Salsaludsod Dagiti Agbasbasa

Apay nga iti Baro a Lubong a Patarus, kuna ti Deuteronomio 31:2 a ni Moises ‘saanen a mapalubosan a rummuar ken sumrek’ kas mangidaulo iti Israel idinto ta dadduma a patarus ipamatmatda a saannan a kabaelan ti mangidaulo?

Nupay mabalin nga ipatarus ti nadakamat a Hebreo a sao iti aniaman kadagitoy, ipamatmat ti dadduma nga Ingles a patarus iti Biblia nga idi dandanin matay, baldadon ni Moises, a dinan kabaelan nga aramiden dagiti annongenna a mangidaulo. Kas pagarigan, ti The New English Bible inadawna ti kinuna ni Moises: “Agtawenakon ita nga aldaw iti sangagasut ket duapulo a tawen, ket saanakon a makagunay a kas iti kayatko.” Kasta met, kuna Ti Baro a Naimbag a Damag Biblia: “Saankon a kabaelan ti mangidaulo kadakayo.”

Ngem ipakita ti Deuteronomio 34:7 a nupay lakayen ni Moises, saan a baldado. Kunana: “Ni Moises agtawen iti sangagasut ket duapulo idi natay. Ti matana saan a kimmudrep, ket ti bilegna saan a pimmanaw.” No kasta, kabaelan ni Moises nga idauluan ti nasion, ngem saan a pagayatan ni Jehova nga isu ti agtultuloy a mangidaulo. Nabatad daytoy iti imbaga ni Moises: “Kinuna kaniak ni Jehova, ‘Saanmonto a ballasiwen daytoy a Jordan.’” Nalawag nga inulit laeng ni Jehova ti naibaganan idi adda dagiti Israelita idiay Meriba.​—Numeros 20:9-12.

Napaut ken naisangsangayan ti panagbiag ni Moises, a mabalin a bingaybingayen iti nagkatlo a paset. Nagnaed idiay Egipto iti 40 a tawen, a sadiay ‘nasursuruan iti isuamin a kinasirib dagiti taga-Egipto’ ken “mannakabalin idi iti sasao ken ar-aramidna.” (Aramid 7:20-22) Iti sabali pay nga 40 a tawen, nagnaed idiay Madian. Sadiay a napatanorna dagiti naespirituan a galad a kasapulanna a mangidalan iti ili ni Jehova. Kamaudiananna, iti 40 a tawen indauluan ken immatonan ni Moises dagiti Israelita. Ngem ita, inkeddengen ni Jehova a ni Josue, saan a ni Moises, ti mangidalan iti nasion a bumallasiw iti Karayan Jordan sa sumrek iti Naikari a Daga.​—Deuteronomio 31:3.

No kasta, nayebkas ti Baro a Lubong a Patarus ti umiso a kaipapanan ti Deuteronomio 31:2. Saanen nga agtultuloy ni Moises a mangidaulo iti Israel, saan a gapu iti pisikal a kinakapsut, no di ket saanen a pinalubosan ni Jehova a mangidaulo.