion a triple bypass.
F. S., Estados Unidos
No dadduma, marigatankam ken ni lakayko a mangkontrol iti pannanganmi. Nabasakon dagiti dadduma nga artikulo maipapan iti taraon, ngem daytoy inlawlawagna dagiti bambanag iti simple ken praktikal a pamay-an. Masiguradok a no iyaplikarmi dagiti singasingyo, mataginayonminto ti bagimi a nasalun-at.
V. A., Brazil
Pagyamanan iti serye “Ti Taraonmo—No Apay a Rumbeng a Maseknanka.” Natulonganak a manganag kadagiti peggad ti kinalukmeg. Rinugiakon a suroten dagiti amin a singasing iti dayta, ket babaen ti tulong ni Jehova, ammok a makontrolkonto ti pannanganko.
V. Y. D., Liberia
Dagiti Tuwato Pagyamanan unay iti nagsayaat nga artikulo a “Dagiti Saniata iti Igid ti Karayan.” (Hunio 22, 1997) Maipapan dayta iti maysa kadagiti paboritok a managpabuya iti tangatang, ti tuwato. No agtartrabahoak iti hardinko, gistay kanayon nga adda tuwato nga agam-ampayag wenno agdisso iti asideg. Dinamagko iti maysa a lalaki a mangpappapintas iti aglawlaw no apay a kastoy. Imbagana a ti lamok ti maysa kadagiti taraon ti tuwato ket dagiti lamok pagay-ayatda ti tattao. Isu nga ibilangkon daytoy a namaris a parsua kas para-bantayko!
J. F., Estados Unidos
Panangsapul iti Kinahustisia Tinagiragsakko ti artikulo a “Ti Panagsapulmi iti Kinahustisia.” (Hunio 22, 1997) Sigurado a dagiti nalinteg a kalidad ti Dios ti mangguyugoy kadagidiay agsensennaay ken agas-asug gapu kadagiti panangilupitlupit. Nangnangruna a maseknanak iti kinaawan hustisia, ket kasapulan a pagreggetak a naimbag a balbaliwan dagiti panangmatmat ken tigtignayko tapno maitunos dagitoy kadagiti pagalagadan ti Dios.
D. L., Taiwan
Diak anamongan dagiti panglukat a sasao. No dakamatenyo dagiti taga Texas a mangidepdepensa iti Alamo, dikay ibagbaga a bandidoda a panggepdat’ manggamgam iti teritoria a kukua ti Mexico.
A. C., Mexico
Saanmi nga inlawlawag dagiti komplikado nga isyu a mainaig iti rinnanget iti Alamo, tangay agparang a saan a maitutop iti pakasaritaan ti biag ni Antonio Villa. Nupay kasta, ti Oktubre 22, 1971 a ruar ti “Agriingkayo!” kinunana: “Kaaduan nga Americano ti nakalipat, ken pulos a dida pay ketdi ammo, a ti San Antonio ket dati a paset ti Mexico. Ikukuenta ti Mexico daytoy a dangadang kas pananglapped iti rebelion iti teritoriana. Inusar dayta ti America . . . kas pangikalintegan iti pannakibiangna kadagiti aramid dagiti Mexicano.”—ED.