ELEAZAR

[Ti Dios Timmulong].

1. Ti maikatlo a nainaganan nga anak ni Aaron a Nangato a Padi babaen iti asawana a ni Eliseba. Ni Eleazar ket kameng iti pamilia ni Cohat nga anak ni Levi. (Ex 6:16, 18, 20, 23; Nu 3:2) Ni Aaron ken ti annakna, a da Nadab, Abihu, Eleazar, ken Itamar, ti mangbukel iti kinapadi iti Israel idi tiempo nga insaad dayta ni Moises.​—Le 8.

Iti maikadua a tawen kalpasan ti ipapanaw iti Egipto, idi naipasdeken ti tabernakulo, ni Eleazar ket nadakamat kas panguluen dagiti Levita. (Nu 1:1; 3:32) Mabalin a saan a nababbaba ngem 30 ti tawenna iti daydi a tiempo, ta ti ar-aramidennan ket trabaho ti padi.​—Nu 4:3.

Maysa ni Eleazar kadagidiay nasuroken a 20 ti tawenda a pimmanaw iti Egipto ken nakastrek met iti Naikari a Daga. Yantangay kameng iti tribu ni Levi, isu ket saan a nairaman iti nayetnag a panangkondenar ti Dios maibusor iti dadduma a 12 a tribu, nga awan kadagiti agtawen iti 20 nga agpangato ti makastrek iti Naikari a Daga, malaksid kada Josue ken Caleb. Awan ti pannakabagi ni Levi kadagiti 12 a managsimisim, a ti 10 kadakuada ket dakes dagiti impadamagda, ken nalawag a saan a karaman dagiti Levita iti awanan pammati, rebelioso a panagtanabutob maibusor ken Jehova.​—Nu 13:4-16; 14:26-30.

Di nagbayag kalpasan ti pannakaidedikar ti tabernakulo ken ti pannakakonsagrar ni Aaron ken ti annakna maipaay iti kinapadi (Le 8), nagidaton da Nadab ken Abihu iti di mayalubog nga apuy ken Jehova ket napapatayda babaen iti apuy a naggapu ken Jehova. (Le 10:1, 2; Nu 3:2-4) Ti kinapadi ket intultuloy da Aaron ken ti dua a matalek nga annakna a da Eleazar ken Itamar. Iti pannakabingbingay dagiti annong a panangasikaso iti santuario, ni Eleazar ti nagbalin a manangaywan iti tabernakulo agraman dagiti ar-aruaten iti dayta, kankanayon a daton a bukbukel, lana, ken insienso. (Nu 4:16) Iti panangibilin ni Jehova, innala ni Eleazar dagiti gambang a pagikkan ti apuy nga inaramat ni Kore ken ti dadduma pay a naitimpuyog kenkuana (awan kadakuada ti papadi) a pinangidaton iti insienso ken Jehova gapu iti tarigagayda a mangagaw kadagiti annong ti padi. Dagitoy ket napagbalin a naingpis a plata a metal a naikalupkop iti altar. (Nu 16:37-40) Ni Eleazar ti nagannong idi a naisakripisio ti nalabaga a bumalasang a baka kas daton gapu iti basol a nangipaay kadagiti dapo a pangdalus iti sumagmamano a kinarugit.​—Nu 19:2, 3, 9; Heb 9:13.

Kalpasan ti pannakigubat dagiti Israelita tapno dusaenda dagiti Midianita gapu iti pasamak ti Peor, adda idi sadiay ni Eleazar tapno tumulong a mangbingbingay kadagiti samsam a naala kadagiti Midianita ken mangideklara iti pagalagadan ti Dios maipapan kadagiti naala a bambanag.​—Nu 31:6, 21-41.

Ni Finehas nga anak ni Eleazar babaen ti maysa kadagiti annak a babbai ni Putiel ket ginunggonaan ni Jehova iti maysa a tulag ti kappia gapu iti naalibtak a tignayna a mangitandudo iti nasin-aw a panagdaydayaw idi nagbasol ti Israel mainaig iti Baal ti Peor. Mabalin nga ibilang a kanayonan daytoy ti tulag iti kinapadi nga inaramid ni Jehova iti tribu ni Levi.​—Nu 25:1-13; Ex 6:25.

