Graduasion ti Maika-85 a Klase ti Gilead Maysa a Naragsak nga Okasion
KALPASAN ti pannakaisibbo ti templo agarup 3,000 a tawen ti napalabasen, ni Salomon “imbaonna ti umili a mapan kadagiti pagtaenganda, a sirarag-o ken siaayat ti pusoda.” (2 Cronicas 7:10) Nagsayaat ti panangdeskribir dagidiay a sasao ti rikna ti nasurok 4,000 a tattao bayat a pumampanawdan iti Jersey City Assembly Hall dagiti Saksi ni Jehova idi Setiembre 11, 1988. Ti okasion? Ti graduasion ti maika-85 a klase ti Watchtower Bible School of Gilead.
Kalpasan ti kanta, nanglukat ti programa babaen iti naimpusuan a kararag manipud ken W. L. Barry, miembro ti Bagi a Manarawidwid. Ni T. Jaracz, a kameng met ti Bagi a Manarawidwid, ti immakto kas tsirman iti dayta nga aldaw. ‘Tapno daytoy nga okasion ti pudpudno a makapabang-ar ken makapabileg iti naespirituan,’ kuna ni Jaracz, ‘kasapulan ti espiritu ken pammendision ni Jehova.’ Pudno unay, napaneknekan dayta idi a nawaknitanen ti programa.
Kalpasan dagitoy pangabrasa a sasao, immawat dagiti nagturpos ti pammakada a balakad kadagiti agsasaruno nga ababa, praktikal a palpalawag. Ni R. L. Rains ti Bethel Committee ti nagsao nga immuna. Naibatay ti komentona manipud Genesis 12:1, 2, binagbagaan ni Rains dagiti estudiante: ‘Agbalinkay koma a bendision idiay pakaitudinganyo kas misionero.’ Ket kasanoda nga aramiden dayta? ‘Babaen ti kurso ti panagbiagyo apaman a makagtengkay sadiay,’ impaganetgetna. Kalpasanna intampokna dagiti dua a bambanag a makatulong ti dakkel unay: (1) Masapul a bigbigenda a kasapulanda ti panagaramid ti sumagmamano a panagbalbaliw idiay baro a pakaitudinganda; ken (2) rebbeng a salimetmetanda ti natalna a pannakirelasion kadagiti dadduma.
Iti nabara, makaparegta a pamay-an, sumaruno a nagpalawag ni J. E. Barr ti Bagi a Manarawidwid, nga insalaysayna kadagiti nagturpos ti tema a “Nayonam ti Pammatimi,” a naibasar iti Lucas 17:5. ‘Inaldaw a laglagipenyo,’ impatigmaan ni Barr, ‘dawaten ken Jehova a nayonanna ti pammatiyo.’ Masapul a laglagipenda koma a kanayon ti pudpudno a rason no apay nga imbaon ni Jehova ida iti nakaitudinganda. ‘Riknaenyo ti pannakabalin ti di makita agraman ti makitkita nga organisasion ti Dios a mangsupsuportar kadakayo a kanayon, aldaw ken rabii,’ inggunamgunam ni Barr. ‘Nikaanoman saan unay a masansan ti panagdawatyo iti karkararagyo, “Jehova, pangngaasim ta nayonam ti pammatik.”’
Natignay ti panagsegga idi inyanunsio ti tserman ti tema ti sumaganad nga agpalawag, ni F. D. Songer iti Factory Committee: “Naisalsalumina a Talek ken Naisangsangayan a Tulbek.” Inadaw ni Songer dagiti komentona manipud 1 Cronicas 9:26, 27 ken ti naibaga sadiay maipapan kadagiti Levita nga agaywan ti ruangan. ‘Ti saadda ket maysa a naisalsalumina a talek,’ inlawlawag ni Songer. Addaanda ti tulbek—ti aruaten a mangiyeb-ebkas ti mismo a pannakabalin a panangkontrol ti iseserrek kadagiti nasantuan a disso ti templo. Isuda ti mapagtalkan, a mapagpannurayanda a manglukat a binigat kadagiti ruangan. Kas pangserra, imbaga ni Songer kadagiti nagturpos: ‘Naikkankayo ti naisalsalumina a talek ken naisangsangayan a tulbek, ti kaiyariganna, nga isut’ pananglukatyo, a binigat kadagidiay sumsumrek kadagiti paraangan ti pudno a panagdaydayaw. Saluadanyo a naimbag dayta a talek ken usarenyo a simamatalek dayta a tulbek.’
