Dagiti Saludsod Manipud Kadagiti Managbasa
Ipaawat kadi kadatayo ti Job 1:8 nga iti panawen a nagbiagan ni Job, isu laeng ti tao a matalek ken Jehova?
Saan. Dayta a konklusion ket di ikalintegan ti Job 1:8, nga agkuna:
“Ket ni Jehova kinunana ken Satanas: ‘Inutobmo ni adipenko a Job, ta awan ti umasping kenkuana idiay daga, maysa a napalungdo ken nalinteg a lalaki, maysa a managaligaget iti Dios ken liklikanna ti dakes?’” Nangted ti Dios iti umasping a panangtingiting idiay Job 2:3, a dinamagna ken Satanas: “Inutobmo ni adipenko a Job, ta awan ti umasping kenkuana idiay daga, maysa a napalungdo ken maysa a nalinteg a lalaki, maysa nga agaligaget iti Dios ken liklikanna ti dakes?”
Ti libro ti Job a mismo ipasimudaagna a saan laeng a ni Job ti sibibiag a tao idi nga inanamongan ti Dios kas matalek. Mangrugi iti kapitulo 32, mabasatayo ti maipapan ken Eliu. Nupay ub-ubing a lalaki, inlinteg ni Eliu ti di umiso a panangmatmat ni Job ken intan-okna ti pudno a Dios.—Job 32:6–33:6, 31-33; 35:1–36:2.
Gapuna, ti kuna ti Dios nga ‘awan ti kas ken Job idiay daga’ kaipapananna la ketdi a ni Job ket nangnangruna a naisalsalumina kas maysa a nalinteg a tao. Mabalin a nagbiag ni Job iti nagbaetan ti ipapatay ni Jose idiay Egipto ken ti panangrugi ti panagserbi ni Moises kas mammadto ti Dios. Bayat dayta a panawen adu nga Israelitas ti nagnaed sadi Egipto. Awan gapu a panunotentayo nga aminda ket di matalek ken di inanamongan ti Dios; nalabit adu dagidiay nagtalek ken Jehova. (Exodo 2:1-10; Hebreo 11:23) Kaskasdi, awan kadakuada ti nagakem iti nalatak a papel, kas ken Jose, ken dagidiay managdaydayaw a naisangsangayan no iti pudno a panagdayaw, a kas ken Moises iti panangiruarna iti nasion ti Israel idiay Egipto.
Nupay kasta, iti sabali a disso, adda maysa a lalaki a naidumduma ti kinatarnawna. “Adda idi maysa a lalaki idiay daga a Hus, a ti naganna Job; ket lalaki a napalungdo ken nalinteg, ken maysa a managaligaget iti Dios ken liniklikanna ti dakes.”—Job 1:1.
Mabalin ngarud a dakamaten ni Jehova ni Job kas maysa a nakakadkadlaw ken naisalsalumina a pagulidanan ti pammati ken debosion. Dagiti mannurat ti Biblia a da Ezequiel ken Santiago dinakamatda met ni Job kas paguadan ti kinalinteg ken panagibtur.—Ezequiel 14:14; Santiago 5:11.