ECBATANA
Ti kabesera a siudad ti kadaanan a Media, manipud agarup 700 K.K.P. Ti Persiano nga Ari Ciro II innalana dayta manipud ken Ari Astyages ti Media, a kalpasan dayta nagtipon ti puersa dagiti Medo ken Persiano iti sidong ni Ciro. Iti Kasuratan, nayam-ammo ti Ecbatana kas lugar nga adda iti masaksakupan a distrito ti Media idi kaaldawan ti Persiano nga Ari Dario I (Histaspis).—Esd 6:1, 2.
Iti Esdras 6:2, “Ecbatana” ti Iloko a pannakaipatarus ti nagan daytoy a siudad. Daytoy a porma ti nagan ket kapadpada ti mabasa iti Latin a Vulgate ken masarakan met iti Griego a teksto ti Apokripal a sursurat a nainayon iti Septuagint. Nupay kasta, ti Masoretiko a teksto ken ti Syriac a Peshitta ilanadda ti nagan kas “Achmetha.” Dagiti nagkauna a Griego a mannurat kasla inyaplikarda ti nagan nga Ecbatana iti sumagmamano a lugar. Nupay kasta, dagiti eskolar ita agtutunosda a mangikuna a ti Ecbatana a kinautibo ni Ciro (ken ngarud daydiay nadakamat iti Esd 6:2) ket isu ti moderno a siudad ti Hamadan, maysa a napateg a sentro ti komersio iti Iran nga adda iti sakaanan ti Bantay Alwand, agarup 290 km (180 mi) iti laud nga abagatan-a-laud ti Tehran. No kasano a napateg idi a siudad ti kadaanan nga Ecbatana a naipataraigid iti kangrunaan a ruta manipud Mesopotamia nga agturong iti adayo a luglugar iti daya, kasta met a ti agdama a Hamadan ket paglasatan ti nagduduma a dalan, kas iti dalan manipud Baghdad a kumamang idiay Tehran.
Idi a ti sumagmamano nga opisial a dinutokan ti Persia kinuestionaranda no legal met laeng ti trabaho dagiti Judio a panangbangon manen iti templo idi kaaldawan ni Zorobabel, dagitoy a bumusbusor nangipatulodda ken Ari Dario I ti Persia iti maysa a surat a mangkidkiddaw iti pammatalged no adda bilin ni Ciro a nangautorisar iti panagbangon manen. (Esd 5:1-17) Nangituyang ni Dario iti maysa a panagsukisok mainaig iti dayta a kaso, ket nasarakan idiay Ecbatana ti bilin ni Ciro, iti kasta napatalgedan ti kinalegal ti trabaho a panagbangon manen iti templo. Kinapudnona, nangyetnag ni Dario iti maysa a bilin tapno saan a malapdan ti panagtultuloy ti trabaho dagiti Judio, ket nabilin pay ketdi dagiti bumusbusor a mangipaayda kadagiti kasapulan a materiales, a dayta ti “madagdagus nga inaramidda.” Kamaudiananna, nairingpas ti templo “iti maikatlo nga aldaw ti lunar a bulan nga Adar, a dayta ket, iti maikanem a tawen ti panagturay ni Dario nga ari,” wenno idi dumanin ti primavera ti 515 K.K.P.—Esd 6:6-15.