KASIA

[Heb., qid·dahʹ; qetsi·ʽahʹ].

Nupay dua a Hebreo a sao ti maar-aramat a tumukoy itoy a mula iti Biblia, ipatuldo dagiti bersion a Syriac ken Targum nga agaplikar dagita iti isu met laeng a kayo wenno iti bunga dayta. Ti kayo a pagtaudan ti ukis ti kasia (Cinnamomum cassia) agtubo itan iti makindaya nga Asia ken kameng ti isu met laeng a pamilia ti kayo a kanela. Madanonna ti katayag a 12 m (40 pie) ken addaan iti nasileng, nasikkil a bulbulong. Ti makin-uneg nga ukis dagiti sanga (maaw-awagan cassia lignea), no maiwa, magango ken aguklap, nga aglukot nga agbalin a tubtubong, a kalpasanna maipan iti tiendaan. Ti ukis ti kasia nakerkersang ken nabangbang-i ngem iti ukis ti kanela. Dagiti saringit maar-aramat kas naipagango a rekado iti panangisagana kadagiti putahe a taraon, ket dagiti nadanonanen a sabsabong, no maipagango, agserbi kas nasayamusom nga insienso.

Idi naisagana ti nasantuan a pangpulot a lana iti tiempo ti panangaramid iti tabernakulo, nairaman ti kasia kadagiti ramen kas maysa kadagiti “kasayaatan a bangbanglo.” (Ex 30:23-25) Nalatak ti kasia kadagiti produkto a pakaseknan dagiti komersiante ken agtagtagilako ti siudad ti Tiro. (Eze 27:19) Iti Salmo 45:8 ti sao a qetsi·ʽahʹ naaramat a pangdeskribir kadagiti kawes ti ari bayat a mangiparuar dayta iti makaay-ayo a sayamusom iti tiempo ti kasarna. Ti laengen sabali pay a panagparang daytoy a sao ket kas nagan ti maikadua nga anak a babai ni Job, ni Kezia, a nayanak kalpasan ti panagimbagna manipud panagsakit.​—Job 42:14.