Agrag-o ti Puso ni Jehova no Natarnawka
“Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.”—Prov. 27:11.
1, 2. (a) Ania a karit ni Satanas ti nadeskribir iti libro a Job? (b) Ania ti mangipakita nga intultuloy ni Satanas ti panangrurodna ken Jehova kalpasan ti ipapatay ni Job?
IMPALUBOS ni Jehova a suboken ni Satanas ti kinatarnaw ni Job a matalek nga adipen ti Dios. Kas resultana, napukaw ni Job dagiti dinguenna, natay dagiti annakna, ken nadadael ti salun-atna. Ngem saan laeng a ni Job ti pampanunoten ni Satanas idi kinaritna ti kinatarnaw ni Job. Kinuna ni Satanas: “Kudil maigapu iti kudil, ken isuamin nga adda iti maysa a tao itednanto maigapu iti kararuana.” Daytoy a karit ket nangpataud iti isyu a nangiraman iti sabali pay a tattao. Ken uray nabayagen a natay ni Job, karkariten pay laeng ni Satanas ti kinatarnaw ti tao.—Job 2:4.
2 Agarup 600 a tawen sipud idi nasuot ni Job, napaltiingan ni Solomon a mangisurat iti: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” (Prov. 27:11) Nabatad nga iti dayta a tiempo, ni Satanas karkaritenna pay laeng ni Jehova. Kanayonanna, iti sirmata a naited ken apostol Juan, makita a dagiti adipen ti Dios ket ak-akusaran ni Satanas idi napaksiat idiay langit sumagmamano a tiempo kalpasan a naipasdek ti Pagarian ti Dios idi 1914. Wen, uray ita a kangitingitan ti maudi nga al-aldaw daytoy nadangkes a sistema, karkariten pay laeng ni Satanas ti kinatarnaw dagiti adipen ti Dios!—Apoc. 12:10.
3. Aniada a nagpapateg a leksion ti maadaltayo iti libro a Job?
3 Ita, usigentayo ti tallo kadagiti nagpapateg a leksion a maadaltayo iti libro a Job. Umuna, dagiti pannakasuot ni Job ibutaktakda ti kinasiasino ti pudno a kabusor ti sangatauan ken ti utek ti panangbusor iti ili ti Dios. Dayta ket awan sabali no di ni Satanas a Diablo. Maikadua, aniaman a suot ti pakaipasanguantayo, ti nasinged a relasiontayo iti Dios ti tumulong kadatayo nga agtalinaed a natarnaw. Maikatlo, no rumsua dagiti pakasuotan ken masuboktayo iti sumagmamano a wagas, tulongannatayo ti Dios nga agibtur kas iti inaramidna ken Job. Ita, ar-aramiden daytoy ni Jehova babaen iti Saona, organisasionna, ken nasantuan nga espirituna.
Kanayon a Laglagipem no Siasino ti Pudno a Kabusor
4. Siasino ti mapabasol kadagiti mapaspasamak iti lubong?
4 Adu ti saan a mamati iti kaadda ni Satanas. Isu nga uray no madanagan dagiti tattao kadagiti mapaspasamak iti lubong, dida maamiris a ni Satanas a Diablo ti pudpudno a pakaigapuan dagita. Siempre, kaaduan a sagsagabaen ti sangatauan ket resulta met laeng dagiti aramid ti tattao. Pinili dagiti immuna a nagannaktayo a da Adan ken Eva ti di agpaituray iti Namarsua. Sipud idin, nagtignayen a simamaag dagiti simmaruno a kaputotan. Ngem kaskasdi a ti Diablo ti nangallilaw ken Eva a sumukir iti Dios. Isu ti nangpataud iti sangalubongan a sistema nga iturturayanna iti tengnga ti imperpekto ken matmatayen a sangatauan. Gapu ta ni Satanas “ti dios daytoy a sistema ti bambanag,” ipakpakita dagiti tattao ti isu met laeng a kababalin ti Diablo—kinapangas, rinnupir, imon, kinaagum, panangallilaw, ken kinarebelioso. (2 Cor. 4:4; 1 Tim. 2:14; 3:6; basaen ti Santiago 3:14, 15.) Dagita a kababalin ti pakaigapuan dagiti napolitikaan ken narelihiosuan a panagbibinnusor, gura, panagkunniber, ken riribuk a nangdegdeg iti pakarigatan ti sangatauan.
