Ti Organisasion ni Jehova Supsuportaranna ti Ministerioyo

“Nakitak ti sabali pay nga anghel a tumaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag.” ​—APOCALIPSIS 14:6.

1. Kasano a masubsubok dagiti Saksi ni Jehova, ket apay a nakalasatda?

APAY a nagpateg a bigbigentayo ti akem ti nailangitan nga organisasion ni Jehova iti panangsuportarna iti Nakristianuan a ministerio? Bueno, maikaskasaba aya dagiti Saksi ni Jehova ti naimbag a damag ti Pagarian ti Dios iti intero a naranggas a lubong no awan ti tulong dagiti nailangitan a buyot ni Jehova? Maysa a siglon a mangaskasaba dagiti Saksi iti baet ti nakaro a nasionalismo, totalitariano a sistema politikal, sangalubongan a gubgubat, ken nadumaduma a pakarigatan. No awan ti tulong ni Jehova, malasatan aya dagiti Saksi ti sangalubongan a panangirurumen, panangidumduma, ken masansan naranggas a panangidadanes maibusor kadakuada?​—Salmo 34:7.

Ilalasat iti Laksid ti Sangalubongan nga Ibubusor

2. Ania ti pagpadaan dagiti pudno a Kristiano idi umuna a siglo ken dagiti pudno a Kristiano itatta?

² Iti daytoy maika-20 a siglo, dagiti kabusor, agpadpada relihioso ken politikal, us-usarenda amin a posible a tubeng, legal man wenno saan, iti panangikagumaanda a lapdan wenno pasardengen ti trabaho ni Jehova. Naidaddadanes, napadpadakes, narabrabngis, ken naparpardaya dagiti Kristiano a kakabsat​—adu ti napapatay pay ketdi​—masansan iti panangsugsog dagiti klero ti Babilonia a Dakkel. Kas kadagidi immuna a Kristiano, maikuna a “pudno a no maipapan itoy a sekta naammuan[tayo] a masupsuppiat iti isuamin a lugar.” Kas kadagiti klero a Judio idi tiempo ni Kristo a sirurungsot a nangikagumaan a mangpasardeng iti ministeriona, kasta met a dagiti klero ken apostata, agraman dagiti politikal a kamalalada, padpadasenda a pasardengen ti dakkel nga edukasional a trabaho a panangasaba ti ili ni Jehova.​—Aramid 28:22; Mateo 26:59, 65-67.

3. Ania ti maadaltayo iti kinatarnaw ni Henryka Żur?

³ Alaentay a pagarigan ti napasamak idiay Poland idi Marso 1, 1946. Ni Henryka Żur, maysa a 15-anyos a babai a Saksi nga agnanaed idiay Chełm, kimmuyog iti maysa pay a Saksi, maysa a kabsat a lalaki, tapno sarungkaranda dagiti interesado a tattao iti kabangibang a purok. Tiniliw ida dagiti miembro ti maysa a grupo dagiti soldado a Katoliko a maaw-awagan Narodowe Siły Zbrojne (National Armed Forces). Nakaro ti panangkabkabilda iti kabsat a lalaki ngem nakalasat. Saan a kasta ti napasamak ken Henryka. Sikakas-ang a tinutuokda iti adu nga oras bayat nga inkagumaanda a piliten a manguros. Kinuna ti maysa kadagiti nangparigat kenkuana: “Panunotem ti aniaman a kayatmo a panunoten, basta manguroska. Ta no saan, paltogandaka!” Kimmapuy kadi ti kinatarnawna? Saan. Dagiti relihioso a takrot inulodda agingga iti kaasitgan a kabakiran sada pinaltogan. Ngem nagballigi! Saanda a narakrak ti kinatarnawna.a​—Roma 8:35-39.

