Sangalubongan a Parke​—Kasano?

TAPNO mapennek ti natural a gagarda a makatarus ken mangtagiragsak iti sangaparsuaan, minilion a tattao ti tinawen a sumarungkar kadagiti parke. Sigurado a maayatantayo nga agbiag iti napintas a lugar a kas ti makitayo ditoy. Nalabit ipalagipna kadakayo daytoy ti Paraiso ti Eden a nangisaadan ti Namarsuatayo iti daydi immuna a natauan a pagassawaan.

Nagsayaat, ta dua kadagiti karayan nga idiay Eden ti puonda agay-ayusda pay la itatta. Isuda ti Hiddekel, a kadawyan a maaw-awagan Tigris, ken ti Eufrates. (Genesis 2:10-14) Kastoy ti inkomento ni Hans Bruns a managipatarus iti Biblia maipapan itoy a salaysay ti Biblia: “Dagiti karayan nairantada a mangipasimudaag a daytoy saan nga estoria la idi ugma, no di ket talaga a napasamak ditoy daga.”

No kasano nga adu a parke itatta ti bassit lat’ nangrugianda sa limmawa ingga a dakdakkelen nga amang ngem daydi orihinal nga itsurana, kasta met ti panggep ti Dios no iti daydi minuyongan a parke idiay Eden. Ti dumakdakkel a natauan a pamilia trabahona koma idi nga idenden dagiti beddengna agingga a ti Paraiso saknapanna ti intero a daga ket arkosanna dayta iti nakaay-ayat a natural nga imnas.

Pudno, ti kinasukir ti immuna a natauan nga agasawa isut’ nakapukawanda ti pribilehio a mangtagiragsak pay iti dayta orihinal a Paraiso. Ngem saan a nagbalbaliw ti panggep ti Namarsuatayo a tagiragsakento ti tao ti naindagaan a paraiso. (Isaias 46:11; 55:11) Gapuna, masansan a dakamaten ti Biblia ti pannakaisublinto ti Paraiso ditoy daga iti sidong ti panagturay ti Pagarian ti Dios. Kas pangarigan, adda padto a nagkuna: “Ta ni Jehova sigurado a liwliwaennanto ti Sion. . . . Aramidennanto dagiti let-angna a kasla Eden ken ti kadaratan a tay-akna a kasla minuyongan ni Jehova.” Kalpasan dayta, nadakamat pay ti padto nga addanto dagiti mangbangon kadagiti balay, agmula kadagiti kaubasan, ken mangtagiragsak kadagiti apit ti daga.​—Isaias 51:3; 65:21-23.

Umarngi pay, idiay Apocalipsis, a maudi a librot’ Biblia, adda sirmata ti masanguanan a “baro a langit ken maysa a baro a daga.” Ti “baro a langit,” wenno baro a turay ti Dios, nakita nga iturturongna ti atensionna ditoy daga. Aniat’ resultana? “Adtoy!” naibaga kadatayo, “ti tabernakulo ti Dios adda iti sangatauan [paliiwenyo ta naisao a ti Dios makikadua kadagiti tao, saan ket a dagiti tao ti makikadua iti Dios sadi langit], ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Dagiti immuna a banag napalabasdan.”​—Apocalipsis 21:1, 3, 4.

Dagitoy kari ti Biblia a naisubli a paraiso saan a padles nga arapaap laeng. Idinto ta dagiti conservationists ken naturalists masirmatada dagiti limitado a parke, nga agpannurayda kadagiti mannakaawat a mammanday linteg, dagiti kari ti Biblia adda Mangsuporta kadakuada, a ni Jehova a Dios a Namarsua iti uniberso, a ti Saona ket di mabalin ken imposible a dinto matungpal.

Itatta, nangruna kadagiti parke a kabambantayan, medio agamak dagiti agpasiar kadagita. Ngem iti daytanto sangalubongan a parke, dagiti animal didanto dangran ti tattao wenno pagpeligruen man ida, ket dinto met itarayan dagiti animal dagiti tao ken kumpesda iti buteng, ta inkari ti Biblia: “Ti lobo talaga a makipagtaengto iti kalakian a kordero, ket ti urbon a kalding makiiddanto iti leopardo, ket ti urbon a baka ken ti burboran nga urbon ti leon ken ti animal a napalukmeg agkakaduadanto; ket bassitto la nga ubing ti mangidalan kadakuada. Ket ti baka ken ti oso agarabdanto; dagiti urbonda agkakaiddadanto. Ket uray ti leon manganto iti garami a kas iti toro.”​—Isaias 11:6-9.

Anian a nakaay-ayatto ti agpasiar iti kabakiran a kaduayo iti sibayyo ti leon iti kabantayan wenno nalabit ti dakkel, nasingpet a burboran nga oso! Awanton a pulos ti sibibiag a kaamakna ti sabali.

Dagiti nangpundar kadagiti napintas a parke itatta natan-ok ti gandatda, a nangirantada kadagiti lugar a pakasalakniban dagiti mula ken atap nga animal. Ngem ti laeng asidegen a panggep ti Dios a maymaysa a sangalubongan a parke iti sidong ti gobierno ti Pagarianna ti makagarantia ti permanente a pannakaitalimeng dagiti kinabaknang ti daga. Daytoy laeng a Pagarian nga iturayan ni Jesus-Kristo, nga Anakna, ti makaipasdek ti permanente a sangalubongan a paraiso agraman pudno a talna iti nagbaetan ti tao ken tao, ken iti nagbaetan ti tao ken animal.