5. Ania ti kayattay nga aramiden iti nagpateg a pannakaammo nga ik-ikutantayo?
5 Anian a nagpateg ti pannakaammo nga ik-ikutantayo kas Saksi ni Jehova! Wen, ammotayo no siasino ti mapabasol kadagiti dumakdakes a kasasaad iti lubong. Gapuna, ditay kadi matignay a makiraman iti tay-ak ti ministerio tapno ipakaammo kadagiti tattao ti kinasiasino ti kangrunaan a manangriribuk? Ditay kadi maragsakan a makidasig iti pudno a Dios a ni Jehova, ken mangilawlawag iti sabsabali no kasano a pagpatinggaenna ni Satanas ken dagiti panagsagaba ti sangatauan?
6, 7. (a) Makinggapuanan iti pannakaidadanes dagiti pudno nga agdaydayaw? (b) Kasanotayo a matulad ti ulidan ni Eliu idi ugma?
6 Ni Satanas ti makinggapuanan saan la a kadagiti nakaro a panagladingit iti lubong no di pay ket kadagiti ibubusor a mapaspasaran ti ili ti Dios. Determinado a mangsuot kadatayo. Kinuna ni Jesu-Kristo ken apostol Pedro: “Simon, Simon, adtoy! kinalikaguman ni Satanas nga ikutannakayo tapno yakayakennakayo a kas iti trigo.” (Luc. 22:31) Umasping iti dayta, makapasar met iti nadumaduma a suot ti tunggal maysa kadatayo a sumursurot iti addang ni Jesus. Ni Pedro inyaspingna ti Diablo iti “agsursursor a kasla leon a ngumerngernger, nga agsapsapul iti alun-onenna.” Kinuna ni Pablo: “Amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.”—1 Ped. 5:8; 2 Tim. 3:12.
7 No agpasar iti trahedia ti maysa a kapammatiantayo, ditay koma ipapan a ni Jehova ti makinnakem iti dayta. Kas naammuantayon, ni Satanas ti talaga a kabusortayo. Imbes nga adaywantayo dayta a kabsat a kas iti inaramid dagiti sinsinan nangliwliwa ken Job, tuladentayo koma ni Eliu idi ugma, a nakisarita ken Job kas pudno a gayyem. Tulongantayo dayta a kabsat a mangsaranget iti kabusortayo a ni Satanas. (Prov. 3:27; 1 Tes. 5:25) Kalattayo a tulongan ti kapammatiantayo nga agtalinaed a natarnaw aniaman ti mapasamak tapno agrag-o ti puso ni Jehova.
8. Apay a di nagballigi ni Satanas a nangpasardeng ken Job a mangidaydayaw ken Jehova?
8 Ti immuna a pinukaw ni Satanas nga ik-ikutan ni Job ket dagiti dinguenna. Napateg dagita nga animal a nalabit nagserbi a pamastrekanna. Ngem inusarna met dagita iti panagdayaw. Kalpasan a nasantipikar ni Job dagiti annakna, “bimmangon a nasapa iti bigat ket nagidaton kadagiti mapuoran a sakripisio sigun iti bilangda amin; ta, kinuna ni Job, ‘mabalin a nagbasol ti annakko ken nailunodda ti Dios iti pusoda.’ Kasta ti kanayon nga aramiden ni Job.” (Job 1:4, 5) Nalawag a regular a nagidaton iti animal agpaay ken Jehova. Ngem idi mangrugin a masuot, saanen a makapagdaton. Awanen ti ‘napapateg a bambanag’ ni Job a pangidayawna ken Jehova. (Prov. 3:9) Ngem intultuloyna latta ti nagdayaw ken Jehova babaen kadagiti bibigna!
