BASSIT A KAYO

[Heb., siʹach].

Nababa ken narukbos ti panagsangsangana a kayo wenno aripuno dagiti nababa a kayo. Uppat a daras laeng nga agparang ti Hebreo a sao a siʹach, iti Ge 2:5; 21:15; Job 30:4, 7. Ti sumagmamano a kayo iti rehion ti Palestina mabalin a siuumiso a maawagan kas babassit a kayo, a pakairamanan ti pandek a parwa, ti nasiit a lotus, ti kayo a retama; idinto ta ti kadakkel ken langa ti dadduma ket masansan wenno gagangay nga umasping iti nababa a kayo, kas iti kaykayo nga akasia, arrayan, estorake, tamarisko, ken sause.

Iti let-ang ti Beer-seba, ti maup-upay a ni Agar inkabilna ni Ismael iti sirok ti maysa a bassit a kayo (Ge 21:15); iti umasping a pamay-an, deskribiren ni Job dagiti tattao nga agbibiag iti awan danumna a rehion kas ‘mangrurruros iti naapgad a yerba iti sibay ti babassit a kayo’ ken agug-uga iti tengnga ti babassit a kayo.​—Job 30:4, 7.

Ti sumsumged a bassit a kayo, a babaen iti dayta inatrakar ti anghel ni Jehova ti atension ni Moises ken nagsao kenkuana, ket matarusan a maysa idi a kita ti siitan a bassit a kayo (Heb., senehʹ). (Ex 3:2-5; De 33:16) Iti panangtukoyda iti daytoy a pasamak, dagiti Kristiano a mannurat iti Griego a Kasuratan inaramatda ti Griego a sao a baʹtos, a kaipapananna ti maysa a siitsiitan wenno aniaman a nasiit a bassit a kayo. (Mr 12:26; Lu 20:37; Ara 7:30, 35) Iti Griego, ti blackberry naawagan baʹton (naadaw iti baʹtos), ket ngarud ti sumagmamano a leksikograpo inaigda ti nasiit a bassit a kayo (senehʹ) iti blackberry a bassit a kayo (Rubus sanctus), a gagangay iti intero a Siria ken iti kaaduan a paset ti Palestina. Nupay kasta, saan a masarakan nga agtubtubo kas atap iti Peninsula ti Sinai kadagiti agdama a tiempo. Gapu itoy, ti dadduma anamonganda ti pannakainaig dayta iti maysa a kita ti kayo nga akasia, yantangay dagitoy a nasiit ken masansan a kasla babassit a kaykayo gagangayda unay iti intero a rehion ti Sinai. Nupay kasta, awan ti maibaga a sigurado a pakabigbiganna.