Salsaludsod Dagiti Agbasbasa
Ayanto dagiti demonio bayat ti Sangaribu a Tawen a Panagturay ni Kristo?
Awan ti direkta a sungbat ti Biblia iti dayta a saludsod. Nupay kasta, makaaramidtayo iti lohikal a konklusion no ayan dagiti demonio bayat ti Milenio a Panagturay ni Kristo.
Iti panangipakpakaunana iti sumagmamano a pasamak iti rugrugi ken iti ngudo dayta a Milenio, kuna ni apostol Juan: “Nakitak ti maysa nga anghel a bumabbaba manipud langit nga addaan iti tulbek ti mangliwengliweng ken maysa a dakkel a kawar iti imana. Ket kinemmegna ti dragon, ti kadaanan a serpiente, nga isu ti Diablo ken Satanas, ket pinarautanna iti las-ud ti sangaribu a tawen. Ket inggarangugongna iti mangliwengliweng ket rinikpanna dayta ken sinelioanna dayta iti rabawna, tapno saannan a mayaw-awan dagiti nasion agingga a maturpos ti sangaribu a tawen. Kalpasan dagitoy a banag masapul nga isu maluk-atan iti bassit a kanito.” (Apocalipsis 20:1-3) Dagitoy a bersikulo dakamatenda laeng ti pannakaigarangugong ni Satanas ken ti apagbiit a pannakaruk-atna. Nupay saan a nadakamat dagiti demonio, rasonable nga inton ti anghel nga addaan iti tulbek ti mangliwengliweng—ti naipadayag a Jesu-Kristo—kemmegen ken igarangugongna ti Diablo, kasta met ti aramidenna kadagiti demonio.—Apocalipsis 9:11.
Idi nagbalin nga Ari idiay langit idi 1914, adda inaramid ni Jesu-Kristo a nakadidigraan ni Satanas ken dagiti demoniona. Kuna ti Apocalipsis 12:7-9: “Bimtak ti gubat sadi langit: Ni Miguel ken dagiti anghelna nakibakalda iti dragon, ket nakibakal ti dragon ken dagiti anghelna [dagiti demonio] ngem saan a nangabak, awan met ti nasarakanen a lugar maipaay kadakuada idiay langit. Gapuna naitapuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangyaw-awan iti intero a mapagnaedan a daga; isu naitapuak iti daga, ket dagiti anghelna naitapuakda a naikanunong kenkuana.” Sipud idin, iti laeng aglikmut ti daga a makapagtignay ni Satanas ken dagiti demoniona. Lohikal a maibagatayo nga inton ad-adda nga ingetan ni Jesu-Kristo ti aktibidad ni Satanas tapno mawayawayaan ti daga iti dakes nga impluensiana, kasta met laeng ti aramidenna kadagiti demonio.
Usigenyo met ti kaunaan a padto iti Biblia. Kastoy ti mabasa a kuna ti Dios ken ni Satanas: “Mangikabilakto ti panagginnura iti nagbaetanyo iti babai [ti nailangitan nga organisasion ni Jehova] ken iti nagbaetan ti bin-im ken ti bin-ina [ni Jesu-Kristo]. Dunorennakanto iti ulo ket dunoremto iti mukod.” (Genesis 3:15) Ti panangdunor iti ulo ti serpiente ramanenna ti pannakaigarangugong ni Satanas iti mangliwengliweng bayat ti Sangaribu a Tawen a Panagturay ni Kristo. Innayon ti padto nga adda panagbinnusor Daydiay mangdunor ken ti bin-i ni Satanas. Daytoy a bin-i, wenno organisasion, iramanna ti di makita a paset a buklen dagiti dakes nga anghel, wenno demonio. Isu a rasonable a panunoten nga inton igarangugong ni Jesus ni Satanas, parautan ken igarangugongna met dagiti demonio. Ti nakaro a panagbutengda iti mangliwengliweng ipasimudaagna a dagitoy a dakes nga espiritu ammoda ti umad-adanin a pannakaipupokda.—Lucas 8:31.
Ngem posible kadi a saan a dinakamat ti Apocalipsis 20:1-3 dagiti demonio agsipud ta madadaeldanto inton Armagedon agraman ti makita a paset ti bin-i ni Satanas? Ipakita ti Biblia a saan a posible dayta. Mainaig iti maudi a pagtungpalan ni Satanas, kuna ti Biblia: “Ti Diablo a nangyaw-awan kadakuada naitapuak iti danaw nga apuy ken asupre, a sadiay ti ayanen agpadpada ti atap nga animal ken ti ulbod a mammadto; ket matutuokdanto iti aldaw ken rabii iti agnanayon ken awan inggana.” (Apocalipsis 20:10) Napolitikaan ti atap nga animal ken ti ulbod a mammadto ken paset ida ti makitkita nga organisasion ni Satanas. (Apocalipsis 13:1, 2, 11-14; 16:13, 14) Madadaelda inton Armagedon, inton ti Pagarian ti Dios rippuogen ken pagpatinggaenna amin dagiti pagarian ditoy lubong. (Daniel 2:44) Ti Biblia tukoyenna ti “agnanayon nga apuy a naisagana iti Diablo ken kadagiti anghelna.” (Mateo 25:41) Ni Satanas ken dagiti demoniona maitapuakda iti isu met laeng a “danaw nga apuy ken asupre” kas iti atap nga animal ken ti ulbod a mammadto a kaipapananna a madadaeldanto met nga agnanayon. No koma madadael inton Armagedon dagiti nabilbileg nga espiritu a paset ti bin-i ni Satanas, sigurado a nadakamat koma nga addan dagiti demonio iti dayta a simboliko a danaw a kaduada ti atap nga animal ken ti ulbod a mammadto. Ti saanda a pannakadakamat iti Apocalipsis 20:10 ipasimudaagna a saan pay a madadael dagiti demonio inton Armagedon.
Yantangay saan a direkta a nadakamat a naigarangugong dagiti demonio iti mangliwengliweng, saanda met nga espesipiko a nadakamat a naruk-atan manipud sadiay. Ngem ti pagtungpalanda ket kas met laeng iti mapagteng iti Diablo. Kalpasan a maruk-atanda a kadua ti Diablo ken kalpasan a tumulongda kenkuana bayat ti maudi a panangsubok iti sangatauan iti ngudo ti sangaribu a tawen, maitapuak met dagiti demonio iti danaw nga apuy ket iti kasta agnanayon a madadaelda.—Apocalipsis 20:7-9.
Gapuna, nupay ni Satanas laeng ti dakamaten ti Apocalipsis 20:1-3 a makemmeg ken maigarangugong iti mangliwengliweng a kinaawan gaway, lohikal a maibagatayo a maparautan ken maigarangugong met dagiti anghelna. Awan kada Satanas ken dagiti demoniona ti mapalubosan a mangtungday iti kaitungpalan ti panggep ti Dios a maaramid ti daga kas maysa a paraiso ken maisubli ti sangatauan iti kinaperpekto bayat ti Sangaribu a Tawen a Panagturay ni Kristo.