Umadanika iti Dios

Nakonsiderasion Kadagiti Limitasiontayo

Levitico 5:2-11

“IKAGKAGUMAAK ngem kasla saan nga umdas ti panagreggetko.” Kasta ti komento ti maysa a babai a mangikagkagumaan a mangparagsak iti Dios. Awaten kadi ni Jehova a Dios ti kasayaatan a maipaay dagiti agdaydayaw kenkuana? Ikabilanganna kadi dagiti abilidad ken kasasaadda? Tapno masungbatan dagita a saludsod, makatulong no usigentayo ti kunaen ti Mosaiko a Linteg maipapan kadagiti sumagmamano a daton, a masarakan iti Levitico 5:2-11.

Iti sidong ti Linteg, kalikaguman ti Dios ti nagduduma a daton a pangabbong kadagiti basol. Kadagiti kasasaad a nadakamat iti dayta a teksto, di inggagara a nakaaramid iti basol ti maysa nga indibidual. (Bersikulo 2-4) No maammuanna ti naaramidanna a basol, masapul nga ipudnona dayta ken mangidatag iti daton gapu iti babak​—“maysa a kabaian a kordero wenno maysa a kabaian nga urbon dagiti kalding.” (Bersikulo 5, 6) Ngem kasanon no napanglaw ti nakabasol ken awan kordero wenno kalding nga idatonna? Ibilin kadi ti Linteg nga umutang iti kasta nga animal? Masapul kadi nga agtrabaho agingga a makaurnong iti igatangna, ket maitantan ti panagdatonna agpaay kadagiti basolna?

Kas panangipakita iti naayat a konsiderasion ni Jehova, kinuna ti Linteg: “Nupay kasta, no saan nga umdas ti kabaelanna maipaay iti maysa a karnero, ngarud kas datonna gapu iti babak iti basol a naaramidanna masapul a mangyeg iti dua a pagaw wenno dua nga urbon nga atap a kalapati ken Jehova.” (Bersikulo 7) Dagiti sasao a “no saan nga umdas ti kabaelanna” ipakitana a no napanglaw ti maysa nga Israelita ket dina kabaelan ti mangidaton iti karnero, makaay-ayo latta iti Dios ti aniaman a kabaelanna nga idaton​—dua a pagaw wenno dua nga atap a kalapati.

Kasanon no saanna a kabaelan uray ti dua laeng a tumatayab? “Ngarud masapul nga iyegna kas datonna maipaay iti basol a naaramidanna ti apagkapullo ti maysa nga efa [walo wenno siam a tasa] ti nasayaat nga arina a maipaay a daton gapu iti basol,” kuna ti Linteg. (Bersikulo 11) Kadagiti nakapangpanglaw, ipalubos ni Jehova a mangidatagda iti awan darana a daton a pangabbong iti basol.a Iti Israel, saan a lapped ti kinapanglaw ti maysa iti pananggun-odna iti gunggona nga itden ti daton wenno ti pribilehio a makikappia iti Dios.

Ania ti maadaltayo maipapan ken Jehova manipud iti linteg mainaig iti daton gapu iti babak? Isu ket naasi, mannakaawat a Dios nga ikabilanganna ti limitasion dagiti agdaydayaw kenkuana. (Salmo 103:14) Kayatna a sumingedtayo ken maaddaantayo iti nasayaat a relasion kenkuana uray maipasangotayo kadagiti narigat a kasasaad, kas iti panaglakay wenno panagbaket, panagkapuy ti salun-at, panangibaklay kadagiti obligasion iti pamilia, ken dadduma pay. Maliwliwatayo a makaammo a maay-ayo ni Jehova a Dios no ipaaytayo kenkuana ti amin a kabaelantayo.

[Footnote]