Ti Gunggona ni Job​—Gubuayan ti Namnama

“Ni Jehova binendisionanna ti naud-udi a tungpal ni Job a nangnangruna ngem idi panangrugina.”​—JOB 42:12.

1. Aniat’ ar-aramiden ni Jehova maipaay kadagiti tattaona, uray pay no pakapsuten unay ida dagiti pakasuotan?

NI Jehova “agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Tignayenna met dagiti napasnek a tattaona a mangpaneknek a situtured, uray pay no pakapsuten ida dagiti pakasuotan nga uray la a maibilangda a kasla natayen. (Job 26:5; Apocalipsis 11:3, 7, 11) Napaneknekan a pudno dayta iti kaso ni agsagsagaba a Job. Nupay pinadpadakes dagiti tallo a sinsinan a manangliwliwa, dina pinalubosan ti panagbuteng iti tao a mangpaulimek kenkuana. Situtured ketdi a nangpaneknek.

2. Nupay nagsagabada iti pannakaidadanes ken rigat, kasano a nalasatan dagiti Saksi ni Jehova dagiti pakasuotan a dimteng iti biagda?

² Adu a Saksi ni Jehova kadagitoy a tiempo ti nagsagaba iti nakaro a pannakaidadanes ken rigat nga uray la nga addada iti ngarab ni patay. (2 Corinto 11:23) Nupay kasta, kas ken Job, impakitada ti ayatda iti Dios ken sinurotda ti kinalinteg. (Ezequiel 14:14, 20) Nalasatanda met dagiti pakasuotan, a desididoda a mangay-ayo ken ni Jehova, napakired a mangpaneknek a situtured, ken napnuan pudno a namnama.

Situtured a Mangpaneknek ni Job

3. Ania a kita ti pammaneknek ti impaay ni Job iti maudi a bitlana?

³ Iti maudi a bitlana, nangipaay ni Job iti dakdakkel pay a pammaneknek ngem iti immun-una nga impaayna. Pinaulimekna a namimpinsan dagiti sinsinan a manangliwliwa kenkuana. Sikakas-ang a kinunana: “O anian a panangtulongmo iti awanan pannakabalin!” (Job 26:2) Intan-ok ni Job ni Jehova, a babaen ti pannakabalinna imbitinna ti daga iti rabaw ti awan iti law-ang ken tengtenglenna dagiti ulep a napno iti danum iti ngatuen ti daga. (Job 26:7-9) Kaskasdi, kinuna ni Job a ti kakasta a pagsidsiddaawan ‘isuda laeng ti paspaset a naruar iti daldalan ni Jehova.’​—Job 26:14.

4. Aniat’ kinuna ni Job maipapan iti kinatarnaw, ket apay a naibagana dayta?

⁴ Gapu ta masinunuona nga awan basolna, kinuna ni Job: “Agingga iti matayak diakto ikkaten kaniak ti kinatarnawko!” (Job 27:5) Maisupadi kadagiti ulbod a pammabasol a naidissuor kenkuana, awan a pulos ti inaramidna a kaitutopan ti napagtengna. Ammo ni Job a saan nga ipangag ni Jehova ti karkararag dagiti apostata ngem gunggonaanna dagiti agtalinaed a natarnaw. Ipalagip daytoy kadatayo nga iti saan a mabayag, ibualto ti bagyo ti Armagedon dagiti managdakdakes manipud iti pannakabalin a nakaisaadanda, ket saandanto a malisian ti awan lablabsanna nga ima ti Dios. Agingga iti dayta a panawen, agtultuloy dagiti tattao ti Dios a magna iti kinatarnawda.​—Job 27:11-23.

5. Kasanot’ panangilawlawag ni Job iti pudno a sirib?

⁵ Darepdepenyo dagiti tallo nga aginsisirib [a lallaki] a dumdumngeg bayat nga impakita ni Job nga ipakat ti tao amin a laingna a mangbirok iti balitok, pirak, ken dadduma pay a gameng iti uneg ti daga ken iti baybay. “Ngem,” kinunana, “ti sangasako a sirib nangatngato ti pategna ngem ti sangasako a perlas.” (Job 28:18) Saan a magatang dagiti sinsinan a manangliwliwa ken ni Job ti pudno a sirib. Ti gubuayanna isu ti Namarsua iti angin, tudo, kimat, ken gurruod. Kinapudnona, ti siraraem a “panagbuteng ken ni Jehova​—dayta isu ti sirib, ket ti panangpanaw iti dakes isu ti pannakaawat.”​—Job 28:28.