Sumaganad, ni M. G. Henschel iti Bagi a Manarawidwid nagpalawag maipapan iti tema a “Salimetmetam a Pagwadan dagiti Nasayaat a Sao.” Babaen ti panangtukoyna iti 2 Timoteo 1:13, 14, ni Kabsat Henschel inlawlawagna a ti pammakada a balakad ni Pablo ken ni Timoteo ket: ‘Salimetmetam a pagwadan dagiti nasayaat a sao a nangngegmo kaniak, ket aywanam daytoy kas maysa a gameng, maysa a naikumit kenka.’ Dagiti nagraduar, immawatda met iti gameng. Bayat iti napalabas a lima a bulan, naadalda ti Biblia ken dagiti bambanag maipapan iti ministerio. ‘Daytoy a pannursuro, daytoy a pagwadan dagiti nasayaat a sao,’ inlawlawag ni Henschel, ‘ket maysa a banag nga inkumit ti Dios kadagiti im-imayo nga usarenyo, saan laeng nga agpaay iti bagiyo, no di ket agpaay kadagiti dadduma.’
Ania a dagiti pammakada a sasao a maipaay dagiti dua nga instruktor ti eskuelaan a maipaay kadagiti estudianteda? Ni J. D. Redford nagsao maipapan iti tema nga “Aminenyo dagiti Biddutyo.” Impabigbig ni Redford nga uray no ammotayo nga “agbidduttayo iti mamin-adu a daras,” no maibaga kadatayo a nagbidduttayo, ikalintegantayo dagiti bagbagitayo. (Santiago 3:2) ‘Ti di panangbigbig kadagiti bidduttayo ket kasla panangikuna a ditay agbiddut,’ kinuna ni Redford. Ti panangamin kadagiti bidduttayo ket dalan iti kinasirib. Kasano a kasta? Inlawlawag ti nagpalawag: ‘Awan ti siasinoman a makataginayon iti panagraem dagiti dadduma no ipilitna nga isut’ umiso uray no nalawagen nga isut’ biddut. Kasano nga agtalek ti siasinoman iti maysa a tao nga ammona manipud iti kapadasan a no maminsan isakripisiona pay ti kinapudno tapno maipakita laeng nga isu ket umiso? Ti panangamin iti biddut pabilgennatayo, mangipaay iti panagraem iti bagitayo met laeng. Ngem ti di panangaramid iti kasta ipakitana ti kinatakrut, ket pakapuyenna ti moraltayo.’ Ti panangiyaplikar kadagita a praktikal a balakad awan duadua a tulonganna dagiti nagraduar a makibagay a naimbag kadagiti dadduma.
Ni U. V. Glass, ti maysa nga instruktor ken registrar ti eskuelaan, ti nangibasar ti maudi a patigmaanna iti salaysay ti Biblia maipapan ken Gideon, nga inusar ni Jehova a nangispal iti Israel manipud ima dagiti Madianitas. (Ococom, kapitulo 6-8) Indemostra ni Gideon a ti panagtalek ni Jehova kenkuana ti umisot’ nakaikabilanna, ta idi kayat dagiti umili nga isut’ pagbalinen nga ari, isut’ nagmadi, a kunkunana: “Ni Jehova isu ti agturayto kadakayo.” (Oc-ocom 8:23) ‘Uray dakayo met,’ kuna ni Glass, ‘diyo kayat ti maitantan-ok. Napaneknekanyon ti bagbagiyo. Ngem di kayat a sawen daytoy a dakayo ti makidangdangadang. Ni Jehova ti mangbadbadang kadakayo.’
Ti maudi a nagpalawag iti agsapa ket isu ni A. D. Schroeder ti Bagi a Manarawidwid, ket nagbatad bayat ti panagsasaona a ti Gilead School ti nasinged unay iti pusona. Ken agpaay iti naimbag a rason—isut’ registrar idi naipasdek ti eskuelaan idi 1943. Binukel ni Kabsat Schroeder ti tema a “Matalekkayo Koma,” a naibatay iti 1 Corinto 4:2. Aniat’ ramanen ti kinamatalek? ‘Iladawan dayta a ti maysa napunno ti pammati kadagiti deklarasion ken nasudi a karkari ni Jehova a Dios,’ inlawlawag ni Schroeder. ‘Kaipapananna met a ti maysa ti napudno, awan panagbalbaliwna, nasungdo ken Jehova.’ Addada kadi ulidan dagidiay napaneknekanen a matalek? Addada dagidiay lallaki ken babbai sakbay ti Kinakristiano a nadakamat iti Hebreo kapitulo 11; ni Jesu-Kristo; ken dagiti apostol ken dadduma pay a napulotan nga ad-adalan idi umuna a siglo K.P. Kalpasan ti panangsalaysayna ti sumagmamano a moderno-aldaw nga ulidan, insaludsod ni Kabsat Schroeder: ‘Kumustatayo met?’ Innayonna: ‘Mabalin a matalekkayo wenno saankayo a matalek. Kamengkayo man dagiti napulotan wenno iti dakkel nga umariwekwek, amintayo, kadagitoy dua a klase, ti masapul nga agpadpada a matalek iti nakaawisantayo.’
