Imutektekanyo Dagiti Nakaskasdaaw nga Aramid ti Dios
“Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami; awan ti maipadis kenka.”—SALMO 40:5.
1, 2. Ania dagiti makitatayo a nakaskasdaaw nga aramid ti Dios, ket tignayennatayo daytoy nga agaramid iti ania?
NO BASAENYO ti Biblia, nalakayo la a madlaw a nagaramid ti Dios kadagiti nakaskasdaaw a banag agpaay iti nagkauna nga ilina, ti Israel. (Josue 3:5; Salmo 106:7, 21, 22) Nupay saanen a bumalballaet ti Dios iti kasta a wagas kadagiti agdama a gannuat ti tao, makitatayo iti aglawlawtayo ti nakaad-adu a pammaneknek dagiti nakaskasdaaw nga aramidna. Adda ngarud rasontayo a makidanggay iti salmista a mangikuna iti kastoy: “Anian a nagadu ti aramidmo, O Jehova! Isuda amin inaramidmo buyogen ti kinasirib. Ti daga napno kadagiti pinataudmo.”—Salmo 104:24; 148:1-5.
2 Adu ita ti manglaklaksid wenno di mangikankano kadagiti nalawag a pammaneknek ti ar-aramid ti Namarsua. (Roma 1:20) Ngem maiparbeng nga usigentayo dagitoy ken mangaramid kadagiti konklusion mainaig iti takder ken rebbengentayo iti Nangaramid kadatayo. Dakkel ti maitulong ti Job kapitulo 38 agingga iti 41 no iti daytoy a banag, agsipud ta nadakamat dita no kasano a ni Jehova impakitana ken Job ti dadduma nga aspeto dagiti nakaskasdaaw nga aramidna. Usigenyo ti sumagmamano a napateg nga isyu a pinataud ti Dios.
Dagiti Aramid a Nakaskasdaaw ken Mangiparangarang iti Bileg
3. Kas nairekord iti Job 38:22, 23, 25-29, nagimtuod ti Dios maipapan kadagiti ania?
3 Insaludsod ti Dios ken Job: “Nakastrekkan aya kadagiti kamalig ti niebe, wenno makitam aya uray dagiti kamalig ti uraro, isuda nga inggawidko maipaay iti tiempo ti rigat, maipaay iti aldaw ti dangadang ken gubat?” Iti adu a paset ti daga, gagangayen ti niebe ken uraro. Intuloy ti Dios: “Siasino ti nangbisngay iti kalasugan a maipaay iti layus ken iti dalan a maipaay iti nakagurgurruod nga ulep ti bagyo, tapno mamagtudo iti rabaw ti daga a sadiay awan ti tao, iti rabaw ti let-ang a sadiay awan ti naindagaan a tao, tapno mangpennek kadagiti binagyo ken langalang a disso ken tapno mamataud iti itutubo ti ruot? Adda aya pannakaama ti tudo, wenno siasino ti nangipasngay kadagiti amor? Makintian ti pudno a pagtaudan ti yelo, ket no maipapan iti nagbalay a linnaaw ti langit, siasino ti pudno a mangyanak iti dayta?”—Job 38:22, 23, 25-29.
4-6. Iti ania nga anag a kurang ti pannakaammo ti tao maipapan iti niebe?
4 Kadagidiay agnanaed iti okupado unay a kagimongan ken agbibiahe mabalin nga ibilangda a parikut ti kaadda ti niebe. Kaskasdi, adu ti maay-ayatan iti niebe, yantangay mangpataud iti napintas a lugar a pangaramidan kadagiti naisangsangayan nga aktibidad bayat ti panawen ti lam-ek. Bayat a pampanunotenyo ti saludsod ti Dios, talaga kadi nga adu ti ammoyo maipapan iti niebe, uray laeng ti itsurana? Agpayso, ammotayon ti buya ti adu a niebe, personal man a nakitatayo wenno kadagiti retrato ti nabunton a niebe. Ngem komusta ngay dagiti saggaysa nga arbis ti niebe? Ammoyo kadi ti itsurada, nalabit sinukimatyo ida iti naggapuanda?
