NAAPGAD A YERBA

[Heb., mal·luʹach].

Daytoy a termino ket naminsan laeng a nadakamat iti Kasuratan kas pagtaraon dagidiay nakanumnumo. (Job 30:4) Ti sao iti orihinal a pagsasao ket maibilbilang a naadaw iti sao a kaipapananna ti “asin,” ken naipatarus pay kas “naapgad a mula” (AS, AT, Da), “cress” (Fn), “ruot” (Dy), ken “(dagiti) malba” (KJ, Le, RS). Agparang a ti patarus a “dagiti malba” napataud gapu iti panagkaarngi ti Hebreo a sao a mal·luʹach ken ti Griego a sao a mo·loʹkhe, a maipagarup a nainaig iti awag a “malba.” Nupay kasta, iti Job 30:4 dagiti managipatarus iti Griego a Septuagint saanda nga inusar ti mo·loʹkhe no di ket haʹli·ma (“naapgad a yerba,” LXX, Bagster), ket kas iti mal·luʹach, ti haʹli·ma naipagarup a tumukoy iti naapgad a raman ti mula wenno iti rehion a pagtubtubuanna.

Ti mula a masansan unay a maikunkuna a katupag ti mal·luʹach iti Biblia ket ti ngalogngalog wenno arig palungpong nga orache (Atriplex halimus). Gagangay a dumakkel daytoy a nasamek a bassit a mula iti katayag a 1 agingga iti 2 m (3 agingga iti 6.5 pie). Addaan ti mula iti babassit, napuskol, ken naalsem ti ramanna a bulbulong, ket iti primavera, mangpataud iti babassit a purpura a sabsabong. Agtubo kadagiti naapgad a daga.