ABIGAIL
[Ni Ama(k) Nagrag-o a Mismo].
1. Asawa ni David. Dati nga asawa ti baknang a ni Nabal manipud Maon, maysa a siudad iti igid ti Let-ang ti Juda, iti laud ti Natay a Baybay. (1Sm 25:2, 3; Jos 15:20, 55) Ni Abigail ket “nasayaat ti sariritna ken napintas ti langana,” idinto ta ti immuna nga asawana, a ti naganna ket kaipapananna ti “Nakuneng; Maag,” ket “nagubsang ken dakes iti ar-aramidna.”
Kalpasan ti ipapatay ni mammadto Samuel, immakar ni David ken dagiti tattaona iti lugar a pakaipaspastoran idi dagiti arban ti asawa ni Abigail. Iti kasta dagiti tattao ni David kaslada mangsalaknib a “pader” iti likmut ti papastor ken ar-arban ni Nabal iti rabii ken aldaw. Gapuna, idi dimteng ti tiempo ti panagpukis, nangibaon ni David iti sumagmamano nga agtutubo a lallaki a sumang-at iti Carmelo tapno ipakaammoda ken Nabal ti impaayda kenkuana a nasayaat a serbisio ken tapno agkiddawda kenkuana iti sagut a taraon. (1Sm 25:4-8, 15, 16) Ngem binugbugkawan ida a binabalaw ni nakirmet a Nabal ket ininsultona ni David a kasla awan patpategna a tao, ken isuda amin a kaslada ad-adipen a nagtalaw. (1Sm 25:9-11, 14) Daytoy ti namagpungtot unay ken David ta imbarikesna ti kampilanna ket indauluanna ti agarup 400 a lallaki nga agturong iti Carmelo tapno punasenda ni Nabal ken dagiti lallaki iti sangakabbalayanna.—1Sm 25:12, 13, 21, 22.
Idi nangngeg ni Abigail ti napasamak babaen ti madandanagan nga adipen, imparangarangna ti kinasariritna babaen ti panangalana a dagus iti umdas nga abasto ti taraon ken bukbukel ket kalpasanna impatulodna dagitoy iti aywan dagiti adipenna nga umun-una kenkuana, a kas iti inaramid idi ni Jacob sakbay a simmabet ken Esau. (1Sm 25:14-19; Ge 32:13-20) Idin simmakay iti asno nga awan a pulos ti imbagbagana iti asawana ket sinabetna ni David, ket babaen iti atiddog ken napasnek a pakaasi, a pakakitaan iti sirib ken kinanainkalintegan kasta met ti panagraem ken kinapakumbaba, kinumbinsirna ni David a ti nakuneng a sasao ti asawana ket saan a nainkalintegan a rason iti nakillo a panangibukbok iti dara wenno iti di panagtalek ken Jehova nga isu a mismo ti mangrisut iti bambanag iti umiso a pamay-an. (1Sm 25:14-20, 23-31) Nagyaman ni David iti Dios gapu iti kinamanakem ken napardas a panagtignay ni Abigail.—1Sm 25:32-35; idiligyo ti Pr 25:21, 22; 15:1, 2.
Idi nakaawiden ni Abigail, inurayna a maunawan ti asawana iti pannakabartekna gapu iti maysa a padaya sana impakaammo kenkuana dagiti inaramidna. Idin ‘ti puso ni Nabal ket natay iti unegna, ket nagbalin a kasla bato,’ ket kalpasan ti sangapulo nga aldaw pinasamak ni Jehova a mauyos ti biagna. Idi nakagteng ken David ti damag, nagbaon tapno intukonna ken Abigail nga agbalin nga asawana, a situtulok nga inaklon ni Abigail. Ni David inayatna met ni Abigail a kas ken Ahinoam, maysa a Jezraelita, nga immun-una nga innala ni David kas asawana. Ti immuna nga asawa ni David, ni Mical ket inteden ni amana a Saul iti sabali a lalaki.—1Sm 25:36-44.