5 Addada dagiti dinekdekada a nangadal ken nangretrato kadagita. Ti maysa nga arbis ti niebe ket mabalin a buklen ti sangagasut a babassit a kristal a yelo a nagduduma ti kinapintasda. Kuna ti libro nga Atmosphere: “Agdindinamag ti awan inggana a panagduduma dagiti arbis ti niebe, ket nupay ipilit dagiti sientista nga awan linteg ti nakaparsuaan a manglapped iti pannakaduplikarda, pulos nga awan pay nabirokan a dua nga agpada nga arbis ti niebe. Ti maysa a panagsirarak iti kasta unay kaadu a niebe ket indauluan ni . . . Wilson A. Bentley, a nangbusbos iti nasurok nga 40 a tawen a nangsukimat ken nangretrato kadagiti arbis ti niebe babaen iti mikroskopio ket di pulos nakasarak iti dua nga eksakto nga agpada.” Ket uray ibagatayon nga adda agpada nga arbis, nupay karkarna dayta a mapasamak, mabalbaliwanna kadi dayta ti nakaskasdaaw ken nakaad-adu a kita ti arbis ti niebe?
6 Lagipenyo ti saludsod ti Dios: “Simrekka aya kadagiti kamalig ti niebe?” Adu ti mangmatmat kadagiti ulep kas pannakakamalig ti niebe. Mailadawanyo aya ti bagiyo a sumrek iti kasta a kamalig tapno sukimatenyo dagiti arbis ti niebe iti awan inggana a panagdudumada ken adalenyo no kasanoda a timmaud? Kuna ti maysa nga encyclopedia ti siensia: “Ti kasasaad ken punganay dagiti nucleus ti yelo, a nasken tapno tumangken dagiti babassit a tedted ti ulep iti temperatura nga agarup -40°F (-40°C), ket saan pay a nalawag.”—Salmo 147:16, 17; Isaias 55:9, 10.
7. Kasano kaadu ti ammo ti tao maipapan iti tudo?
7 Komusta met ngay ti tudo? Insaludsod ti Dios ken Job: “Adda aya pannakaama ti tudo, wenno siasino ti nangipasngay kadagiti amor (wenno linnaaw)?” Kuna ti isu met laeng nga encyclopedia ti siensia: “Gapu iti kinarikut ti panaggaraw ti atmospera ken ti nakaskasdaaw a panagbaliwbaliw iti alingasaw ken partikulo a linaon ti angin, kasla imposible ti mangaramid iti detalyado, sapasap a teoria no kasano a tumaud dagiti ulep ken tudo.” Iti simple a pannao, nangaramid dagiti sientista kadagiti detalyado a teoria, ngem dida naan-anay a mailawlawag ti maipapan iti tudo. Ngem ammoyo a napateg ti tudo, a mangsibug iti daga, mangbiag kadagiti mula, ken pagbalinenna a posible ken makaay-ayo ti biag.
8. Apay nga umiso dagiti sasao ni Pablo a nairekord iti Aramid 14:17?
8 Dikay kadi umanamong iti konklusion ni apostol Pablo? Indagadagna kadagiti sabsabali a kitaenda kadagitoy nakaskasdaaw nga aramid ti pammaneknek maipapan iti Daydiay mangar-aramid kadagita. Kinuna ni Pablo maipapan ken Jehova a Dios: “Saanna a binay-an nga awan makasaksi iti bagina iti panagaramidna ti naimbag, nga inikkannakayo kadagiti tudo manipud langit ken kadagiti nabunga a panawen, a pinunnona a naan-anay dagiti pusoyo iti taraon ken ragsak.”—Aramid 14:17; Salmo 147:8.
9. Kasano nga iparangarang dagiti nakaskasdaaw nga aramid ti Dios ti naindaklan a pannakabalinna?
9 Di pagduaduaan a daydiay Nangaramid kadagita a nakaskasdaaw ken makagunggona a banag ket addaan iti di matukod a pannakabalin ken naindaklan a sirib. No maipapan iti pannakabalinna, panunotenyo daytoy: Naikuna nga iti inaldaw, adda agarup 45,000 a bagyo a napakuyogan iti gurruod ken kimat, nasurok a 16 milion iti makatawen. Kayatna a sawen nga iti daytoy a kanito, agarup 2,000 a kakasta ti mapaspasamak. Dagiti komplikado nga ulep iti maysa a bagyo ket kiburen ti enerhia a katupag ti sangapulo wenno ad-adu pay a nuklear a bomba a naitinnag idi Gubat Sangalubongan II. Makitayo ti dadduma kadagita nga enerhia kas kimat. Malaksid a nakaam-amak dagiti kimat, kinapudnona makatulongda a mangpataud kadagiti nitrohena a makagteng iti daga ket agsepen dagiti mula kas natural a ganagan. No kasta, ti kimat ket enerhia a naiparangarang, ngem mangyeg met kadagiti napaypayso a pagimbagan.—Salmo 104:14, 15.