Pasingedem ti Relasionmo ken Jehova
9. Ania ti kapatgan nga ik-ikutantayo?
9 Nabaknangtay man wenno napanglaw, agtutubo wenno nataengan, nasalun-at wenno saan, mapasingedtayo ti relasiontayo ken Jehova. Aniaman ti mapasarantayo a suot, ti nasinged a relasiontayo iti Dios ti mamagtalinaed kadatayo a natarnaw ket iti kasta, maparag-otayo ti puso ni Jehova. Uray dagidiay bassit pay ti pannakaammoda iti kinapudno ket nakapagtalinaed a natured ken natarnaw.
10, 11. (a) Ania ti reaksion ti maysa a kapammatiantayo idi nasubok ti kinatarnawna? (b) Ania a natibker a sungbat ti impaay ni Valentina ken Satanas?
10 Usigem ti kapadasan ni Kabsat Valentina Garnovskaya, maysa kadagiti adu a Saksi idiay Russia a nagtalinaed a natarnaw kas ken Job iti laksid dagiti nakaro a suot. Idi 1945 ken agarup 20 ti tawennan, isu ket kinasabaan ti maysa a kabsat a lalaki. Kalpasan ti namindua pay nga isasarungkar ti kabsat tapno makisarita kenkuana maipapan iti Biblia, dinan pulos nakita dayta a kabsat. Nupay kasta, rinugian ni Valentina a kasabaan dagiti kaarrubana. Gapu iti dayta, naaresto ken nasentensiaan iti walo a tawen a pannakaibalud iti kampo. Nawayawayaan idi 1953, ket dagus nga intuloyna ti nangasaba. Ngem naaresto manen ket iti dayta a gundaway, nasentensiaan a maibalud iti 10 a tawen. Kalpasan ti sumagmamano a tawen iti nadumaduma a kampo, nayakar iti sabali nga ayan dagiti kakabsat a babbai a sadiay, sumagmamano kadakuada ti addaan iti Biblia. Maysa nga aldaw, adda kabsat a babai a nangipakita iti Biblia ken Valentina. Nagragsak ketdin daydi a kanito! Agasem, idi man laengen a nakakita ni Valentina iti Biblia sipud kinasabaan ti maysa a kabsat a lalaki idi 1945!
11 Idi 1967, nawayawayaan ni Valentina isu a naisimbolona met laengen ti dedikasionna ken Jehova babaen ti panagpabautisarna iti danum. Sireregta a nagserbi iti tay-ak ti ministerio bayat a siwayawaya agingga idi 1969. Iti dayta a tawen, naaresto manen ken nasentensiaan a maibalud iti tallo a tawen. Ngem intultuloy latta ni Valentina ti nangasaba. Sakbay a natay idi 2001, natulonganna ti 44 a tattao a nangammo iti kinapudno. Nabusbosna ti 21 a tawen kadagiti kampo ken pagbaludan. Situtulok nga insakripisiona ti amin a banag, agraman wayawayana tapno laeng makapagtalinaed a natarnaw. Sakbay a natay, kinuna ni Valentina: “Diak pay pulos naaddaan iti bukodko a lugar a pagnaedan. Maymaysa a maleta ti nakaikabilan dagiti amin a gargaretko, ngem naragsak ken kontentoak nga agserserbi ken Jehova.” Nagtibker ketdin dayta a sungbat ni Valentina ken Satanas, a nagkuna a di makapagtalinaed dagiti tattao a nasungdo iti Dios no maipasangoda kadagiti suot! (Job 1:9-11) Masiguradotayo a napagrag-ona ti puso ni Jehova. Masiertotayo pay a magagaran ti Dios a mangpagungarto ken Valentina agraman ti amin a sabsabali pay a natay a matalek Kenkuana.—Job 14:15.