Agbalin a Nangato a Padi. Iti maika-40 a tawen ti panagdaliasat iti let-ang, idi natay ni Aaron iti edad a 123 a tawen, nagbalin a nangato a padi ni Eleazar nga agarup 70 ti tawenna idin. (Nu 33:37-39) Ngarud, ni Eleazar ti kaunaan a nangato a padi ti Israel a nagannong iti Naikari a Daga idi nakastrekdan sadiay kalpasan ti agarup walo a bulan. (Nu 20:25-28; De 10:6; Jos 4:19) Iti sanguanan idi ni Eleazar ti nagtakderan ni Josue tapno madutokan kas suno ni Moises, ket itultuloy ni Eleazar a suportaran ni Josue iti akemna ken iyallatiwna kenkuana dagiti pangngeddeng ni Jehova kadagiti napapateg a saludsod maitunos iti panangukom nga ipalnaad ti Urim ken ti Tummim. (Nu 27:18-23) Nakipagtrabaho met ni Eleazar ken Josue a nagibunong iti Naikari a Daga kalpasan ti panangparmek iti Canaan.​—Jos 14:1; 21:1-3.

Panguluen ti Kangrunaan a Balay ti Papadi. Saan nga eksakto a nadakamat iti Kasuratan no kaano a natay ni Eleazar, ngem kasla asideg iti tiempo ti pannakatay ni Josue. Ni Eleazar ket sinunuan ti anakna a ni Finehas. (Jos 24:29, 30, 33; Uk 20:27, 28) Imparangarang ni Eleazar ti kualidad a kinaregta maipaay iti pudno a panagdaydayaw ken Jehova ken sidadayaw nga intungpalna ti kinapadi iti amin nga al-aldawna. Sigun iti nabayagen a patpatien dagiti Judio, 16 ti nakabingbingayan ti papadi bayat a ti tabernakulo ket adda idiay Silo, 8 iti pamilia ni Eleazar ken 8 iti pamilia ti kabsatna a ni Itamar. Nupay kasta, idi tiempo ni David ad-adu ti panguluen a lallaki iti pamilia ni Eleazar ngem iti pamilia ni Itamar. Isu a nangaramid ni David iti 16 a benneg ti papadi iti balay ni Eleazar ken 8 iti balay ni Itamar, nga agdagup iti 24 a benneg nga idi agangay nagsisinnublatda a nagserbi idiay templo.​—1Cr 24:1-4.

2. Ti anak ni Abinadab a nasantipikar a mangbantay iti sagrado a Lakasa a naiyeg iti balay ni amana idiay siudad ti Kiriat-jearim, kalpasan nga insubli dayta dagiti Filisteo.​—1Sm 7:1, 2.

3. Anak ni Dodo nga Ahohita; maysa kadagiti tallo a naisangsangayan a nabileg a lallaki ni David. Idiay Pas-dammim, bayat ti kampania militar a kaduana ni David, naglatak ni Eleazar gapu iti panagtakderna iti talon a napno iti sebada ket maymaysana a nangkabil kadagiti Filisteo, “iti kasta nangisalakan ni Jehova buyogen ti naindaklan a panangisalakan.”​—1Cr 11:12-14; 2Sm 23:9, 10.

4. Anak ni Mali a Merarita iti tribu ni Levi. Saan a naaddaan ni Eleazar iti annak a lallaki no di laeng babbai. Gapuna, innala ida ti annak ni Kis, dagiti kasinsinda, kas assawa.​—1Cr 23:21, 22.

5. Anak ti maysa a Finehas nga idi maikapat nga aldaw ti isasangpet ni Esdras idiay Jerusalem, nadakamat a timmulong ken Meremot a padi a nangbagting iti pirak ken iti balitok ken kadagiti aruaten a maaramat iti templo.​—Esd 8:29, 32, 33.

6. Kaputotan ni Paros a karaman kadagidiay nangala iti ganggannaet nga assawa a babbai ngem nagtungpal iti pammagbaga ni Esdras a papanawenda ida.​—Esd 10:25, 44.

7. Levita a padi nga adda iti martsa nga inyurnos ni Nehemias iti inagurasion ti nabangon manen a pader ti Jerusalem.​—Ne 12:42.

8. Inapo ti pannakaama ni Jesus a ni Jose.​—Mt 1:15.