Simmaruno iti panagsao ni Kabsat Schroeder, indanon ti tsirman dagiti kablaaw a naawat manipud nadumaduma a pagilian. Itan dimtengen ti kanito a panangawat dagiti estudiante ti diplomada. Dagiti 22 nga estudiante ti naggapu manipud innem a pagilian—Canada, Finlandia, Alemania, Gran Britania, Sweden, ken Estados Unidos. Ti pakaidestinuanda, nupay kasta, ti mangipan kadakuada kadagiti 11 a nagduduma a dagdaga—Belize, Dominica, Ecuador, El Salvador, Hong Kong, Lesotho, Pakistan, Paraguay, Puerto Rico, Senegal, ken Taiwan. Ket aniat’ makuna dagiti nagturpos iti aldaw ti graduasionda? Maysa kadagiti estudiante ti nangibasa ti surat a naiturong iti Bagi a Manarawidwid ken pamilia ti Bethel, a kunana iti pasetna: “Maminsan manen nga agyamankam kadakay amin iti panamagbalinyo kadagitoy lima a bulan a nakalaglagip unay iti intero a panagbiagmi.”
Kalpasan ti intermission, ni W. L. Van de Wall ti Service Department Committee ti nangirugi ti programa iti malem babaen ti panangidaulona ti napaababa a Panagadal ti Pagwanawanan. Kalpasan daytoy, nangipabuya dagiti estudiante ti ababa a programa, nga inmuestrada ti sumagmamano kadagiti makapainteres—ken no maminsan makakatkatawa—a kapkapadasanda bayat a mangaskasabada idiay Siudad ti Nueva York. Kalpasanna, amin a timmabuno, agraman ti maika-85 a klase, tinagiragsakda ti espesial a programa a napauluan “Pannakiamammo a Nasaysayaat kadagiti Nareregta a Misionerotayo.” Babaen kadagiti slides ken recordings, nakita dagiti nagbuya—ken nangngegda—dagiti dadduma a nababayagen a misionero.
Kas maiyanatup a pangserra, nangiparang dagiti estudiante ti drama ti Biblia kontodo umiso a panagkawkawesda a mangipagpaganetget ti pannakasapul ti panangaramid iti pagayatan ti Dios nga addaan regta. Kalpasan ti maudi a kanta, amin natignayda unay idi a ni F. W. Franz, ti 95-años a presidente ti Watchtower Society, ket nangted ti napasnek a pangserra a kararag. Sumaganad iti daytoy, amin “napan kadagiti pagtaenganda, a sirarag-o ken siaayat ti pusoda.”
Naipasdek idi 1943, ti Watchtower Bible School of Gilead ti mangsansanay ken mangibabaon kadagiti misionero iti amin a paset ti daga. Kadagiti umuna a 35 a klase, ti eskuelaan ti nagsaad idiay Kingdom Farm ti Watchtower Society, asideg ti South Lansing, Nueva York. Iti maika-36 a klase, nangrugi idi Pebrero 6, 1961, naiyakar ti eskuelaan iti hedkuarters ti Sosiedad sadi Brooklyn, Nueva York, nga isut’ pagan-andarannan agingga itatta. Nupay kasta, iti panangrugi ti maika-86 a klase inton Oktubre 17, 1988, ti eskuelaan maiyakaren idiay Watchtower Farms, nga asideg ti Pine Bush, Nueva York.
[Kahon iti panid 21]
Dagiti Estadistika ti Klase:
Promedio nga edad: 29.1
Promedio a tawen iti kinapudno: 13.4
Promedio a tawen iti amin-tiempo a ministerio: 9.1
Bilang dagiti di kasado a kakabsat a lallaki: 2
Bilang dagiti pagassawaan: 10
[Ladawan iti panid 23]
Ti Maika-85 a Nagraduar a Klase ti Watchtower Bible School of Gilead
Iti makimbaba a listaan, nanumeruan dagiti dasig manipud sango agturong iti likud, ken dagiti nagnagan nailistada manipud kanigid nga agpakanawan iti tunggal dasig.
(1) Johnston, Y.; Kuismin, S.; Ugarte, Z.; Williams, Z.; Grischkewitz, G. (2) Powers, E.; D’Angelo, L.; Honsberger, J.; Williams, J.; James, J. (3) Kuismin, V.; Grischkewitz, U.; Ugarte, R.; Rogerson, A.; Lantunen, K.; James, D. (4) Rogerson, M.; Johnston, R.; D’Angelo, T.; Honsberger, T.; Powers, T.; Danielson, M.