12. Ania ti maaramidan ti ayat iti relasiontayo ken Jehova?
12 Ti pannakigayyemtayo ken Jehova ket maigapu iti ayattayo kenkuana. Apresiarentayo dagiti galadna ken aramidentayo ti amin a kabaelantayo nga agbiag maitunos kadagiti panggepna. Maisupadi iti ibagbaga ti Diablo, di mapilpilit ken awan kondision ti panagayattayo ken Jehova. Dayta a naimpusuan a panagayat pabilgennatayo nga agtalinaed a natarnaw iti sidong ti pakasuotan. Iti biang ni Jehova, ‘saluadannanto ti mismo a dalan dagidiay nasungdo’ kenkuana.—Prov. 2:8; Sal. 97:10.
13. Kasano ti panangmatmat ni Jehova kadagiti ar-aramidentayo agpaay kenkuana?
13 Ti ayat tignayennatayo a mangidayaw iti nagan ni Jehova, uray no mariknatayo a bassit ti maar-aramidantayo. Makitana dagiti nasayaat a motibotayo ken dinatay babalawen no ditay maaramidan ti amin a kayattayo nga aramiden. Saan laeng a ti maar-aramidantayo ti napateg no di ket dagiti pay rason nga ar-aramidentay dagita. Nupay nakaro ti panagladingit ken panagsagaba ni Job, imbagana kadagiti mangak-akusar kenkuana ti panangipategna iti daldalan ni Jehova. (Basaen ti Job 10:12; 28:28.) Iti maudi a kapitulo ti libro a Job, tinubngar ni Jehova da Elifaz, Bildad, ken Zofar agsipud ta dida nagsao iti pudno. Impasimudaag met ni Jehova ti pananganamongna ken Job babaen ti namimpat a panangdakamatna kenkuana kas “adipenko” ken babaen ti panangibilinna kenkuana nga ikararaganna dagidiay sinsinan a nangliwliwa kenkuana. (Job 42:7-9) Sapay koma ta agtignaytayo met iti wagas a magun-odantayo ti anamong ni Jehova.
Tulongan ni Jehova Dagiti Matalek nga Adipenna
14. Kasano ti panangtulong ni Jehova ken Job a mangatur iti panagpampanunotna?
14 Nupay imperpekto ni Job, nakapagtalinaed a natarnaw. Kadagiti narikut unay a kasasaad, pasaray saan met nga umiso ti panangmatmatna kadagiti bambanag. Kas pagarigan, kinunana ken Jehova: “Agpatulongak kenka, ngem saannak a sungbatan . . . Buyogen ti naan-anay a pannakabalin ta imam ingpem ti gura kaniak.” Kanayonanna, napalalo ti panangikalinteganna iti bagina idi kinunana: “Awanak iti biddut,” ken “awan kinaranggas kadagiti dakulapko, ken ti kararagko nasin-aw.” (Job 10:7; 16:17; 30:20, 21) Nupay kasta, ni Job ket siaasi a tinulongan ni Jehova babaen iti agsasaruno a saludsod nga inyimtuod ti Dios kenkuana tapno di sangkapanunot ni Job ti bagina. Gapu kadagita, ad-adda pay a naamiris ni Job a ti Dios ti katan-okan ken awan kaimudingan ti tao no maidilig Kenkuana. Inawat ni Job dagita a pannubngar ken inaturna ti bagina.—Basaen ti Job 40:8; 42:2, 6.
15, 16. Kadagiti ania a pamay-an a tultulongan ni Jehova dagiti adipenna ita?
