Kayat ni Jehova a ‘Natalged ken Nakaradkadka’

INTON bumtak ti kapeggadan a pasamak iti historia, siguraduen ti Mannakabalin-amin a Dios a ‘makatalaw a sitatalged’ ti amin nga an-anamonganna. (Joel 2:32) Ngem kinapudnona, kanayon a kayat ni Jehova a masalakniban dagiti tattao manipud iti peggad. Gapu ta “adda [kenkuana] ti ubbog ti biag,” ibilangna ti amin a tattao a napateg ken maikari iti pannalaknibna.​—Sal. 36:9.

Kasta met ti panangmatmat dagiti nagkauna a matalek nga adipen ti Dios maipapan iti biag. Sigun iti Genesis 33:18, “sitatalged ken sikakaradkad” a limmasat ni Jacob ken ti pamiliana iti maysa a napeggad a panagdaliasat. Saan laeng a nagpannuray ni Jacob iti pannalaknib ni Jehova no di ket nangaramid met kadagiti praktikal nga addang tapno masalakniban ti amin a nakipagdaliasat kenkuana. (Gen. 32:7, 8; 33:14, 15) Babaen ti panangyaplikarmo kadagiti prinsipio iti Biblia, nataltalgedka ken ti sabsabali. Kitaentayo no kasano nga agaplikar daytoy kadagiti agibangbangon iti Kingdom Hall ken iti dadduma pay nga umasping a proyekto ken mangipapaay iti saranay kadagiti nadidigra.

Kinatalged iti Sidong ti Mosaiko a Linteg

Ikalikagum ti Mosaiko a Linteg a suroten ti ili ti Dios dagiti pagannurotan mainaig iti kinatalged. Kas pagarigan, no agibangon ti maysa nga Israelita iti balay, masapul a mangikabil iti nababa a bakud wenno barandilias iti aglikmut ti atepna. Gapu ta masansan nga adda dagiti tattao iti daplat nga atep ti pagtaenganda, dagita a bakud wenno barandilias ti agserbi kas proteksion tapno saanda a matnag. (1 Sam. 9:26; Mat. 24:17) No adda maaksidente gapu ta saan a nasurot dayta a pagannurotan, manungsungbat ken Jehova ti bumalay.​—Deut. 22:8.

Agaplikar met dayta a pannusa ti Linteg no adda madangran gapu kadagiti dingnguen. No natay ti sinangdo ti maysa a toro, ti makinkukua masapul a papatayenna ti toro tapno natalged dagiti tattao. Gapu ta saanna a mabalin a kanen wenno ilako ti karne ti torona, dakkel a pannakalugi ti panangpapatayna iti dayta. Nupay kasta, ania ti mapasamak no makadangran ti maysa a toro ket kalpasanna saan a bantayan dayta ti makinkukua? No makapatay manen ti toro iti sabali a tao, agpadpada a mapapatay ti toro ken ti makinkukua. Dayta a linteg pagpanunotenna ti asinoman a saan a naannad kadagiti dingnguenna tapno usigenna ti kababalinna.​—Ex. 21:28, 29.

Iparegta met ti Linteg ti umiso a panangusar kadagiti remienta. Adu nga Israelita ti agus-usar idi kadagiti wasay a pagbalsig. No aksidente a nauksot ti ulo ti wasay iti putanna ken adda napuntaanna a tao a nakaigapuan ti ipapatayna, masapul a ti agbalbalsig ket agkamang iti siudad a pagkamangan. Masapul nga agtalinaed sadiay agingga a matay ti nangato a padi. Kaipapanan dayta a ti di inggagara a nakapatay ket mayadayo iti pamilia ken pagtaenganna iti adu a tawen. Dayta nga urnos isurona iti nasion a sagrado ken Jehova ti biag. Kas panangtulad iti panangmatmat ti Dios iti biag, masapul a taginayonen ti maysa a tao a nakakondision dagiti remientana ken usarenna dagita a sitatalged.​—Num. 35:25; Deut. 19:4-6.

Babaen kadagita a linteg, nalawag nga impakita ni Jehova a kayatna a salimetmetan dagiti adipenna ti kinatalged iti uneg ken ruar ti pagtaengan. Manungsungbat kenkuana dagidiay makapatay wenno makadangran iti sabsabali uray di inggagara dayta. Saan a nagbalbaliw ti panangmatmat ni Jehova iti kinatalged. (Mal. 3:6) Kayatna a maliklikan dagiti tattao ti pannakadangranda ken ti sabsabali. Nangnangruna a pudno dayta no mangibangbangon ken mangmantenertayo kadagiti patakder a naidedikar iti pudno a panagdayaw.

