FEATURE
Tiempo ni David
NI David nga anak ni Jesse ket nalaing a musikero, dumadaniw, mannakigubat, ken estadista. Ngem ti kinalatak ni David iti Kasuratan ket nangnangruna a maigapu iti relasionna iti Dios. Isu inawagan ni Jehova kas “maysa a lalaki a naanamongan iti pusok.”—Ara 13:22; 1Sm 13:14.
Ti Dios pinilina ni David kas masanguanan nga ari ti Israel idi isu maysa laeng nga agtutubo a pastor. Di nagbayag kalpasan dayta, naan-anay a nagkammatalek ken Jehova ket situtured a sinangona ken pinapatayna ti Filisteo a higante a ni Goliat. Nupay kasta, nagimon ni Ari Saul iti ad-adda a panaglatak ni David, ket napilitan ni David nga agbiag kas maysa a pugante. Bayat daytoy a panawen ti pannakasuot ni David, nangputar iti adu a naimpusuan a salmo, a pakaliwliwaan dagiti managbasa iti Biblia uray ita.
Idi naisaaden nga ari kamaudiananna, addaan ni David iti paset kadagiti napateg a paspasamak iti pakasaritaan ti nasion: Dimmanon dagiti beddeng ti Israel kadagiti naikari a pagpatinggaanda. Naipan idiay Jerusalem ti lakasa ti tulag. Naikur-it dagiti plano maipaay iti nadayag a templo ni Jehova. Napateg met unay ti tulag a kari ti Dios ken David a mangibangon iti permanente nga agturay iti naarian a liniana. (2Sm 7:12-16) Daytoy a tulag ti mangiturong iti panagturay ni Jesu-Kristo iti intero a daga.—Ro 1:3; Lu 1:32.
MAPA: Nasapa a Paset ti Biag ni David
MAPA: Idi Ari ni David
Let-ang ti Juda. Naglemmeng ni David kadagiti rukib ken lengngan kadagitoy a lugar tapno malibasanna ni Ari Saul
Kalsada iti nagkauna a Hebron, ti siudad a nakapulotan ni David kas ari babaen kadagiti lallaki ti Juda
Siudad ni David (iti abagatan ti nagsaadan ti templo) kas makita iti agdama; manipud ditoy a nagturay ni David kas ari iti 33 a tawen