Ni Abigail ket kadua idi ni David idiay Gat iti makinlaud nga igid ti Sefela ket idi agangay idiay Siclag nga adda iti amianan a laud ti Negeb. Bayat ti kaawan ni David, ti Siclag ket pinuoran dagiti mangrubbuot a bunggoy dagiti Amalekita manipud iti abagatan ket impanawda amin a babbai ken ub-ubbing, agraman da Abigail ken Ahinoam. Yantangay impasigurado ni Jehova ti panagballigina, indauluan ni David ti tattaona a kumamat ket, iti kellaat nga idadarup, naparmekda dagiti Amalekita ket binawida dagiti kautibo ken sansanikua.—1Sm 30:1-19.
Idi nakasublidan idiay Siclag, tallo nga aldaw kalpasanna, dimteng ti damag maipapan iti ipapatay ni Saul. (2Sm 1:1, 2) Iti kasta, kinaduaan ni Abigail ti asawana a mapan idiay Hebron ti Juda, a sadiay ti nakapulotan ni David kas ari. Ditoy nga impasngayna ti maysa nga anak a lalaki, ni Kileab (2Sm 3:3), a naawagan met iti Daniel iti 1 Cronicas 3:1. Immadu ti bilang ti assawa ni David idiay Hebron a nagbalinen nga innem, ket saanen a nadakamat iti salaysay ti maipapan ken Abigail wenno uray ti anakna.—2Sm 3:2-5.
2. Maysa kadagiti dua a kakabsat a babbai ni David. (1Cr 2:13-17) Patien ti dadduma nga eskolar a kabsatna laeng iti ina ngem saan nga iti ama. Iti 2 Samuel 17:25 naawagan ni Abigail nga “anak a babai ni Nahas.” Patien ti Rabbiniko a tradision a ti Nahas ket sabali pay a nagan ni Jesse, ama ni David. Iti daytoy a bersikulo ti Griego a Septuagint (Lagardian nga edision) ket nagusar iti “Jesse” imbes a “Nahas.” Kasta met laeng ti mabasa iti adu a moderno a patarus. (Kitaenyo ti AT; JB; NC [Espaniol].) Nupay kasta, makapainteres ta ti rekord iti 1 Cronicas 2:13-16 saanna nga awagan da Abigail ken Zeruia iti ‘annak a babbai ni Jesse’ no di ket ‘kakabsat a babbai’ ti annak ni Jesse, agraman ni David. Daytoy ti mangipakita a ti inada ket mabalin nga immuna a nayasawa iti maysa a lalaki nga agnagan Nahas, a kenkuana nga impasngayna da Abigail ken Zeruia sakbay nga isu ket nagbalin nga asawa ni Jesse ken ina ti annakna. Saan ngarud a dogmatiko a maikuna a ni Abigail ket anak ni Jesse.—Kitaenyo ti NAHAS Num. 2.
Ni Abigail a kabsat ni David, ket nadakamat a nangipasngay iti maymaysa nga anak, ni Amasa. Iti 2 Samuel 17:25 ti asawana ket natukoy kas Itra nga Israelita ngem iti dadduma pay a paset naawagan iti Jeter (1Ar 2:5, 32) ket iti 1 Cronicas 2:17 nadakamat kas “Jeter nga Ismaelita.” (Kitaenyo ti JETER Num. 6.) Mabalin a ni Abigail ket nagbalin nga asawa ni Jeter bayat ti tiempo nga agnanaed ni Jesse ken ti pamiliana iti daga ti Moab. (1Sm 22:3, 4) Agparang a kasla saan a naas-asikaso ti anakna a ni Amasa, bayat ti panagturay ni David agingga iti panagrebelde ni Absalom. Idi agangay, isu ket pinagbalin ni kasinsinna nga Absalom kas panguluen dagiti armado a puersana. Nupay kasta, kalpasan ti ipapatay ni Absalom, ti kabsat ni Abigail a ni Ari David ket nakitulag iti anak ni Abigail a ni Amasa tapno magun-odna ti suporta maipaay iti isusublina iti trono, ket kalpasan dayta, pinagbalinna ni Amasa a panguluen ti buyot, a kasukat ni Joab. (2Sm 19:11-14) Di nagbayag, daytoy a pannakadutok nagbanag iti ipapatay ti anak ni Abigail, iti im-ima ti napagpungtot a kasinsinna a ni Joab.—2Sm 20:4-10.