Ania ti Makunayo?
10. Ania ti sungbatyo kadagiti saludsod a masarakan iti Job 38:33-38?
10 Panunotenyo a dakayo ni Job, a pagsalsaludsodan ti Mannakabalin-amin a Dios. Di pagduaduaan nga umanamongkayo a di unay ikaskaso ti kaaduan a tattao dagiti nakaskasdaaw nga aramid ti Dios. Mabasatayo iti Job 38:33-38 no ania ti im-imtuoden ni Jehova kadatayo. “Naammuam aya dagiti paglintegan ti langlangit, wenno maisaadmo aya ti kinaturayna iti daga? Maipigsam aya ti timekmo uray agingga iti ulep, iti kasta maabbongannaka ti manglapunos a kinawadwad ti mismo a danum? Makaibaonka aya kadagiti kimat tapno mapanda ket kunaenda kenka, ‘Adtoykami!’? Siasino ti nangikabil iti sirib kadagiti palunapin ti ulep, wenno siasino ti nangited ti pannakaawat iti karkarna iti tangatang? Siasino ti makabilang nga apagpag-isu kadagiti ulep buyogen ti kinasirib, wenno dagiti burnay ti langit—siasino ti makaibalinsuek kadakuada, inton ti tapok maibukbok a kas agbalin a sinukog a masa, ken dagiti met laeng bingkol ti daga agtitipkelda?”
11, 12. Ania ti sumagmamano a banag a mangpaneknek a ti Dios ti Mangar-aramid kadagiti nakaskasdaaw a banag?
11 Napagsasaritaantayo ti sumagmamano laeng kadagiti punto nga indatag ni Eliu ken ni Job, ket inusigtayo ti sumagmamano kadagiti insaludsod ni Jehova ken ni Job “kas iti maysa a nabaneg a lalaki.” (Job 38:3) Maikunatayo a “sumagmamano” agsipud ta iti kapitulo 38 ken 39, intampok ti Dios ti dadduma pay a nakaskasdaaw a parparsua. Kas pagarigan, dinakamatna dagiti konstelasion ti langlangit. Siasino ti makaammo iti amin a linteg wenno alagaden a sursurotenda? (Job 38:31-33) Dinakamat ni Jehova ken ni Job ti dadduma kadagiti animal—ti leon ken ti wak, ti kalding iti kabambantayan ken ti sebra, ti atap a toro ken ti abestrus, ti nabileg a kabalio ken ti agila. No an-anagen, insaludsod ti Dios no ni Job ti nangted kadagiti galad dagiti nagduduma nga animal, tapno agbiag ken agpautda. Mabalin a magustuanyo nga adalen dagitoy a kapitulo, nangnangruna no kaay-ayoyo dagiti kabalio wenno dadduma pay nga animal.—Salmo 50:10, 11.
12 Mabalinyo met a sukimaten ti Job kapitulo 40 ken 41. Kiniddaw manen ni Jehova a sungbatan ni Job dagiti saludsod maipapan iti dua a partikular a parsua. Tuktukoyenna ditoy ti hipopotamo (Behemot), a nakadakdakkel ken napigsa, ken ti nakaam-amak a buaya ti Nilo (Leviatan). Nakaskasdaaw dagita a parsua a rumbeng nga imutektekantayo. Kitaentayo no ania ti makunatayo.
