ABISAG

Agtutubo a birhen manipud ili ti Sunem, iti amianan ti Jezrael ken Bantay Gilboa, nga adda iti teritoria ti Isacar. (Jos 19:17-23) “Napintas unay” ken pinili dagiti adipen ni David nga agbalin a manangtaripato ken kadua ti ari bayat ti maudi nga al-aldawna.​—1Ar 1:1-4.

Agarup 70 ti tawenen ni David (2Sm 5:4, 5), ket saan unayen a pumudot ti bagina gapu ta kumapuyen. No aldaw agserbi kenkuana ni Abisag, nga awan duadua a mamagraniag iti aglawlaw babaen ti kinasalibukag ken kinapintas ti kinaagtutubona, ket no rabii ‘agidda iti saklot ti ari’ tapno papudotenna, ngem “ti met laeng ari saan a nakidenna kenkuana.” Nupay kasta, ipasimudaag ti tignay nga imparangarang ni Solomon mainaig ken Abisag idi agangay nga isu imbilangna kas asawa wenno kamalala ni David. Gapu iti dayta, kas paglintegan iti kadaanan a Daya, isu tagikuaen ti pagtawiden ni David inton natayen.

Ti salaysay maipapan ken Abisag ket sarunuen a mismo ti salaysay maipapan iti gandat daydiay nalabit kalakayan a sibibiag nga anak ni David a ni Adonias a panangagawna iti trono, ken agparang a kasta ti pannakaurnos ti salaysay tapno matarusan ti simmaganad a tignay ni Adonias bayat ti panagturay ni Solomon. Kalpasan ti pannakaitrono ni Solomon, impaayanna ni Adonias iti pammakawan nga addaan kondision. Ita inallukoy ni Adonias ti ina ni Solomon, ni Bat-seba, a kiddawenna ken Solomon nga itedna kenkuana ni Abisag kas asawana. Gapu ta kombinsido a ti kiddaw ni Adonias ket saan laeng a gapu iti kinapintas ni Abisag no di ket impasimudaagna ti nasikap a panagregget a mangpatibker iti panangikuna ni Adonias nga isu ti agtawid iti trono, nakaunget ni Solomon, binabawina ti panangpakawanna ken Adonias, ken imbilinna a mapapatay. (1Ar 2:13-25) Awanen ti kanayonan a pannakadakamat maipapan ken Abisag, ngem nalabit nagtultuloy kas maysa kadagiti assawa wenno kamalala ni Solomon.​—Kitaenyo ti ADONIAS Num. 1.