4. Kasano a padpadasen dagiti napolitikaan ken narelihiosuan nga elemento a lapdan ti pannakaikaskasaba ti Pagarian?

⁴ Iti nasurok a sangagasut a tawenen, mairurrurumen ken marabrabngis dagiti adipen ti Dios iti daytoy moderno a panawen. Gapu ta dagiti Saksi ni Jehova ket saan a paset ken saanda a kayat ti agbalin a paset dagiti nalatak a relihion ni Satanas, isuda ti puntiria ti asinoman a manangidumduma a kritiko wenno panatiko a bumusbusor. Siraranggas nga at-atakaren ida dagiti napolitikaan nga elemento. Adu a Saksi ti namartir gapu iti pammatida. Padpadasen uray dagiti makunkuna a demokrasia a lapdan ti pannakaikaskasaba ti naimbag a damag. Idi 1917 idiay Canada ken Estados Unidos, babaen ti panangsugsog dagiti klero, naidarum dagiti Estudiante ti Biblia, kas awag idi kadagiti Saksi, iti panangituang iti gobierno. Di nainkalintegan a naibalud dagiti opisial ti Watch Tower Society, a sada la naabsuelto idi kamaudiananna.​—Apocalipsis 11:7-9; 12:17.

5. Ania a sasao ti agserbi a pammaregta kadagiti adipen ni Jehova?

⁵ Us-usaren ni Satanas amin a pamay-an a mabalinna nga aramaten iti panangpadasna a mangpasardeng iti trabaho a panangasaba dagiti kakabsat ni Kristo ken dagiti nasungdo a kakaduada. Ngem, kas ipakita ti nagadu a kapadasan, dagiti pangta, pammutbuteng, pisikal a kinaranggas, pagbaludan, kampo konsentrasion, ken uray ti ipapatay saanda a napagulimek dagiti Saksi ni Jehova. Ket pudno daytoy iti intero a historia. Maulit-ulit nga agserbi a pammaregta ti sasao ni Eliseo: “Dika agbuteng: ta ad-aduda dagiti adda kadatayo ngem kadagiti adda kadakuada.” Ti maysa a makagapu, ad-adu dagiti matalek nga anghel ngem kadagiti buyot ti Diablo!​—2 Ar-ari 6:16; Aramid 5:27-32, 41, 42.

Bendisionan ni Jehova ti Naregta a Panangasaba

6, 7. (a) Ania a panagregget ti naaramid idi tapno maikaskasaba ti naimbag a damag? (b) Ania a makagunggona a panagbalbaliw ti naaramid nangrugi idi 1943?

⁶ Kabayatan ti maika-20 a siglo, us-usaren dagiti Saksi ni Jehova ti adu a dinur-asan ti teknolohia tapno rumang-ay ken pumardas ti dakkel a trabaho a panangasaba sakbay nga umay ti panungpalan. Idi 1914, ni Pastor Russell, ti immuna a presidente ti Watch Tower Bible and Tract Society, insayangkatna ti damo unay a pannakausar dagiti slide ken pelikula, a maigiddan a mapatokar iti ponograpo dagiti plaka a naglaon iti naibatay-Biblia a komentario, iti walo-oras a Biblikal a pabuya a naawagan “The Photo-Drama of Creation.” Pinagsiddaawna dagiti nakabuya iti adu a pagilian iti daydi a tiempo. Idi agangay, idi dekada 1930 ken 1940, nagdinamag dagiti Saksi gapu iti panangasabada iti binalaybalay, a tugotda dagiti mabitbit a ponograpo a pangipatokaranda kadagiti naiplaka a Biblikal a palawag ni J. F. Rutherford, ti maikadua a presidente ti Sosiedad.

⁷ Idi 1943 adda naaramid a natured nga addang iti panangimanehar ni Nathan H. Knorr, ti maikatlo a presidente ti Sosiedad, idi a naikeddeng ti pannakaipasdek ti maysa nga eskuelaan para kadagiti ministro iti tunggal kongregasion. Masanay dagiti Saksi a mangasaba ken mangisuro iti binalaybalay a saanda nga agusar iti ponograpo. Sipud idin, naorganisar dagiti dadduma pay nga eskuelaan a pangsanayan kadagiti misionero, amin-tiempo a payunir a ministro, panglakayen iti kongregasion, ken dagiti responsable a manangaywan kadagiti sanga ti Watch Tower Society. Ania ti resultana?

8. Kasano nga impakita dagiti Saksi ti dakkel a pammati idi 1943?

⁸ Idi 1943, kabayatan ti Gubat Sangalubongan II, adda laeng 129,000 a Saksi nga aktibo iti 54 a pagilian. Ngem, addaanda iti pammati ken determinasion a matungpal ti Mateo 24:14 sakbay nga umay ti panungpalan. Kombinsidoda a paiwaragawag nga umuna ni Jehova ti napateg a pammakdaar a mensahe sakbay a dumteng dagiti agsasaruno a pasamak a mamagpatingga iti daytoy rinuker a sistema ti bambanag. (Mateo 24:21; Apocalipsis 16:16; 19:11-16, 19-21; 20:1-3) Nasupapakan kadi ti panagreggetda?