Kinatalged Kadagiti Panagibangon a Proyekto

Ibilangtayo a dakkel a pribilehio ti panagibangon ken panangmantener kadagiti Kingdom Hall, Assembly Hall, ken pasilidad ti sanga. Kasta met laeng no agtartrabahotayo kadagiti proyekto mainaig iti panangsaranay kadagiti nadidigra. Kayattayo a kanayon a sisisigo nga itungpaltayo ti trabahotayo, ta no saantayo a naannad uray kadagiti simple laeng a trabaho, mabalin a madangrantayo ken ti sabsabali. (Ecl. 10:9) Wen, no sipapanunottayo iti kinatalged bayat nga agtartrabahotayo, maliklikantayo dagiti pannakadangran.

Kuna ti Biblia: “Ti pintas dagiti agtutubo a lallaki isu ti bilegda, ket ti kinangayed ti lallakay isu ti kinaubananda.” (Prov. 20:29) Kasapulan ti bileg ti kinaagtutubo a mangiringpas kadagiti nadagsen a trabaho. Ngem dagiti lallakay a trabahador​—isuda nga eksperiensiado iti trabaho a panagibangon​—ti mangaramid kadagiti komplikado ken pangleppas a trabaho. Dagiti lallakay ita inusarda idi ti bileg ti kinaagtutuboda a nangiringpas kadagiti nadagsen a trabaho. Gapuna, no kabbaroka a boluntario, paliiwem ti panagtrabaho dagiti nasigo a trabahador ken surotem dagiti instruksionda. No kayatmo ti makasursuro, adu ti maadalmo kadagiti kakabsat nga aduan-kapadasan iti panagibangon. Ramanen dayta ti natalged a panangusar kadagiti napeggad a remienta ken panangbagkat kadagiti nadagsen a banag. Iti kasta, nabungbunga, nataltalged, ken naragragsak ti panagtrabahom.

Kanayon koma nga alerto dagiti trabahador iti konstruksion. Alisto nga agbaliw dagiti kasasaad. Uray no dati a nalagda ti pagsaadan ti patakder, nalabit nga adda abutna itan. Dadduma a trabahador ti mangyalis-alis iti agdan, tabla, wenno lata ti pintura. No masingaka, nalakaka laeng a madangran. Sigun kadagiti pagannurotan ti kinatalged, dagiti agtartrabaho iti lugar ti konstruksion ti masapul nga agusar iti pangsalaknib nga aruaten. Dagiti mangsalaknib nga anteohos, helmet, ken maitutop a sapatos masalaknibandaka iti adu a peggad no addaka iti lugar ti konstruksion. Ngem masalaknibandaka laeng no usarem ken taginayonem dagita a nakakondision.

Nupay kasla simple laeng ti usar ti adu a remienta, agkasapulan iti panagsanay ken kanayon a panangusar tapno mausarmo dagita a sitatalged ken sisisigo. No damom nga usaren ti maysa a remienta, ibagam dayta iti kabsat a mangimatmaton iti proyekto. Iyurnosna ti panagsanaymo. Makaay-ayo a galad ti kinanumo, wenno ti panangbigbig iti limitasionmo. Kinapudnona, napateg dayta tapno maliklikan ti pannakadangranmo ken ti sabsabali nga adda iti lugar ti konstruksion.​—Prov. 11:2.

Ti pannakatnag ket maysa a kangrunaan a pakaigapuan ti pannakadangran iti lugar ti konstruksion. Sakbay nga usarem ti agdan wenno andamio, siguraduem a natalged ken nakakondision dagita. No addaka iti andamio wenno atep nga agtartrabaho, maikalikagum nga agusarka iti harness wenno mangikabilka kadagiti pangsarapa. Agdamagka iti mangimatmaton iti trabaho no adda saludsodmo maipapan iti panagtrabaho kadagiti nangato a lugar.a

Bayat nga umad-adu dagiti agserserbi ken Jehova iti intero a lubong, umad-adu met ti kasapulan a maibangon a Kingdom Hall ken dadduma a pasilidad a mausar a mangitandudo iti pudno a panagdayaw. Dagidiay mangimaton iti panagibangon iti Kingdom Hall ken dadduma pay nga umasping a proyekto ti nakaitalkan ti panangsalaknib kadagiti napateg nga arban ni Jehova nga imatmatonanda. (Isa. 32:1, 2) No addaanka iti pribilehio a mangimaton kadagiti kakabsat iti panagibangon a proyekto, dimo pulos liplipatan ti kinapateg ti kinatalged. Siguraduem a nadalus ken nadalimanek ti lugar ti konstruksion. Siaalumamay ngem siiinget a dakamatem kadagidiay agkasapulan iti pammalagip no kasano ti agtrabaho a sitatalged. Dimo palubosan dagiti agtutubo wenno kabbaro a sumrekda iti napeggad unay a lugar. Ammuem dagiti mabalin a tumaud a peggad tapno siaannad a makapagtrabaho dagiti trabahador. Laglagipem a ti kalattayo ket mairingpas ti trabaho nga awan ti madangran.

