LIENSO
Ti sinulid wenno lupot a naaramid manipud iti lino. (Ex 25:4; Uk 15:14) Kaaduan a kawes dagiti Hebreo ket mabalin a delana wenno lienso. (Le 13:47; Pr 31:13, 22; Os 2:5, 9) Imparit ti Linteg ti panaglaok dagitoy dua a material kas kawes ti Israelita a saan a padi. (De 22:11) Ti dadduma pay a banag a naaramid iti lienso ket dagiti sinturon (Jer 13:1) ken dagiti layag. (Eze 27:7) Nupay nabatad a nagaramid dagiti Israelita iti bukodda a lienso, nagangkatda iti lienso manipud Egipto.—Pr 7:16.
Nagduduma ti kalidad ti lienso, kas impatuldo dagiti panangtukoy ti Kasuratan iti “napino a lienso” ken “napino nga abel.” (Eze 16:10; 27:16) Ti kawes idi dagiti babaknang, ar-ari, ken tattao a nangato ti saadda iti gobierno ket dagiti nagsasayaat ti kalidadna a lienso. (Ge 41:42; 1Cr 15:27; Est 8:15; Lu 16:19) Binalkut ni Jose, maysa a nabaknang a tao a taga Arimatea, ti bangkay ni Jesus iti nadalus, napino a lienso.—Mt 27:57-59.
Ti napino a lienso a sag-ut a tinibbi dagiti Israelita a babbai ket naaramat iti panangaramid iti sangapulo a lupot ti tolda ti tabernakulo, ti kortina a mamagsina iti Nasantuan ken Kasasantuan, ti tabing maipaay iti pagserkan ti tabernakulo, ken dagiti balengbeng ti paraangan kasta met ti tabing ti ruangan dayta. (Ex 35:25; 36:8, 35, 37; 38:16, 18) Ti napino a lienso a tinabid ket naaramat met iti barikes, efod, ken pektoral ti nangato a padi. (Ex 39:2, 3, 5, 8) Nayaramidan met ti dadduma pay a papadi kadagiti nagayad a pagan-anay a ti materialesda ket napino a lienso. (Ex 39:27-29) No maipapan kadagiti kortina ken kawkawes a naaramat iti santuario, agparang a lienso ti kangrunaan a lupot a naaramat ken naiborda ti natinaan a delana ken balitok kas arkos.—Ex 35:35; 38:23.
Piguratibo nga Usar. Nailadawan ti Babilonia a Dakkel a sikakawes dayta iti napino a lienso ken purpura ken eskarlata, a mangipasimudaag iti kinaluho. (Apo 18:16) Ngem no maipapan iti nobia ni Kristo, ti napino a lienso iti pagan-anayna nalawag a naikuna a mangipasimudaag kadagiti “nalinteg nga aramid dagiti sasanto.” Kasta met a dagiti nailangitan a buyot naipakita a nakakawesda iti puraw, nadalus, napino a lienso, a mangipaspasimudaag a makigubgubatda buyogen ti kinalinteg.—Apo 19:8, 11, 14; kitaenyo met ti Da 10:5; Apo 15:6; LINO.