9. Ania ti mangipakita a rimmang-ay ti trabaho a panangasaba?

⁹ Adda itan di nakurkurang ngem 13 a pagilian nga addaan iti nasurok a 100,000 nga aktibo a Saksi iti tunggal maysa. Dominado ti Iglesia Katolika ti sumagmamano kadagitoy a pagilian. Ngem, usigenyo ti kasasaad. Addaan ti Brazil iti agarup 450,000 nga agibumbunannag iti naimbag a damag, ken nasurok a 1,200,000 ti timmabuno iti Panglaglagip iti ipapatay ni Kristo idi 1997. Ti Mexico ti maysa pay nga ehemplo, nga addaan iti agarup 500,000 a Saksi ken nasurok a 1,600,000 ti timmabuno iti pannakarambak ti Memorial. Dagiti dadduma pay a Katoliko a pagilian ket Italy (agarup 225,000 a Saksi), Francia (agarup 125,000), España (nasurok a 105,000), ken Argentina (nasurok a 115,000). Idiay Estados Unidos, a ti kaaduan ket Protestante, Katoliko, ken Judio, adda agarup 975,000 a Saksi ken nasurok a 2,000,000 ti timmabuno iti Memorial. Wen, nakaad-adu ti pumampanaw iti Babilonia a Dakkel, ti sangalubongan nga imperio ti ulbod a relihion, agraman kadagiti misterioso a sursurona ket agturturongdan iti nalawag ken mapangnamnamaan a kari ti Dios a “baro a langlangit ken maysa a baro a daga.”​—2 Pedro 3:13; Isaias 2:3, 4; 65:17; Apocalipsis 18:4, 5; 21:1-4.

Iyaataday Kadagiti Kasapulan Dagiti Tattao

10. Kasano a nagbalbaliw dagiti kasasaad iti dadduma a lugar?

¹⁰ Adu kadagidiay nagturong ken Jehova babaen ken Kristo Jesus ti nasarakan kadagiti balbalay. (Juan 3:16; Aramid 20:20) Ngem maus-usar dagiti dadduma pay a pamay-an. Nagbaliwen ti tiempo, ket gapu kadagiti kasasaad ti ekonomia, adu a babbai ti agtartrabaho itan iti ruar ti pagtaengan. Masansan nga iti lawlawasna, manmano dagiti tao a madanon kadagiti pagtaenganda. Gapuna, nakibagay dagiti Saksi ni Jehova iti kasasaad. Kas ken Jesus ken dagiti nagkauna nga adalanna, mapanda kadagiti lugar ken iti oras a pakasarakan kadagiti tattao.​—Mateo 5:1, 2; 9:35; Marcos 6:34; 10:1; Aramid 2:14; 17:16, 17.

11. Sadino ti pangaskasabaan ita dagiti Saksi ni Jehova, ket ania ti resultana?

¹¹ Siaannad nga ipampamuspusan dagiti Saksi a kasabaan dagiti tattao kadagiti nalalawa a paradaan, shopping mall, pabrika, opisina ken establisimiento, eskuelaan, estasion dagiti polis, paggasolinaan, otel ken restawran, ken kadagiti lansangan. Kinapudnona, mangasabada iti sadinoman a pakasarakan kadagiti tattao. Ket no adda dagiti tao kadagiti pagtaenganda, itultuloy dagiti Saksi a sarungkaran ida sadiay. Babaen iti kastoy a pannakibagay ken praktikal a pamay-an, umad-adu dagiti maiwarwaras a literatura ti Biblia. Masarsarakan dagiti arig karnero a tattao. Adu dagiti kabbaro a mayad-adalan iti Biblia. Nasurok a lima ket kagudua a milion a boluntario a ministro ti sireregta a mangitungtungpal iti kadakkelan a trabaho a panangisuro iti pakasaritaan ti tao! Maysakayo kadi kadagiti addaan iti daytoy a pribilehio?​—2 Corinto 2:14-17; 3:5, 6.

Ania ti Mangtigtignay Kadagiti Saksi ni Jehova?

12. (a) Kasano nga isursuro ni Jehova ti ilina? (b) Ania ti epekto daytoy a panangisuro?