Ti Paset ti Ayat

Adda dagiti posible a peggad bayat ti panagibangon kadagiti Kingdom Hall ken dadduma pay a patakder a mausar iti pudno a panagdayaw. Gapuna, masapul a naannad dagidiay makiraman kadagita a proyekto. Babaen ti panagraem kadagiti prinsipio ti Biblia, panangannurot kadagiti pagalagadan iti trabaho, ken panangusar iti umiso a pangngeddeng, maliklikam ti peggad ken masalaknibam dagiti katrabahuam.

Ania ti kangrunaan a motibotayo no apay a kasta unay ti panangannurottayo iti kinatalged? Gapu iti ayat. Wen, ti panagayattayo ken Jehova tignayennatayo a mangipateg iti biag, kas iti panangipategna iti dayta. Ken ti panagayat kadagiti padatayo a tao pagbalinennatayo a naannad tapno saantayo a makaaramid iti aniaman a banag a makadangran kadakuada. (Mat. 22:37-39) Gapuna, aramidentayo koma ti amin a kabaelantayo a mamagbalin a ‘natalged’ dagiti agtartrabaho kadagiti proyektotayo a panagibangon.

[Footnote]

[Kahon/Ladawan iti panid 30]

No Kasano nga Usaren a Sitatalged Dagiti Agdan

Iti nabiit pay a tawen iti Estados Unidos, nasurok a 160,000 a trabahador ti nadunor gapu iti pannakatnag kadagiti agdan. Agarup 150 met ti natay kadagita a pannakatnag. Sadinoman ti pagnanaedan ken pagtartrabahuam, adtoy ti sumagmamano a pagannurotan tapno maliklikam ti matnag iti agdan.

◇ Dika agusar iti agdan nga agluggaluggad wenno adda perdina, ken dimo tarimaanen dagita. Dadaelem ketdin.

◇ Adda laeng kadagsen a kabaelan nga awiten ti aniaman nga agdan. Siguraduem a saan a lumbes iti dayta a kadagsen ti dagup ti timbangmo ken dagiti remientam.

◇ Ipatakdermo ti agdan iti patad ken solido a pagsaadan imbes nga iti saan a natalged a banag, kas iti andamio wenno rabaw ti timba ken kahon.

◇ Kanayon koma a sumangoka iti agdan no umuli wenno bumabaka iti dayta.

◇ Dika agtakder wenno agtugaw iti dua a kangatuan a tukad ti aniaman nga agdan.

◇ No agusarka iti agdan nga umuli wenno bumaba iti atep wenno iti aniaman, masapul a di kumurang a maysa a metro ti lumbes a paset ti agdan iti nagsanggiranna nga atep wenno iti aniaman. Tapno saan nga agkuyas, mangilansaka iti tabla iti sanguanan dagiti saka ti agdan wenno igalutmo dagita. No saan a posible dagita, ipatengngelmo dayta bayat nga agtartrabahoka. Igalutmo a naimbag ti makinngato a paset ti agdan tapno saan nga agirig dayta.

◇ Dimo usaren ti tukad ti agdan a pangiparabawan iti tabla a pagbatayam nga agtrabaho.

◇ Mabalin nga aggaraw ti agdan no adda pilitem a gaw-aten a trabahuen ket napeggad dayta. Agingga a mabalin, iyasidegmo ti agdan iti ub-obraem.

◇ No agtrabahoka iti agdan iti sango ti nakarikep a ridaw, mangikabilka iti mangpakdaar a plakard iti ridaw sa itulbekmo. No saan a posible dayta, mangitudingka iti agbantay tapno mangpakdaar kadagiti lumabas.

◇ Maysa la koma ti umuli iti agdan malaksid no nadisenio dayta para iti dua a tao.b

[Footnote]

[Ladawan iti panid 29]

Ti Mosaiko a Linteg kalikagumanna a masapul a mangikabil iti bakud wenno barandilias iti aglikmut ti daplat nga atep