15 Ipapaayan met ni Jehova dagiti adipenna ita iti naasi a panangiwanwan ken balakad a sigurado a pakagunggonaantayo. Kanayonanna, tagtagiragsakentayo dagiti napapateg a gunggona. Kas pagarigan, impaay ni Jesu-Kristo ti daton a pangsubbot isu nga addan pakaibatayan ti pannakapakawan ti basbasoltayo. Gapu iti dayta a sakripisio, mabalintayo ti maaddaan iti nasinged a relasion iti Dios uray no imperpektotayo. (Sant. 4:8; 1 Juan 2:1) No masuottayo, iyararawtayo met ti tulong ken bileg ti nasantuan nga espiritu ti Dios. Kasta met nga addaantayo iti kompleto a Biblia, a no basaen ken utobentayo ti linaonna, makapagsaganatayo a mangsaranget kadagiti pakasuotan ti pammatitayo. Ti panagadal tulongannatayo a mangtarus iti isyu ti sapasap a kinasoberano ken ti personal a kinatarnaw.
16 Kanayonanna, ad-adda pay a magunggonaantayo ta pasetnatayo ti sangalubongan a panagkakabsat nga ipapaayan ni Jehova iti naespirituan a taraon babaen iti “matalek ken masirib nga adipen.” (Mat. 24:45-47) Iti tunggal maysa kadagiti nasuroken a 100,000 a kongregasion dagiti Saksi ni Jehova, maang-angay dagiti gimong a mangisuro ken mangpabileg kadatayo a mangsaranget kadagiti posible a pakasuotan ti pammatitayo. Mapaneknekantay dayta iti kapadasan ni Shiela, maysa a balasitang a Saksi a taga-Alemania. Usigentayo dayta iti sumaruno a parapo.
17. Mangtedkay iti pagarigan no apay a nainsiriban ti naan-anay a panagtulnog kadagiti instruksion ti organisasion ni Jehova ita.
17 Maysa nga aldaw idiay eskuelaan, ti klase da Shiela ket apagbiit a pinanawan ti mangisursuro kadakuada. Nagnunumuan dagiti kaklasena a padasenda ti Ouija board. Dagus a pinanawan ni Shiela dagiti kaklasena ket maragsakan unay iti inaramidna ta kalpasan dayta, naammuanna a bayat nga us-usaren dagiti kaklasena ti Ouija board, narikna ti dadduma kadakuada ti kaadda dagiti demonio isu a nagtatarayda gapu iti buteng. Apay a dagus a pinanawan ni Shiela dagiti kaklasena? Inlawlawagna: “Sakbay dayta a pasamak, naadalmi iti gimong idiay Kingdom Hall dagiti peggad ti Ouija board. Isu nga ammokon ti aramidek. Kayatko a paragsaken ni Jehova, kas kuna ti Biblia iti Proverbio 27:11.” Naimbag laengen ta nakigimong ni Shiela ken impasnekna ti nagimdeng iti programa!
18. Determinadoka a mangaramid iti ania?
18 Sapay koma ta determinado ti tunggal maysa kadatayo nga agtulnog iti panangiwanwan a maaw-awattayo manipud iti organisasion ti Dios. Magun-odtayo ti kasapulantayo a tulong ken panangiwanwan babaen iti regular a pannakigimong, panagbasa iti Biblia, panagadal kadagiti naibasar-Biblia a publikasion, panagkararag, ken pannakitimpuyog kadagiti natataengan a Kristiano. Pagayatan ni Jehova nga agballigitayo ken namnamaenna nga agtalinaedtayo a natarnaw. Nagsayaat ketdin a pribilehio ti mangitan-ok iti nagan ni Jehova, agtalinaed a natarnaw, ken mangparag-o iti pusona!
Malagipyo Kadi?
• Ania dagiti kasasaad ken suot a gapuanan ni Satanas?
• Ania ti kapatgan nga ik-ikutantayo?
• Ania ti nakaibatayan ti pannakigayyemtayo ken Jehova?
• Ania ti sumagmamano kadagiti pamay-an a tultulongannatayo ita ni Jehova?
[Ladawan iti panid 8]
Dika kadi matignay a mangiranud iti ik-ikutam a nagpateg a pannakaammo?
[Ladawan iti panid 9]
Matulongantayo dagiti kapammatiantayo nga agtalinaed a natarnaw
[Ladawan iti panid 10]
Situtulok nga insakripisio ni Valentina ti amin a banag tapno makapagtalinaed a natarnaw