KRISTAL

Sigun iti pannakaaramatna iti Biblia, ti kristal tumukoy iti maysa a nalitnaw ken aganninaw a mineral, nalabit ti kita ti quartz a maaw-awagan ita iti bato a kristal. Ti bato a kristal ket kasusudian a porma ti quartz, a buklen ti silicon ken oksihena. Ti nagpaiduma nga innem-sikiganna a pormana ket masarakan iti gistay amin a kita ti bato; awanan maris, nalitnaw, ken simmarming ti langana. Adayo a natangtangken ti bato a kristal ngem ti dadduma pay a kadawyan a mineral, ket no dadduma matabas a mapagbalin a batbato ti alahas.

Nangina ti “bato a kristal” (Heb., ga·vishʹ) idi kaaldawan ni Job, ket naipamatmat a kasta yantangay naibilang a nabalor a kas iti korales ken dagiti perlas. Nupay kasta,imbilangna a basbassit ti pateg dagitoy no idilig iti sirib. (Job 28:18) Ti Apocalipsis aramatenna ti nalitnaw, narimat, nadarisay a kristal (Gr., kryʹstal·los) kas pangiladawan iti “maysa a simmarming a baybay nga umasping iti kristal”; ti raniag ti nasantuan a siudad, Baro a Jerusalem, inladawanna kas “maysa a bato a jaspe nga agsilsilnag a kas aganninaw a kristal”; ken ti “maysa a karayan ti danum ti biag, nalitnaw a kas kristal.”​—Apo 4:6; 21:11; 22:1.