6. Apay a sinarita ni Job ti maipapan iti napalabas a kabibiagna?

⁶ Iti laksid ti panagsagabana, saan nga insardeng ni Job ti panagserbina ken ni Jehova. Imbes a tallikudanna ti Kangatuan, il-iliwen daytoy natarnaw a lalaki ti sigud a “pannakisimpungalan[na] iti Dios.” (Job 29:4) Saan nga agpalpalangguad ni Job idi a sinaritana ti maipapan iti ‘panangispalna iti napanglaw, panangikawesna iti kinalinteg, ken panagbalinna a pudpudno nga ama iti makasapul.’ (Job 29:12-16) Imbes ketdi, dakdakamatenna laeng dagiti inar-aramidna kas matalek nga adipen ni Jehova. Nakaaramidkay met kadi iti kasta a nasayaat a pakasarsaritaan? Siempre, imbutaktak met ni Job ti kinaulbod dagiti pammabasol nga inaramid dagiti tallo nga aginsasanto a sinsinan a gagayyem.

7. Ania idi a kita ti tao ni Job?

⁷ Ni Job ket kinatkatawaan dagiti lallaki nga in-inaudi ngem isuna ‘a dagiti ammada dina kinayat idi nga insaad a kadua dagiti aso a bugaw dagiti karnerona.’ Kinarugit ken tinuptupraanda. Nupay nakaro unay ti panagsagabana, awan a pulos ti nangisakit ken ni Job. (Job 30:1, 10, 30) Nupay kasta, gapu ta naan-anay ti debosionna ken ni Jehova, nadalus ti konsiensiana, isut’ gapuna a naikunana: “Timbangennakto iti husto a timbangan ket maammuanto ti Dios ti kinatarnawko.” (Job 31:6) Ni Job ket saan a mannakikamalala wenno manangigakat iti dakes, ket dina impaidam ti tulongna kadagiti napanglaw. Nupay nasaliwanwan idi ti biagna, pulos a di nagtalek iti kinabaknang. Mainayon pay, saan a nagdaydayaw ni Job kadagiti awan biagna a banag a kas iti bulan. (Job 31:26-28) Gapu iti panagtalekna iti Dios, nangipaay [ni Job] iti nasayaat nga ulidan kas manangsalimetmet iti kinatarnaw. Iti laksid ti amin a rigat a sinagabana ken ti kaadda dagiti sinsinan a manangliwliwa, sisisigo a sinalakniban ni Job ti bagina ken nangipaay iti nagsayaat a pammaneknek. Idi awanen ti maisaona, isut’ nagpannuray iti Dios kas Ukom ken Mananggunggona kenkuana.​—Job 31:35-40.

Agsao ni Eliu

8. Siasino ni Eliu, ket kasanona nga impakita nga agpadpada ti panagraem ken tured?

⁸ Adda iti asideg ni agtutubo nga Eliu, kaputotan ni Buz nga anak ni Nahor ket ngarud, adayo a kabagian ni Abraham a gayyem ni Jehova. (Isaias 41:8) Impakita ni Eliu ti panagraemna kadagiti natataengan babaen ti panagimdengna iti agsumbangir a dasig ti debate. Nupay kasta, nagsao a situtured maipapan kadagiti bambanag a nagkamalianda. Kas pagarigan, nakaluksaw [ni Eliu] agsipud ta ‘pinalpalinteg [ni Job] ti bagina a saan ket a ti Dios.’ Ad-adda ti pungtot ni Eliu a maibusor kadagiti sinsinan a manangliwliwa. Dagiti sasaoda kasla intan-okda ti Dios ngem iti kinapudnona imbabainda babaen ti idadasigda ken ni Satanas iti supiat. ‘Napno iti sasao’ ken tinignay ti nasantuan nga espiritu, ni Eliu ket maysa nga awan idumdumana a saksi ni Jehova.​—Job 32:2, 18, 21.

9. Kasano nga imparipirip ni Eliu ti pannakaisubli ti sigud a kasasaad ni Job?

⁹ Ad-adda a maseknan ni Job iti bukodna a pannakaalangon ngem iti pannakaalangon ti Dios. Kinapudnona, nakisupiat iti Dios. Nupay kasta, bayat nga umad-adani ti ipapatay ni Job, adda pangripiripan a maisubli ti sigud a kasasaadna. Kasano a kasta? Bueno, natignay ni Eliu a nangikuna nga inanamongan ni Jehova ni Job buyogen daytoy a mensahe: “Ispalem iti yuulogna iti abut! Nakasarakak iti maysa a pangsubbot! Ti lasagna agbalinto a nasalsalibukag ngem iti lasag ti maysa nga ubing; isu agsubli kadagiti al-aldaw ti kinaubingna.”​—Job 33:24, 25.

