Manipud Managbasatayo
Apay a Kontrolem ti Pungtot? Pagyamanan iti artikulo nga “Apay a Kontrolem ti Pungtotmo?” (Hunio 8, 1997) Dimmakkelak iti dakkel a pamilia, ket kabayatan ti kinaubingko, nakitak ti adu a panagaapa iti pagtaenganmi. Nagdiborsio dagiti dadakkelko, ket sipud idin pasaray makapungtotak. Kanayon a nagkararagak ken ni Jehova a kidkiddawek a tulongannak iti daytoy a parikut. Anian a sorpresa ti pannakabasak iti daytoy nga artikulo a kasla naiturong kaniak! Pampanunotek a naimbag dagiti naisitar a kasuratan—kas pagarigan ti Efeso 4:26 kunana: “Ti init saannakay koma a malnekan a sipupungtot.” Inyaplikarmi daytoy nga agassawa. Gapu ken ni Jehova ken ti artikulo, naparmekkon ti parikutko.
A. R. S., Estados Unidos
Panangsaranget iti Pannakataranta Naimpusuan nga agyamanak ken ni Jehova iti artikulo a “Panangsaranget iti Pannakataranta.” (Hunio 8, 1996) Nabiit pay a naaddaan ni manangko iti nervous breakdown. Saanmi nga ammo no ania idi ti mapaspasamak kenkuana, tangay awan doktor a nakarekonoser iti kasasaadna. Idi agangay, nayospital ken narekonoser nga addaan iti nervous breakdown ken agsagsagaba iti pannakataranta. Dimteng ti artikulo iti umiso a tiempo, a nakariknaanmi a maseknan ni Jehova kadakami. Nagtugaw ni manangko nga agsangsangit bayat a binasana dayta, ta kinaagpaysuanna, ammonan a maawatan ni Jehova a siuumiso no aniat’ mapaspasaranna. Ti sasao ti kabsat a babai a nadakamat iti artikulo, a nagkuna a namin-adun a naimatanganna a ni Jehova ket napaypayso a gubuayan iti bileg ken liwliwa, ipakitada nga anian a nakaskasdaaw ti Diostayo a ni Jehova.
A. E. W., South Africa
“Kadagiti Lapayag ti Ubing” Daytoy nga artikulo (Hunio 8, 1997) napikapiknak unay. Iti tay-ak ti ministerio, masansan a maam-ammok dagiti ubbing. Diak ipupuera wenno tagibassiten ida, kanayon a kasaritak ida maipapan iti Paraiso. Pagyamanan unay iti pannakaipablaak daytoy a kapadasan, tangay pinaregtanak a mangitultuloy iti panangaramidko iti daytoy. Asinot’ makaammo no asino ti sumaganad nga addaan “kadagiti lapayag ti ubing”?
M. O. U., Nigeria
Daytoy nga artikulo talaga a dakkel ti epektona kaniak! Idi nagtengko ti paset a “Pannakaammo iti Kinapudno ti Biblia” ken nabasak ti pannakakellaat ni Louise idi nakitana iti Salmo 37:9 maipapan iti panangtawid iti daga—ken iti mismo a King James Version-na!—nagsangsangitak. Pagyamanan kadagitoy a pakasaritaan ti biag, ket pangngaasiyo ta itultuloyyo ti regular a panangyimprenta kadakuada iti Agriingkayo!
P. C., Inglatera
Manipud Kadagiti Managbasatayo Ipatpategko dagiti amin a magasin a maaw-awatmi. Nangnangruna a nagustuak dagiti komento manipud kadagiti managbasa iti Hunio 8, 1997 nga Agriingkayo! maipapan iti panangilaksid. Nailaksidak idi ket kalpasanna naisubliakon iti simmaganad a tawen. Adu unay a tattao ti mangipagarup a naulpit daytoy nga addang. Ngem kinaagpaysuanna, saan. Ti disiplina nga inawatko ket nagrigat nga awaten ngem sigurado a saan a naulpit. Ammok nga inkagumaan laeng dagiti panglakayen ti timmulong kaniak. Ti panangilaksidko iti tulongda ti nakailaksidak. Idi nailaksidakon, nabigbigko a nagliday gayam ti biag no awan ni Jehova. Adda nagdakkel a kurang iti biagko a napennek laeng idi binalbaliwak ti estilo ti panagbiagko ken nagsubliak ken ni Jehova. Ti pannakailaksidko ti namagpakumbaba kaniak ken nangipakita a kasapulak ni Jehova ken ti organisasionna.
A. C., Canada
Agriingkayo! Dispensarendak ta nalipatak a pabaruen ti suskripsionko iti nagsayaat a magasin nga Agriingkayo! Mangipakaammo, makaisuro, ken napudno a magasin nga addaan kadagiti makaliwliwa ken makapariing a tema. Kayatko ti maaddaan iti amin a ruar a nalibtawak. Diak kayat a malibtawan uray maysa. Pagyamanan iti siaanus a panagtulongyo a mangparmek iti kinaawan pannakaammo.
N. S., Sri Lanka