¹² Ania ti akem ditoy ti nailangitan nga organisasion? Impadto ni Isaias: “Amin nga annakmo tattaodanto a sinursuruan ni Jehova, ket ti talna dagiti annakmo dakkelto.” (Isaias 54:13, NW) Isursuro ni Jehova daytoy sangalubongan a nagkaykaysa a panagkakabsat babaen ti makitkita nga organisasionna ditoy daga​—kadagiti Kingdom Hall, kadagiti kombension, ken kadagiti asamblea. Panagkaykaysa ken talna ti bungana. Ti panangisuro ni Jehova nangpataud kadagiti naisalsalumina a tattao, a nasursuruan nga agayat iti maysa ken maysa ken iti kaarrubada a kas iti bagbagida, a saan ket a manggura kadagiti kaarrubada, sadinoman ti pagnanaedanda iti daytoy mamagsisina ken nabingaybingay a lubong.​—Mateo 22:36-40.

13. Kasanotay a masigurado nga iturturong dagiti anghel ti trabaho a panangasaba?

¹³ Ayat ti mangtigtignay kadagiti Saksi ni Jehova nga agtultuloy a mangasaba iti baet ti kinaaleng-aleng wenno panangidadanes. (1 Corinto 13:1-8) Ammoda a maimatmatonan manipud langit ti makaispal-biag a trabahoda, kas kunaen ti Apocalipsis 14:6. Ania ti mensahe a maiwarwaragawag iti panangiturong dagiti anghel? “Agbutengkayo iti Dios ket ipaayyo kenkuana ti dayag, agsipud ta ti oras ti panangukomna dimtengen, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.” Ti panangikasaba iti naimbag a damag ti Pagarian itan-okna ti nagan ni Jehova. Maaw-awis dagiti tattao a mangidaydayaw iti Dios a Namarsua, saan a kadagiti parsua ken iti naiparparna nga ebolusion. Ket apay a naganat unay ti trabaho a panangasaba? Agsipud ta dimtengen ti oras ti panangukom​—panangukom iti Babilonia a Dakkel ken amin a dadduma pay a paset ti makitkita a sistema ti bambanag ni Satanas.​—Apocalipsis 14:7; 18:8-10.

14. Siasino ti nairaman iti daytoy dakkel a kampania a panangisuro?

¹⁴ Awan ti dedikado a Kristiano a maipuera iti daytoy a trabaho a panangasaba. Dagiti naespirituan a panglakayen ti mangidaulo iti kongregasion a mapan mangasaba. Okupado unay iti daytoy a trabaho dagiti nasanay a payunir. Dagiti nareregta nga agibumbunannag iti mensahe ti Pagarian isaksaknapda ti mensahe iti amin a suli ti daga, sumagmamano man wenno adu nga oras ti kabaelanda a busbosen iti panangasaba.​—Mateo 28:19, 20; Hebreo 13:7, 17.

15. Ania ti mangipamatmat iti epekto ti panangaskasaba dagiti Saksi ni Jehova?

¹⁵ Mapalpaliiw kadi ti lubong amin daytoy a panagregget? Wen. Ti simple a pammaneknek isu ti masansan a pannakadakamat dagiti Saksi ni Jehova kadagiti programa iti TV ken kadagiti pagiwarnak. Masansan nga itampok dagitoy ti kinapinget ken determinasiontayo a mangdanon kadagiti amin a tao. Wen, mapalpaliiwda ti regta ken naynay a kaaddatayo, uray no di awaten ti kaaduan a tattao ti mensahe ken dagiti mensahero!

Ti Regtatayo a Mangiringpas iti Panangasaba

16. Ania a kababalin ti rebbeng a maiparangarang iti limitado a natda a panawen?

¹⁶ Ditay ammo no kasano pay kabayag ti tiempo a nabatbati iti daytoy agdama a sistema ti bambanag, ken saanen a kasapulan pay nga ammuentayo no la ket nadalus ti motibotayo nga agserserbi ken Jehova. (Mateo 24:36; 1 Corinto 13:1-3) Ngem ammotayo a tapno maiparangarang ti ayat, pannakabalin, ken kinahustisia ni Jehova, masapul a maikaskasaba nga “umuna” ti naimbag a damag. (Marcos 13:10) Gapuna, uray no mano a tawenen a segseggaantayo ti panungpalan daytoy nadangkes, nakillo, ken naranggas a lubong, masapul a sireregta nga itungpaltayo ti dedikasiontayo sigun iti kasasaadtayo. Mabalin a nataengan wenno masaksakittayo, ngem makapagserbitay pay laeng ken Jehova a buyogen ti regta nga adda kadatayo idi kabambannuagantayo wenno idi nasalun-attayo pay. Mabalin a ditay kabaelanen ti mangbusbos iti adu a tiempo iti ministerio a kas idi, ngem sigurado a kabaelantayo a manteneren ti kalidad ti datontayo a panangidaydayaw ken Jehova.​—Hebreo 13:15.