10. Kasanot’ kainget ti pannakasuot ni Job, ngem aniat’ masinunuotayo maitunos iti 1 Corinto 10:13?

¹⁰ Tinubngar ni Eliu ni Job gapu iti panangibagana nga awan ti magunggona iti panagrag-o iti Dios babaen ti panagtalinaed a natarnaw. Kinuna ni Eliu: “Adayo koma nga ipagarup a ti pudno a Dios aramidenna ti kinadangkok, ket ti Mannakabalin-amin aramidenna ti kinadangkes! Ta gunggonaannanto ti naindagaan a tao kas mayannurot iti aramidna.” Sidadarasudos a nagtignay ni Job iti panangipaganetgetna iti bukodna a kinalinteg, ngem inaramidna dayta nga awanan umdas a pannakaammo ken pannakaawat. Innayon ni Eliu: “Sapay koma ta masuot ni Job agingga iti panungpalan agsipud ta iti panangsungbatna umasping kadagiti nadangkok a tattao.” (Job 34:10, 11, 35, 36) Kasta met, mapaneknekan laeng a naan-anay ti pammati ken kinatarnawtayo no ‘masuottayo agingga iti panungpalan.’ Nupay kasta, di ipalubos ti naayat a nailangitan nga Amatayo a masulisogtayo iti labes ti kabaelantayo nga itured.​—1 Corinto 10:13.

11. No masuottayo iti kasta unay, aniat’ rumbeng a laglagipentayo?

¹¹ Bayat nga intultuloy ni Eliu ti nagsao, inulitna nga impakita a kasta unay ti panangipaganetget ni Job iti bukodna a kinalinteg. Rumbeng a ti Naindaklan a Nangaramid kadatayo ti pakaipamaysaan ti atension. (Job 35:2, 6, 10) Ti Dios “dina igaga ti biag ti asinoman a nadangkok, ngem itdenna iti maparigat ti kalinteganda,” kinuna ni Eliu. (Job 36:6) Awan ti makababalaw iti dalan ti Dios ken makaibaga nga isu ket nakillo. Natantan-ok [ti Dios] ngem iti ammotayo, ket ditay matunton ti tawenna. (Job 36:22-26) No masuottayo iti kasta unay, laglagipentay koma a nalinteg ti agnanayon a Diostayo ket gunggonaannatayto gapu iti matalek nga ar-aramidtayo a pakaidayawanna.

12. Aniat’ ipasimudaag ti panggibus a sasao ni Eliu maipapan iti panangukom ti Dios kadagiti managdakdakes?

¹² Bayat nga agsasao ni Eliu, mangipangpangta ti bagyo. Bayat a sumungsungad dayta, nangrugi nga agkibbayo ken agpigerger ti pusona. Dinakamatna dagiti naindaklan a banag nga inaramid ni Jehova ket kinunana: “Ipangagmo daytoy, O Job; agtakderka a sitatalna ket utobem dagiti nakaskasdaaw nga aramid ti Dios.” Kas ken Job, rumbeng nga utobentayo dagiti nakaskasdaaw nga aramid ti Dios ken ti mangnibinibi a kinadayagna. “Maipanggep iti Mannakabalin-amin, ditay pay nasarakan,” kinuna ni Eliu. “Mangnibinibi ti pannakabalinna, ket ti kinahustisia ken nawadwad a kinalinteg dina tagibassiten. Ngarud, agbuteng koma dagiti tattao kenkuana.” (Job 37:1, 14, 23, 24) Ipalagip kadatayo ti panggibus a sasao ni Eliu nga inton ukomen ti Dios dagiti managdakdakes iti saanen a mabayag, dinanto tagibassiten ti kinahustisia ken kinalinteg ket italimengnanto dagidiay agbuteng ken siraraem nga agdaydayaw kenkuana. Anian a pribilehio ti maibilang iti kakasta a manangsalimetmet iti kinatarnaw a mangbigbig ken ni Jehova kas Sapasap a Soberano! Agibturkayo a kas ken Job, ket pulos a diyo ipalubos a yadayonakay ti Diablo iti naparaburan a kasasaadyo iti tengnga dagitoy naragsak a tattao.

