ABEL-MEHOLA
[Pagay-ayusan ti Danum iti Panagsasala].
Lugar a pagnanaedan ni Eliseo, a nakasarakan kenkuana ni Elias nga agar-arado ken nangpulotanna kenkuana kas suno a mammadto.—1Ar 19:16-19.
Sakbay pay dayta naitampoken ti Abel-mehola iti salaysay maipapan ti pannakaparmek dagiti Midianita babaen iti bassit a buyot ni Gideon. Naipadamag nga idi nagkakaribuso dagiti Midianita nakadanonda pay “agingga iti wayaway ti Abel-mehola iti sibay ti Tabbat.”—Uk 7:22.
Gapu ta adda ti Tabbat iti daya ti Karayan Jordan, sipud pay 1951 adda dagiti mangipappapilit a ti Abel-mehola isu ti Tell el-Maqlub nga adda iti Wadi el-Yabis. Ti kanayonan nga argumento a mangpaneknek iti daytoy ket ti panagsardeng ni Elias idiay Abel-mehola idi pimmanaw manipud Horeb ket pinulotanna ni Eliseo ken nabilin nga agtultuloy nga agdaliasat idiay “let-ang ti Damasco” tapno pulotanna ni Hazael kas ari iti Siria. (1Ar 19:15) Ti kangrunaan a kalsada idi nagkauna tiempo manipud Horeb agingga idiay Damasco ket adda iti daya ti Jordan, nupay masansan a sakupen idi dagiti managakar-akar a tattao daytoy a ruta.
Nupay kasta, ipakita ti salaysay maipapan iti panangkamat ni Gideon kadagiti Midianita nga addada ketdi iti laud (imbes nga iti daya) ti Jordan sigun iti ipasimudaag ti Uk-ukom 7:22. (Kitaenyo ti Uk 7:24.) Ket no maipapan iti panagdaliasat ni Elias iti Let-ang ti Damasco, ipakita ti rekord a saan a napasamak a dagus daytoy no di ket ti sunona a ni Eliseo ti nangaramid iti dayta idi agangay. (1Ar 19:15-19; 2Ar 8:7-13) Gapu itoy, agtultuloy a kunaen ti sumagmamano a libro ti geograpia nga adda dayta iti laud imbes nga iti daya ti Jordan. (The Geographical and Topographical Texts of the Old Testament, ni J. Simons, Leiden, 1959; The Geography of the Bible, ni D. Baly, 1957; ken ti Atlas of the Bible, ni L. H. Grollenberg, 1956) Da Jerome ken Eusebius kadagiti immuna a siglo ti Kadawyan a Panawen agpadpada a kunaenda a ti Abel-mehola isu ti disso nga adda iti 10 a Romano a milia (15 km; 9 mi) iti abagatan ti Bet-sean (laud ti Jordan). Kunaen ti The Land of the Bible, ni Y. Aharoni: “Sigsigurado itan a kunaen a ti Abel-mehola isu ti Tell Abu Sus nga adda iti [laud nga] igid ti Jordan, 15 km. iti abagatan ti Bet-sean.” (Impatarus ken inurnos ni A. Rainey, 1979, p. 313) Ti kabangibang a tanap ti Bet-sean ket maiyanatup ti kalawana kas lugar a pagtalonan.—Idiligyo ti 1Ar 19:19.
Yantangay ti Abel-mehola idi agangay ket nagbalin a paset ti maikalima nga administratibo a distrito ni Solomon ken nailanad a kadua ti dadduma a lugar iti laud ti Jordan, daytoy ti kanayonan pay a mangpaneknek nga adda dayta iti laud ti Jordan. (1Ar 4:12) Nabatad a dayta ti lugar a pagnanaedan ni Adriel a Meholatita, manugang-a-lalaki ni Saul. (1Sm 18:19; 2Sm 21:8) Nalabit nagtaud daytoy nagan nga Abel-mehola kadagiti panagsasala iti piesta bayat dagiti rambak ti panagani.