Dagiti Saludsod Manipud Kadagiti Managbasa

Idi nangan dagiti soldado ni Saul iti karne agraman ti dara, apay a saanda a napapatay, idinto ta dayta ti dusa a naibilin iti Linteg ti Dios?

Sinalungasing dagitoy a lallaki ti linteg ti Dios maipapan iti dara, ngem mabalin a naipakitaanda iti asi gapu ta adda panagraemda iti dara, nupay rumbeng a naan-anepda koma iti panangipakita ti kasta a panagraem.

Usigenyo ti kasasaad. Makigubgubat dagiti Israelita nga ipanguluan da Ari Saul ken ti anakna a lalaki a ni Jonatan kadagiti Filisteo. Iti maysa a gundaway idi a ‘dagiti tattao ti Israel naparigatda’ iti pannakigubat, sidadarasudos ni Saul a nagsapata a dagiti tattaona rumbeng a di mangan agingga a di maparmek dagiti kabusor. (1 Samuel 14:24) Di nagbayag namataud ti parikut ti sapatana.

Mangab-abak dagiti tattaona iti nainget a dangadang, ngem adda makadangran nga epekto ti nakaro a panangikagumaanda. Agkakapsutdan gapu iti bisin. Aniat’ inaramidda iti dayta nakaay-ay-ay a kasasaad? “Silalagaw a nagdardaras dagiti tattao iti samsam ket nangala[da] kadagiti karnero ken bakbaka ken ur-urbon dagiti baka ket pinartida ida iti daga, ket dagiti tattao kinnanda ida agraman ti dara.”​—1 Samuel 14:32.

Panagsalungasing dayta iti linteg ti Dios maipapan iti dara, kas imbaga ti dadduma kadagiti tattao ni Saul, a kunkunada: “Adtoy! Dagiti tattao agbasbasolda iti maikaniwas ken Jehova ta mangan[da] agraman ti dara.” (1 Samuel 14:33) Wen, kuna ti Linteg a no maparti dagiti animal, masapul a maibukbok ti dara sakbay a kanen ti karne. Saan a kalikaguman ti Dios ti nainget a panangibukbok ti dara. Babaen ti panangsurot kadagiti nainkalintegan a pamay-an ti panangibukbok, maiparangarang dagiti adipenna ti panagraem iti pateg ti dara. (Deuteronomio 12:15, 16, 21-25) Mausar ti dara ti animal kas daton iti altar, ngem di mabalin a sidaen. Maipusay ti mangiranta a mangsalungasing, ta naibaga kadagiti tattao ti Dios: “Dikayto mangan iti dara ti uray ania a lasag, ta ti biag ti isuamin a lasag isu ti darana. Siasinoman a mangan iti dayta maipusayto.”​—Levitico 17:10-14.

Inranta aya a salungasingen dagiti soldado ni Ari Saul ti Linteg? Impakitada kadi ti naan-anay a panangilaksid iti linteg ti Dios maipapan iti dara?​—Idiligyo ti Numeros 15:30.

Saantay a maikuna a kasta. Kuna ti rekord a ‘nagparti[da] kadagiti animal iti daga ket nanganda agraman ti dara.’ Isu a mabalin nga adda gandatda a mangiparukpok ti dara. (Deuteronomio 15:23) Ngem, gapu ta agkakapsutda unayen gapu iti bisin, didan imbitin dagiti naparti ken napaturay a maubosan ti dara. Pinartida dagiti karnero ken baka “iti daga,” a mabalin a mangtungday iti pannakaibukbok ti dara. Ket sidadaras a nangiwada ti karne kadagiti naparti a mabalin nga adda pay laeng darana. Gapuna, uray pay sipapanunotda iti panagtulnog iti linteg ti Dios, dida sinurot iti umiso wenno kalalainganna a pamay-an.

Kas banagna ‘nangan dagiti tattao agraman ti dara,’ a nalawag a basol. Nabigbig ni Saul daytoy ket nagbilin a maipatulid ti maysa a dakkel a bato iti yanna. Binaonna dagiti soldado: “Mangyeg kaniak, tunggal maysa kadakayo, ti bakana ken, tunggal maysa, ti karnerona, ket partienyo ida ditoy ken kanenyo, ket dikayo agbasol iti maibusor ken Jehova iti pannanganyo agraman ti dara.” (1 Samuel 14:33, 34) Nagtulnog dagiti nakabasol a soldado, ket “nangbangon ni Saul iti maysa nga altar ken Jehova.”​—1 Samuel 14:35.

Ti panangparti kadagiti animal iti rabaw ti bato nalabit agbanag iti nawadwad a pannakaibukbok ti dara. Masapul a kanen ti karne dagiti animal nga adayo iti pinagpartian. Mabalin nga inusar ni Saul ti dadduma kadagiti naibukbok a dara iti altar idi dimmawat ti kaasi iti Dios maipaay kadagidiay nagbasol. Pinakitaan ni Jehova ida iti asi, nalabit gapu ta ammona ti adda a gandat dagiti soldado nupay agkakapsut ken mabisinda unay. Mabalin nga inkonsiderar met ti Dios a ti sidadarasudos a panagsapata ni Saul ti nangiduron kadagiti tattaona iti dayta nakalkaldaang a kasasaad.

Ipakita daytoy a salaysay a ti di ninamnama a kasasad saan nga isut’ pambar iti panangilaksid iti linteg ti Dios. Rumbeng a dayta met ti tumulong kadatayo a mangtingiting ti kinapateg ti naannad a panagpanunot sakbay nga agsapata, ta ti dinadarasudos a panagsapata mamataud kadagiti parikut kadatayo a mismo ken kadagiti sabsabali.​—Eclesiastes 5:4-6.