Sungbatan ni Jehova ni Job

13, 14. (a) Mainaig iti ania ti sinaludsod ni Jehova ken ni Job? (b) Aniada a punto ti maadaltayo kadagiti dadduma pay a saludsod nga indatag ti Dios ken ni Job?

¹³ Nasdaaw la ketdi ni Job idi nagsao kenkuana ni Jehova manipud iti alipugpog! Gapuanan ti Dios dayta a bagyo, saan a kas iti napigsa nga angin nga inusar ni Satanas a nangrebba iti balay ken nangpapatay kadagiti annak ni Job. Di makatimek ni Job bayat a sinaludsodan ti Dios: “Sadino aya ti yanmo idi impasdekko ti daga? . . . Asino ti nangisaad iti bato a pasulina, idi dagiti bituen ti agsapa sirarag-o a nagriawda a sangsangkamaysa, ken amin dagiti annak a lallaki ti Dios dimmir-ida gapu iti rag-o?” (Job 38:4, 6, 7) Nakaad-adu a saludsod ti indatag ni Jehova ken ni Job maipapan iti baybay, ulep a pannakakawes ti daga, bannawag, ruruangan ni patay, lawag ken sipnget, ken dagiti bituen. Awan a pulos ti masao ni Job idi sinaludsod [ti Dios] kenkuana: “Ammom aya dagiti alagaden ti langlangit?”​—Job 38:33.

¹⁴ Ipakita dagiti dadduma pay a saludsod a sakbay a naparsua ti tao ken naikkan iti kinaturay kadagiti ikan, tumatayab, ayup, ken aguy-uyas a banag, ay-aywanan idan ti Dios​—nga awan aniaman a tulong wenno balakad ti tao. Dinakamat met dagiti kanayonan a saludsod ni Jehova dagiti parsua a kas iti atap a toro, abestrus, ken kabalio. Naisaludsod ken ni Job: “Gapu aya iti bilinmo a ti agila tumayab nga agpangato ket aramidenna ti umokna idiay ngato?” (Job 39:27) Ay ket, saan! Darepdepenyo ti reaksion ni Job idi sinaludsod ti Dios kenkuana: “Ti manangdillaw makisusikto aya iti Mannakabalin-amin?” Di pakasdaawan a kinuna ni Job: “Adtoy! Bassit ti kaikariak. Anianto ti isungbatko kenka? Yapputko ti imak iti ngiwatko.” (Job 40:2, 4) Yantangay kanayon nga umiso ni Jehova, no masulisogtayo nga agreklamo a maibusor kenkuana, rumbeng a ‘yapputtayo ti imatayo iti ngiwattayo.’ Impaganetget met dagiti saludsod ti Dios ti kinatan-ok, kinadayag, ken bilegna, kas naiparangarang iti sangaparsuaan.

Ti Behemot ken ti Leviatan

15. Ania nga ayup ti tuktukoyen ti kaaduan kas Behemot, ket aniat’ sumagmamano a sagudayna?

¹⁵ Kalpasanna, dinakamat ni Jehova ti Behemot, nga ibilang ti kaaduan kas hipopotamo. (Job 40:15-24) Naidumduma gapu iti kadakkel, kadagsen, ken katangken ti kudilna, ‘nalangto a ruot’ ti kankanen daytoy nga ayup. Ti bileg ken pigsana adda kadagiti lomona ken kadagiti piskel ti tianna. Kasla ‘tubo a gambang’ ti katibker dagiti tulang ti sakana. Saan nga agbuteng ti Behemot uray no napegges ti agus ti karayan no di ket laklakaenna laeng ti sumuba.

16. (a) Ania a parsua ti maikanatad iti pannakailadawan ti Leviatan, ket ania dagiti sumagmamano a kinapudno maipapan iti dayta? (b) Aniat’ mabalin nga ipasimudaag ti bileg ti Behemot ken Leviatan maipapan iti panangaramid kadagiti annongentayo iti panagserbi ken ni Jehova?