13. Ania ti epektona ken Job dagiti saludsod ti Dios, ket kasano nga apektarandatayo dagitoy a banag?
13 Ipakita ti Job kapitulo 42 no ania ti epektona ken Job ti panagsalsaludsod ti Dios. Laglagipenyo nga idi damo, napalalo ti pannakaseknan ni Job iti bagina ken iti sabsabali. Ngem gapu ta inawatna ti panangilinteg nga imparipirip dagiti saludsod ti Dios, binalbaliwan ni Job ti panangmatmatna. Inadmitirna: “Naammuak a kabaelam [Jehova] nga aramiden amin a bambanag, ket awan ti kapanunotan a saanmo a kabaelan a ragpaten. ‘Siasino daytoy a mangliblibeg iti pammatigmaan nga awanan pannakaammo?’ Gapuna nagsaoak, ngem saanko idi a maaw-awatan [dagiti] bambanag a nakaskasdaaw unay kaniak, isuda a saanko nga ammo.” (Job 42:2, 3) Wen, kalpasan a naimutektekanna dagiti nakaskasdaaw nga aramid ti Dios, kinuna ni Job a nakaskasdaaw unay kenkuana dagitoy a banag. Kalpasan ti panangusigtayo kadagitoy a nakaskasdaaw a parsua, pagsiddaawennatay met koma ti sirib ken pannakabalin ti Dios. Apay? Tapno laeng pagsiddaawantay ti naindaklan a bileg ken abilidad ni Jehova? Wenno adda dakdakkel a makagapu?
14. Ania ti reaksion ni David kadagiti nakaskasdaaw nga aramid ti Dios?
14 Bueno, iti Salmo 86, masarakantayo dagiti mainaig nga ebkas ni David, a nagkuna iti immun-una a salmo: “Ti langlangit idekdeklarada ti dayag ti Dios; ket maipapan iti aramid ti im-imana ibagbaga ti tangatang. Ti maysa nga aldaw kalpasan ti sabali pay nga aldaw mangyesngaw iti panagsao, ket ti maysa a rabii kalpasan ti sabali pay a rabii mangiparang iti pannakaammo.” (Salmo 19:1, 2) Ngem saan la a dayta ti imbaga ni David. Mabasatayo iti Salmo 86:10, 11: “Naindaklanka ken agar-aramidka iti nakaskasdaaw a bambanag; sika ti Dios, sika laeng. Isuronak, O Jehova, maipapan iti dalanmo. Magnaakto iti kinapudnom. Pagkaykaysaem ti pusok nga agbuteng iti naganmo.” Ti panagamanga ni David iti Namarsua gapu iti amin a nakaskasdaaw nga aramidna iramanna ti umiso a panagbuteng a buyogen ti panagraem. Matarusanyo no apay. Di kayat ni David a pagpungtoten Daydiay makabael a mangaramid kadagitoy a nakaskasdaaw a banag. Kastatay met koma.
15. Apay a maitutop ti napnuan panagraem a panagamak ni David iti Dios?
15 Sigurado a nabigbig ni David a yantangay nakabilbileg ti Dios ken kontroladona ti pannakabalinna, maaramatna daytoy maibusor iti asinoman a dina anamongan. Kadakuada, nakaam-amak dayta. Inyimtuod ti Dios ken Job: “Nakastrekkan aya kadagiti kamalig ti niebe, wenno makitam aya uray dagiti kamalig ti uraro, isuda nga inggawidko maipaay iti tiempo ti rigat, maipaay iti aldaw ti dangadang ken gubat?” Usaren ti Dios a pakigubat ti niebe, uraro, bagyo, angin, ken kimat. Ket anian a nagbileg unay dagitoy a puersa ti nakaparsuaan!—Job 38:22, 23.
16, 17. Ania ti mangipakita iti nakaskasdaaw a pannakabalin ti Dios, ket kasano nga inusarna ti kasta a pannakabalin iti napalabas?
16 Nalabit malagipyo ti sumagmamano a didigra iti lugaryo a pinataud ti maysa kadagitoy—bagyo, allawig, panagtudo ti uraro, wenno layus. Kas panangiladawan, idi arinunos ti tawen 1999, nakaam-amak a bagyo ti nangsalapon iti umabagatan a laud a Europa, a namagsiddaaw uray kadagiti eksperto iti paniempo. Naabut ti angin ti kapartak a 200 kilometro kada oras, a binakasanna ti rinibu nga atep, tinumbana dagiti poste ti koriente, ken binurang-itna dagiti trak. Padasenyo a sirmataen daytoy: Ti bagyo pinarut wenno binungtolna ti agarup 270 milion a kayo—10,000 iti laeng parke ti Versailles, iti ruar ti Paris. Minilion a pamilia ti naawanan iti koriente. Nganngani 100 ti natay. Napasamak amin dayta iti apagbiit a tiempo. Anian ti kapigsana!
