KARAYAN TI EGIPTO

Inkari ni Jehova a maited iti bin-i ni Abraham ti daga “manipud iti karayan ti Egipto” agingga iti Karayan Eufrates. (Ge 15:18) Dagiti komentarista gagangay a tarusanda ti “karayan ti Egipto” kas tumukoy iti “naapres a ginget ti Egipto” a maikunkuna ita nga isu ti Wadi el-ʽArish ti Peninsula ti Sinai, nga agayus iti Baybay Mediteraneo agarup 150 km (90 mi) iti daya ti Port Said. (Kitaenyo ti EGIPTO, NAAPRES A GINGET TI.) Iti 1 Cronicas 13:5 mabasa iti sumagmamano a patarus ti “karayan [shi·chohrʹ] ti Egipto” (NW, La, AT), ket mabalin met a tumukoy daytoy iti Wadi el-ʽArish. Nupay kasta, posible met a dagitoy a dua a teksto tukoyenda ti maysa a sanga ti Nilo.​—Kitaenyo ti SIHOR.