ELCANA

[Ti Dios Nangpataud].

1. Maysa a Levita, anak ti rebelioso a ni Kore; isu ken ti kakabsatna a da Asir ken Abiasaf ket saanda a linak-am ti napagteng ni amada. (Ex 6:24; Nu 26:11) Mabalin nga isu ti Elcana a nadakamat iti 1 Cronicas 6:23.

2. Ti maikadua kadagiti uppat a Levita a Cohatita a napanaganan iti Elcana ken nailista iti Cronicas. Naikuna nga isu ti ama da Amasai ken Ahimot, ket agparang nga isu ti anak ni Joel.​—1Cr 6:25, 36.

3. Ti maikatlo kadagiti Levita a nadakamat iti ngato; nalabit anak ni Mahat.​—1Cr 6:26, 35.

4. Ti anak ni Jeroham ken ama ni Samuel a mammadto, ken ti dadduma pay nga annak a lallaki ken babbai. Agnanaed idi ni Elcana idiay Rama ti kabambantayan a rehion ti Efraim. Isu a naawagan iti Efraimita, nupay isu ket Levita no maipapan iti kapuonanna. (1Sm 1:1; 1Cr 6:27, 33, 34) Kaugalian idi ni Elcana ti mapan a tinawentawen idiay Silo “tapno iruknoyna ti bagina ken tapno agisakripisio ken Jehova.” Addaan iti dua nga assawa, da Anna ken Penina. Nupay nagtalinaed a lupes ni Anna, inayat latta ni Elcana ken pinadpadasna a liwliwaen iti kinalupesna. Idi agangay, kas sungbat iti kararag ni Anna, binendisionan ida ni Jehova babaen ti pannakayanak ni Samuel ken iti tallo pay nga annak a lallaki ken dua nga annak a babbai kalpasanna.​—1Sm 1:2, 3, 5, 8, 19; 2:21.

5. Levita nga inapo ti maysa a Berekias.​—1Cr 9:16.

6. Maysa kadagiti Korita, a nalawag nga agnanaed idi iti teritoria ti Benjamin ken “immay ken David idiay Siclag bayat nga isu mapengpengdan pay laeng idi gapu ken Saul.”​—1Cr 12:1, 2, 6.

7. Maysa kadagiti agay-aywan iti ruangan maipaay iti Lakasa idi inyakar dayta ni David idiay Jerusalem manipud iti balay ni Obed-edom; mabalin nga isu met laeng daydiay Num. 6.​—1Cr 15:23, 25.

8. Maysa nga opisial a ti saadna ket sumaruno ken Ari Acaz ti Juda ken pinapatay ni Zicri, maysa a nabileg a lalaki ti Efraim, idi a ni Peca nga ari ti Israel rinubbuotna ti Juda.​—2Cr 28:6, 7.