¹⁶ Sinaludsod pay ti Dios ken ni Job: “Mairuarmo aya ti Leviatan babaen ti maysa a banniit, wenno mairutam aya ti dilana iti maysa a lubid?” Maibagay la unay iti buaya ti pannakailadawan ti Leviatan. (Job 41:1-34) Saan daytoy a makitulag iti kappia iti siasinoman, ket awan ti masirib a tao a makaitured a mangriing iti daytoy a reptilia. Saanna nga itarayan ti pana, ket “katawaanna ti panagtayab ti gayang.” Pagluagen ti makapungtot a Leviatan ti yuyeng a kas maysa a lumlumuag a banga ti sapsapo. Ti kinapudno a napigpigsa nga amang ti Leviatan ken ti Behemot ngem ni Job ket nakatulong a namagpakumbaba kenkuana. Rumbeng met a sipapakumbaba a bigbigentayo a saan nga agtaud kadatayo ti pigsatayo. Kasapulantayo ti sirib ken pigsa nga ipapaay ti Dios tapno maliklikantay dagiti pangil ni Satanas, ti Serpiente, ken tapno maitungpaltayo dagiti annongentayo iti panagserbi ken ni Jehova.​—Filipos 4:13; Apocalipsis 12:9.

17. (a) Kasano a ‘nakita [ni Job] ti Dios’? (b) Aniat’ pinaneknekan dagiti saludsod a di masungbatan ni Job, ket kasano a makatulong daytoy kadatayo?

¹⁷ Napagpakumbaba a naan-anay, binigbig ni Job ti di umiso a panangmatmatna ket inannugotna nga isut’ nagsao nga awanan pannakaammo. Nupay kasta, inyebkasna ti pammatina a ‘makitananto ti Dios.’ (Job 19:25-27) Kasano a mapasamak dayta, idinto ta awan ti tao nga agbiag a makakita ken ni Jehova? (Exodo 33:20) Kinapudnona, nakita ni Job ti pannakaiparangarang ti pannakabalin ti Dios, nangngegna ti sao ti Dios, ken naluktan dagiti mata ti pannakaawatna tapno makitana ti kinapudno maipapan ken ni Jehova. Isut’ gapuna a ‘pinagbabawyan [ni Job] ti insaona ket nagbabawi iti tapok ken dapdapo.’ (Job 42:1-6) Ti adu a saludsod a dina masungbatan pinaneknekanna ti kinatan-ok ti Dios ken impakitana ti kinanumo ti tao, uray ti maysa a napudno ken ni Jehova a kas ken Job. Tulongannatay daytoy a makabigbig a saan a ti bukodtayo a pagimbagan ti rumbeng nga ipangpangrunatayo no di ket ti pannakasantipikar ti nagan ni Jehova ken pannakaalangon ti kinasoberanona. (Mateo 6:9, 10) Ti rumbeng a kangrunaan a pakaseknantayo isu ti panagtalinaed a natarnaw ken ni Jehova ken panangidaydayaw iti naganna.

18. Aniat’ rumbeng nga aramiden dagiti sinsinan a manangliwliwa ni Job?

¹⁸ Komusta met ngay dagiti aginlilinteg a sinsinan a manangliwliwa? Adda kalintegan ni Jehova a mangpapatay koma kada Elifaz, Bildad, ken Sofar ta saan a pudno ti imbagada maipapan kenkuana, a kas ken Job. “Mangalakayo kadagiti pito a toro a baka ken pito a kalakian a karnero ket inkayo ken adipenko a Job,” kinuna ti Dios, “ket dakayo a lallaki, masapul a mangidatagkayo iti daton a mapuoran a maipaay kadakayo; ket ikararagannakayto ni adipenko a Job.” Nasken a sipapakumbaba nga agtulnog dagiti tallo. Inkararagan ida ni manangsalimetmet-kinatarnaw a Job, ket inawat ni Jehova ti kararagna. (Job 42:7-9) Ngem komusta met ngay ti asawa ni Job, a nangidagadag kenkuana nga ilunodnan ti Dios tapno matayen? Agparang a naikappia manen ken [ni Job] gapu iti asi ti Dios.

Dagiti Naikari a Gunggona Ikkannatay iti Namnama

19. Mainaig ken ni Job, kasano nga impakita ni Jehova nga isu ket natantan-ok ngem ti Diablo?

¹⁹ Apaman nga insardeng ni Job ti panagdandanagna maigapu kadagiti rigat a sinagabana ken pinabarona ti panagserbina iti Dios, binaliwan ni Jehova dagiti bambanag maipaay kenkuana. Kalpasan nga inkararagan ni Job dagiti tallo, ‘imbaw-ing [ti Dios] ti pannakakayaw [ni Job]’ ket intedna kenkuana ‘ti mamindua a kas iti kaadu ti adda idi kenkuana.’ Impakita ni Jehova nga isut’ natantan-ok ngem ti Diablo babaen ti panangatipana iti makaited-sakit nga ima ni Satanas ken simimilagro a panangpaimbagna ken ni Job. Binugaw met ti Dios dagiti sairo ken linapdanna ida babaen ti panangibaonna kadagiti anghelna a mangsalaknib manen ken ni Job.​—Job 42:10; Salmo 34:7.

