Sadino ti Ayan ti Paraiso a Dinakamat ti Biblia?

Saludsod Dagiti Agbasbasa

Sadino ti Ayan ti Paraiso a Dinakamat ti Biblia?

▪ Inkari ni Jesus iti dandanin matay a lalaki a situtured a nangyebkas iti pammatina kenkuana: “Makikaduakanto kaniak idiay Paraiso.” (Lucas 23:43) Sadinonto ti papanan ti lalaki? Addanto ngata dayta a Paraiso idiay langit, ditoy daga, wenno iti dadduma a lugar a pagurayan dagiti tattao iti panangukom?

Nagbiag idi iti Paraiso dagiti inapotayo. Ibaga kadatayo ti Biblia: “Nangimula ni Jehova a Dios iti maysa a minuyongan idiay Eden, a sumango iti daya, ket inkabilna sadiay ti tao a binukelna. . . . Ket ni Jehova a Dios innalana ti tao ket insaadna iti minuyongan ti Eden tapno talonenna dayta ken tapno aywananna.” (Genesis 2:8, 15) Idi naipatarus iti Griego dagitoy a sasao, ti sao a “minuyongan” ket naipatarus a pa·raʹdei·sos, a dayta ti nagtaudan ti sao a “paraiso.”

No kasano a ti agassawa palawaenda ti pagtaenganda no umadu dagiti annakda, manamnama met a palawaen dagiti immuna a nagannaktayo ti Paraiso bayat nga umad-adu ti annakda. Imbilin ti Dios kadakuada: “Punnuenyo ti daga ken parukmaenyo.”—Genesis 1:28.

Ngarud, panggep ti Namarsua kadatayo a ti tao ket agbiag ken maaddaan kadagiti annak iti Paraiso ditoy daga. Agbiagdanto ngarud nga agnanayon iti naindagaan a minuyongan nga awanan kadagiti sementerio. Agbalinto ti daga nga agnanayon a pagtaengan ti amin a tattao. Di ngarud pakasdaawan a pakaragsakantayo unay ti natural a kasasaad ti planetatayo! Naparsuatayo nga agbiag iti napintas a daga.

Nagbaliw kadin ti panggep ti Dios? Saan. Ta impasigurado ni Jehova kadatayo: “Kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak.” (Isaias 55:11) Nasurok a 3,000 a tawen kalpasan a naparsua ti tao, kinuna ti Biblia maipapan iti “Nangporma iti daga ken ti Nangaramid iti dayta” a “saanna a pinarsua a maipaay laeng iti awan kapapay-anna, a nangbukel iti dayta tapno mapagnaedan.” (Isaias 45:18) Saan a nagbaliw ti pagayatan ti Dios. Agbalinto met laeng a paraiso daytoy daga.

Makapainteres ta dagiti panangiladawan ti Biblia mainaig iti Paraiso ket tukoyenna laeng ti biag ditoy daga. Kas pagarigan, impadto ni Isaias: “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada.” (Isaias 65:21) Sadino ti pakaibangonan ti balbalay? Sadino ti pakaimulaan ken panganan kadagiti ubas? Sibabatad a kunaen ti Proverbio 2:21: “Ta dagiti napalungdo isuda ti agtaengto iti daga.”

Dinakamat met ni Jesus ti maipapan iti naindagaan a paraiso. Pudno nga inkarina ti maysa a nailangitan a paraiso, ngem agpaay laeng dayta iti sumagmamano a napili. (Lucas 12:32) Kalpasan a matayda, mapagungarda iti nailangitan a Paraiso ket makikaduada ken Kristo nga agturay iti naindagaan a Paraiso. (Apocalipsis 5:10; 14:1-3) Dagitoy a kakaduana nga agturay idiay langit siguraduendanto a ti Paraiso ditoy daga ket siuumiso a maiturayan ken mataripato maitunos kadagiti pagalagadan ti Dios.

Ammo ni Jesus a dayta ti pagayatan ti Dios ditoy daga ta adda idi idiay langit a kadua ni Amana idi naparsua ti minuyongan ti Eden. Ti biag iti masanguanan a naindagaan a paraiso ket mabalin a tagiragsaken ti amin a tattao a mangalagad iti pammati ken Jesus. (Juan 3:16) Inkari ni Jesus kadagiti kasta a tattao: “Makikaduakanto kaniak idiay Paraiso.”—Lucas 23:43.

[Picture Credit Line iti panid 25]