NADAB

[Madadaan; Natan-ok; Naparabur].

1. Ti inauna nga anak da Aaron ken Eliseba. (Ex 6:23; 1Cr 6:3) Nayanak ni Nadab idiay Egipto ken nakiraman iti naindaklan nga Ipapanaw a kadua ti Israel. Isu agraman ti adingenna a ni Abihu ken ti 70 a sabsabali pay nga Israelita naayabanda a kumuyog kada Aaron ken Moises a sumang-at iti Sinai, a sadiay nasirmatada ni Jehova. (Ex 24:1, 9-11) Ni Nadab ken ti tallo a kakabsatna naisaadda amin nga agakem kas padi a kadua ti amada. (Ex 28:1; 40:12-16) Nabatad a sakbay a nagngudo ti aldaw, inabusar da Nadab ken Abihu ti saadda babaen ti panagidatonda iti di mayalubog nga apuy. Saan a naibaga no ania ti namagbalin iti apuy kas di mayalubog, ngem nalabit ad-adda pay ngem pannakabartek laeng (kas ipasimudaag ti madagdagus a pannakaiparit kadagiti papadi ti panaginum iti arak wenno iti makabartek nga inumen no madamada nga agan-annong). Nupay kasta, mabalin a ti pannakabartek ket maysa a makagapu a nagaramidda iti dakes. Gapu iti panaglabsingda, napapatayda babaen iti apuy manipud ken Jehova ket dagiti bagida naibelleng iti ruar ti pakarso. (Le 10:1-11; Nu 26:60, 61) Natay da Nadab ken Abihu sakbay a nakaiputotda iti annak, ngarud ti kakabsatda a da Eleazar ken Itamar ti nabati a pagtaudan idi ti dua a balay ti papadi.​—Nu 3:2, 4; 1Cr 24:1, 2.

2. Maysa a kaputotan ni Juda iti linia ni Jerameel; anak ni Sammai ken nangputot kada Seled ken Apaim.​—1Cr 2:3, 25, 26, 28, 30.

3. Anak ni Jeiel iti tribu ni Benjamin.​—1Cr 8:1, 29, 30; 9:35, 36.

4. Anak ni Jeroboam ken maikadua nga ari ti makin-amianan a sangapulo-tribu a pagarian ti Israel. Nagturay ni Nadab iti sumagmamano a paset ti dua a tawen, a nangrugi idi agarup 976 K.K.P. Kabayatan dayta, intultuloyna ti panagdaydayaw iti kigaw a baka nga inyussuat ni amana. Bayat ti pananglakub ni Nadab iti Gibbeton, sigud a siudad dagiti Levita (Jos 21:20, 23) a sinakup dagiti Filisteo, isu pinapatay ni Baasa; kalpasanna, pinapatay met ni Baasa ti amin a nabatbati a kameng ti balay ni Jeroboam tapno matagikuana a mismo ti trono.​—Jos 21:20, 23; 1Ar 14:20; 15:25-31.