20. Kasano a ginunggonaan ken binendisionan ni Jehova ni Job?

²⁰ Napan ken ni Job dagiti amin a lallaki ken babbai a kakabsatna, ken dagiti sigud a kaam-ammona tapno makilanglangda kenkuana, makipagrikna kenkuana, ken liwliwaenda gapu iti didigra nga impalubos ni Jehova a dumteng iti biagna. Nangted ti tunggal maysa kadakuada iti kuarta ken singsing a balitok ken ni Job. Binendisionan ni Jehova ti naud-udi a tungpal ni Job a nangnangruna ngem idi panangrugina. Naaddaan iti 14,000 a karnero, 6,000 a kamelio, 1,000 a baka, ken 1,000 a kabayán nga asno. Naaddaan pay ni Job iti pito nga annak a lallaki ken tallo a babbai, kas met laeng idi damo. Dagiti annakna a babbai​—da Jemima, Cesia, ken Kerenhappuc​—ti kapipintasan idi a babbai iti rabaw ti daga, ket inikkan met ida ni Job iti tawid a mairaman kadagiti kakabsatda a lallaki. (Job 42:11-15) Kanayonanna, nagbiag pay ni Job iti 140 a tawen ket nakitana pay dagiti annakna agingga iti maikapat a kaputotan. Kas paggibusan, kuna ti salaysay: “Natay ni Job, a lakay ken napno kadagiti aldaw.” (Job 42:16, 17) Ti pannakapaatiddog ti biagna ket maysa a milagro a gapuanan ni Jehova a Dios.

21. Kasanonatay a matulongan ti Nainkasuratan a salaysay maipapan ken ni Job, ket ania komat’ determinado nga aramidentayo?

²¹ Ti Nainkasuratan a salaysay maipapan ken ni Job ad-adda nga ipabigbigna kadatayo dagiti pamay-an ni Satanas ken tulongannatay a makakita no kasano a nainaig ti sapasap a kinasoberano iti kinatarnaw ti tao. Kas ken Job, masuot amin nga agayat iti Dios. Ngem makapagibturtayo a kas ken Job. Nakalung-aw [ni Job] kadagiti pakasuotan a dimteng iti biagna buyogen ti pammati ken namnama, ket adu a gunggona ti inawatna. Kas ad-adipen ni Jehova kadagitoy nga aldaw, addaantay iti pudno a pammati ken namnama. Ket anian a naindaklan a namnama ti inkabil ti Naindaklan a Mananggunggona iti sanguanan ti tunggal maysa kadatayo! Ti panangpampanunot iti nailangitan a gunggona tulonganna dagiti napulotan nga agserbi a sisusungdo iti Dios agingga iti kanibusanan ti biagda ditoy daga. Adu kadagiti addaan iti naindagaan a namnama ti pulos a dinto matay, ngem dagidiay matay, magunggonaandanto babaen ti pannakapagungarda iti Paraiso ditoy daga, agraman ni Job a mismo. Buyogen ti kasta a napudno a namnama iti puso ken panunot, sapay koma ta paneknekan dagiti amin nga agayat iti Dios nga ulbod ni Satanas babaen ti panagtakderda a sititibker iti dasig ni Jehova kas manangsalimetmet iti kinatarnaw ken nasungdo a manangitandudo iti sapasap a kinasoberanona.

Kasanoyo a Sungbatan?

◻ Ania dagiti sumagmamano a punto nga inaramid ni Job iti maudi a panangsungbatna kadagiti sinsinan a manangliwliwa kenkuana?

◻ Kasano a napaneknekan a ni Eliu ket maysa nga awan idumdumana a saksi ni Jehova?

◻ Ania dagiti sumagmamano a saludsod ti Dios ken ni Job, ket aniat’ epekto dagitoy?

◻ Kasanokay a nagunggonaan manipud iti Nainkasuratan a salaysay maipapan ken ni Job?

[Dagiti Ladawan iti panid 18]

Nakatulong a namagpakumbaba ken ni Job dagiti sasao ni Jehova maipapan iti Behemot ken Leviatan