17. Mangisalaysaykayo iti makaparegta a kapadasan a makatulong kadatayo amin.

¹⁷ Gapuna, agtutubotay man wenno nataengan, agregtatayo ken iranudtayo kadagiti amin a makasaotayo ti naimbag a mensahe maipapan iti baro a lubong. Tuladentay koma ti managbabain a 7-anyos nga ubing a babai idiay Australia a kimmuyog ken nanangna idiay tiendaan. Nangngegna idiay Kingdom Hall no kasano kapateg iti amin ti panangasaba, isu a nangikabil iti dua a naibatay-Biblia a broshur iti bagna. Bayat nga adda ni nanangna iti pagbayadan, nagpukaw ti ubing. Idi sinapul ni nanangna, nakitana daytoy a mangituktukon iti broshur iti maysa a babai! Immasideg ti ina tapno agpadispensar iti aniaman a panangdisturbo ti anakna. Ngem siaayat nga innala ti babai ti broshur. Idi duduadan iti anakna, sinaludsod ti ina no kasano a naituredna nga inasitgan ti tao a dina am-ammo. “Kinunak laeng, Maysa, Dua, Tallo! Ket napanakon!”

18. Kasanotay a maipakita ti nagsayaat nga espiritu?

¹⁸ Kasapulantay amin ti espiritu a kas iti adda iti dayta nga ubing idiay Australia, nangruna tapno maidanontayo ti naimbag a damag kadagiti ditay am-ammo wenno uray kadagiti opisial. Mabalin a maamaktayo di la ket ta saandatayo a denggen. Ditay koma liplipatan ti kinuna ni Jesus: “Dikay maringgoran no kasano wenno no ania ti sawenyonto kas panangikalintegan wenno no anianto ti kunaenyo; ta ti nasantuan nga espiritu isuronakayto iti dayta met laeng nga oras kadagiti bambanag a rebbengyo a sawen.”​—Lucas 12:11, 12.

19. Kasano ti panangmatmatyo iti ministerioyo?

¹⁹ Isu nga agtalekkayo iti tulong ti espiritu ti Dios bayat a siaayat nga idanonyo ti naimbag a damag kadagiti tattao. Riniwriw dagiti agtalek kadagiti masansan a di maikari a lallaki ken babbai nga adda ita ngem agpukaw inton bigat. Agtalektayo ken Jehova ken iti nailangitan nga organisasionna​—ken Kristo Jesus, kadagiti nasantuan nga anghel, ken kadagiti napagungar a napulotan a Kristiano​—ta sibibiagda iti agnanayon! Gapuna, laglagipenyo: “Ad-aduda dagiti adda kadatayo ngem kadagiti adda kadakuada”!​—2 Ar-ari 6:16.

[Footnote]

Kasanoyo a Sungbatan?

◻ Ania ti akem ti nailangitan nga organisasion ti Dios iti pannakaispal ti ili ni Jehova?

◻ Ania a napolitikaan ken narelihiosuan nga elemento ti mangat-atakar kadagiti Saksi ni Jehova iti maika-20 a siglo?

◻ Kasano nga ibagaybagay dagiti Saksi ni Jehova ti ministerioda iti kalikaguman ti panawen?

◻ Ania ti mangtigtignay kadakayo a mangasaba?

[Ladawan iti panid 17]

Ni Henryka Żur

[Dagiti Ladawan iti panid 18]

Japan

Martinique

Estados Unidos

Kenya

Estados Unidos

Mangaskasaba dagiti Saksi ni Jehova iti sadinoman ken iti aniaman a tiempo a pakasarakan kadagiti tattao

[Ladawan iti panid 20]

Idi rugrugi daytoy a siglo, nausar dagiti ponograpo iti panangisaknap iti mensahe ti Pagarian