17 Mabalin a ti maysa ipapanna a dagiti bagyo ket saan a maaw-awatan, awan turongna, ken di makontrol a paspasamak. Ngem ania ngata ti mapasamak no daydiay kabibilgan a Persona, a mangar-aramid kadagiti nakaskasdaaw a banag, ket usarenna dagita a puersa iti kontrolado a wagas? Inaramidnan ti kasta idi tiempo ni Abraham. Naammuan idi ni Abraham a ti Ukom ti intero a daga tiningitingna ti kinadakes ti dua a siudad, ti Sodoma ken Gomorra. Nakadakdakesda unay nga uray la dimmanon iti Dios dagiti reklamo kadakuada. Inruar ngarud ti Dios ti amin a nalinteg kadagita a nakondenar a siudad. Kuna ti historikal a rekord: “Idin pinagtudo ni Jehova iti asupre ken apuy manipud ken Jehova, manipud iti langlangit,” kadagidi a siudad. Nakaskasdaaw daydi nga aramid, ti pannakaisalakan dagiti nalinteg ken pannakadadael dagiti napeklan a managdakdakes.—Genesis 19:24.
18. Aniada a nakaskasdaaw a banag ti tuktukoyen ti Isaias kapitulo 25?
18 Idi agangay, inukom ni Jehova ti nagkauna a siudad ti Babilonia, a nalabit ti siudad a tuktukoyen ti Isaias kapitulo 25. Impadto ti Dios a marbekto ti Babilonia: “Ti maysa a siudad pinagbalinmo a gabsuon a batbato, ti maysa a nasarikedkedan nga ili a marmargaay a rebba, ti maysa a pagnaedan a torre dagiti ganggannaet a saanen a siudad, a saanto a maibangon manen uray agingga iti tiempo a di nakedngan.” (Isaias 25:2) Dagiti bumisbisita itatta iti ayan daydi a Babilonia mapasingkedanda a natungpal daytoy. Naiparna laeng kadi ti pannakadadael ti Babilonia? Saan. Imbes ketdi, nainkalintegan kadatayo ti konklusion ni Isaias: “O Jehova, sika ti Diosko. Itan-okka, idayawko ti naganmo, ta nagaramidka kadagiti nakaskasdaaw a banag, kadagiti pammatigmaan manipud kadagiti immuna a tiempo, iti kinamatalek, iti kinamapagpiaran.”—Isaias 25:1.
Dagiti Nakaskasdaaw nga Aramid iti Masanguanan
19, 20. Ania ti namnamaentayo a kaitungpalan ti Isaias 25:6-8?
19 Tinungpal idi ti Dios dayta a padto, ket nakaskasdaaw pay ti aramidenna iti masanguanan. Iti daytoy a konteksto a nangdakamatan ni Isaias kadagiti “nakaskasdaaw nga ar-aramid” ti Dios, adda maysa a mapagtalkan a padto a matungpalto pay laeng, kas iti pannakatungpal ti pannakaukom ti Babilonia. Ania dayta a ‘nakaskasdaaw a banag’ a naikari? Kuna ti Isaias 25:6: “Ket ni Jehova ti buybuyot pudno unay nga iyaramidannanto dagiti amin nga ili, iti daytoy a bantay, iti maysa a bangkete dagiti nataba unay a putahe, maysa a bangkete ti arak a napagtalinaed kadagiti ared-ed, dagiti nataba unay a putahe a napno iti pata, iti arak a napagtalinaed kadagiti ared-ed, a nasagat.”
20 Sigurado a matungpalto dayta a padto iti baro a lubong nga inkari ti Dios, a paspasungadentayon. Iti dayta a tiempo, maikkatton dagiti parikut a mangparparigat ita kadagiti adu a tattao. Kinapudnona, ipasigurado ti padto iti Isaias 25:7, 8 nga usarento ti Dios ti pannakabalinna nga agparsua tapno aramidenna ti maysa kadagiti nakaskasdaaw unay nga aramid iti intero a historia: “Pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa. Ket ti pakaumsian ti ilina ikkatennanto iti intero a daga, ta ni met laeng Jehova sinaona dayta.” Inadaw ni apostol Pablo dayta met laeng a teksto ket inyaplikarna iti panangpagungarto ti Dios kadagiti natay. Anian a nakaskasdaaw nga aramid dayta!—1 Corinto 15:51-54.
21. Aniada a nakaskasdaaw a banag ti aramidento ti Dios kadagiti natay?
21 Mapunasto pay dagiti lua a pinagarubos ti ladingit agsipud ta maikkatton dagiti pisikal a sakit dagiti tattao. Idi adda ditoy daga ni Jesus, inagasanna dagiti adu—pinaimbagna dagiti bulsek, dagiti tuleng, ken dagiti baldado. Kuna ti Juan 5:5-9 a pinaimbagna ti lalaki a 38 a tawenen a pilay. Iti panangmatmat dagiti nakaimatang, karkarna daytoy, maysa a nakaskasdaaw nga aramid. Ket talaga a nakaskasdaaw dayta! Ngem imbaga ni Jesus kadakuada nga ad-adda a nakaskasdaaw ti panangpagungarna kadagiti natay: “Dikay agsiddaaw iti daytoy, agsipud ta um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuarda, dagidiay nagaramid kadagiti naimbag a bambanag iti panagungar iti biag.”—Juan 5:28, 29.
22. Apay nga adda pangnamnamaan dagiti napanglaw ken naparigatan?
22 Sigurado a mapasamak dayta gapu ta ni Jehova ti nangikari. Masiguradoyo nga inton usaren ken ipakatna a siaannad ti naindaklan a pannakabalinna a mangisubli, nakaskasdaawto ti resultana. Ibatad ti Salmo 72 no anianto ti aramidenna babaen ti Anakna nga Ari. Iti kasta, agrangpayanto ti nalinteg. Aglaplapusananto ti talna. Ispalento ti Dios dagidiay napanglaw ken naparigatan. Inkarina: “Maaddanto ti naruay a bukbukel iti daga; iti tapaw dagiti bantay addanto ti panaglaplapusanan. Ti bungana kaslanto iti [nagkauna a] Libano, ket dagidiay aggapu iti siudad rumangpayadanto kas iti mulmula ti daga.”—Salmo 72:16.
23. Dagiti nakaskasdaaw nga aramid ti Dios tignayendatayo nga agaramid iti ania?
23 Nalawag nga adda panggapuantayo a mangimutektek kadagiti amin a nakaskasdaaw nga aramid ni Jehova—dagiti inaramidna iti napalabas, dagiti ar-aramidenna ita, ken dagiti inkarina nga aramiden iti asidegen a masanguanan. “Bendito koma ni Jehova a Dios, ti Dios ti Israel, nga isu laeng ti mangar-aramid kadagiti nakaskasdaaw nga aramid. Ket bendito koma ti nadayag a naganna agingga iti tiempo a di nakedngan, ket ti dayagna punnuenna koma ti intero a daga. Amen ken Amen.” (Salmo 72:18, 19) Kanayon ken sibabara nga isarsaritatayo koma dayta kadagiti kabagiantayo ken dadduma a tattao. Wen, ‘ti dayagna ideklaratayo kadagiti nasion, kadagiti amin nga ili ti nakaskasdaaw nga ar-aramidna.’—Salmo 78:3, 4; 96:3, 4.
Ania ti Sungbatyo?
• Kasano a dagiti saludsod a naidatag ken Job ibatadda ti limitasion ti pannakaammo ti tao?
• Aniada a nakaskasdaaw nga aramid ti Dios a naitampok iti Job kapitulo 37-41 ti nagustuanyo?
• Ania koma ti reaksiontayo kalpasan nga inusigtayo ti dadduma kadagiti nakaskasdaaw nga aramid ti Dios?
[Dagiti Ladawan iti panid 10]
Ania ti makunayo maipapan iti nakaskasdaaw a panagduduma dagiti arbis ti niebe ken ti nakaam-amak a kapigsa ti kimat?
[Credit Line]
snowcrystals.net
[Dagiti Ladawan iti panid 13]
Kanayon koma nga isarsaritayo dagiti nakaskasdaaw nga aramid ti Dios