Malagipyo Pay Aya?

Inusigyo kadin a naimbag dagiti nabiit pay a ruar Ti Pagwanawanan? No kasta, nalabit interesadokayo a manglagip kadagiti sumaganad:

▫ Ania ti “tanda ti kinaimbag” nga imparang ni Jehova kadagiti sumursurot iti addang ni Jesus? (Salmo 86:17)

Ti “rag-o ti nasantuan nga espiritu” ti nangpapigsa kadagiti immuna a Kristiano nga agibtur iti pannakaidadanes. (1 Tesalonica 1:6) Umasping met laeng itatta, ni Jehova, ti Manangted ti “isuamin a sagut a nasayaat ken isuamin a sagut a naan-anay,” ket maragsakan a “mangted ti nasantuan nga espiritu kadagiti agdawat kenkuana.” (Santiago 1:17; Lucas 11:13) Isu a ti rag-o ti nasantuan nga espiritu ti nangiparang kadagiti pasurot ni Jesus iti “tanda ti kinaimbag.”​—12/15, pinanid 18-19.

▫ Apay a nasken nga awatentayo ti panangmatmat ti Dios iti panagulbod?

Kunaen ti Salmo 5:6 a “dadaelento [ti Dios] dagidiay agsao iti tinitiri.” Kunaen pay ti Apocalipsis 21:8 a ti bingay dagiti amin a managulbod isu ti “maikadua nga ipapatay.” Isu a ti panangawat iti panangmatmat ti Dios iti panagulbod ikkannatayo iti natibker a rason nga agsao ti pudno ket iti kasta awatentayto ti sagutna a biag.​—12/15, panid 23.

▫ Ania’t mangbukel iti wagas ti panagdaydayaw dagiti Samaritano? (Juan 4:20)

Iti nagamporan a panagdaydayawda, dagiti laeng umuna a lima a libro ni Moises, ti Pentateuko, ti inawat dagiti Samaritano kas Kasuratan. Idi agarup maikapat a siglo K.K.P., nangibangonda iti maysa a templo idiay Bantay Gerizim, a makiinnartap iti templo ti Dios idiay Jerusalem. Nupay nadadael ti templo dagiti Samaritano, agpapan ita, tinawen a ramrambakanda ti Paskua idiay Gerizim.​—1/1, panid 25.

▫ Rebbeng kadi nga itandudo dagiti Kristiano dagiti programa kontra iti polusion wenno programa a panagdalus?

Idi adda ditoy daga, saan a pinadas ni Jesus a risuten dagiti amin a sosial a parikut idi kaaldawanna. Inton ipatungpal ni Jehova dagiti nalinteg a prinsipiona iti intero a daga babaen ti Mesianiko a Pagarianna, agnanayonton a marisut dagiti parikut iti aglawlaw. Isu a natimbeng ti takder dagiti Saksi ni Jehova. Ti ayat iti kaarruba tignayenna ida a mangrespeto iti sanikua dagiti sabsabali, ngem siuumiso nga iyun-unada ti panangikasaba ti mensahe ti Pagarian ti Dios. (Mateo 6:33)​—1/1, panid 31.

▫ Kadagiti ania a pamay-an a nagserbi ni Jesus kas managawit iti lawag? (Juan 8:12)

Impamaysa ni Jesus ti biagna iti panangikaskasaba ti naimbag a damag ti Pagarian ti Dios. (Lucas 4:43; Juan 18:37) Imbutaktakna met dagiti narelihiusuan a kinaulbod ket iti kasta winayawayaanna iti naespirituan dagidiay adda iti narelihiusuan a pannakaadipen. (Mateo 15:3-9) Kangrunaanna, pinaneknekanna nga isut’ silaw ti lubong babaen ti panangtedna iti perpekto a natauan a biagna kas subbot. (Mateo 20:28; Juan 3:16)​—1/15, pinanid 10-11.

▫ Ania dagiti sumagmamano a rason no apay rumbeng nga agpasakoptayo ken Jehova a Dios?

Ni Jehova ti Sapasap a Soberano, ket rumbeng ngarud nga agpasakoptayo kenkuana. Mainayon pay, yantangay mannakabalin-amin ni Jehova, awan ti makabalin a bumusor kenkuana a sibaballigi, isu a ditay maliklikan ti agpasakop kenkuana. Naparsua ti amin nga adda nakemna a parsua tapno agserbida iti Nangaramid kadakuada, isut’ gapuna a rumbeng nga agpasakopda iti Dios iti isuamin.​—2/1, pinanid 10-11.

▫ Ania’t nakatulong ken Jose a mangliklik iti pannakiabig iti asawa ni Potifar?

Addaan ni Jose iti napigsa a puersa a mangtigtignay iti panunotna. Sipapanunot unay iti pannakirelasionna ken Jehova ken ammona a ti pannakiabig ket panagbasol saan laeng nga iti lakayna, no di pay ket nangnangruna iti Dios.​—2/15, panid 21.

▫ Ania’t kayat a sawen ni Jesus idi kinunana: “Siak . . . ti pudno”? (Juan 14:6)

Saan laeng a sinao ken insuro ni Jesus ti kinapudno; nagbiag a maitunos iti dayta ken inladawanna dayta. Gapuna, saan a maysa nga ideya laeng ti Kinakristiano; maysa a wagas ti panagbiag.​—3/1, panid 15.

▫ Ania a makaliwliwa a leksion ti linaon ti Salmo 51? Tulongannatayo daytoy a salmo a makabigbig a no nagbasoltayo ngem pudno nga agbabbabawitayo, ipangag ti naayat a nailangitan nga Amatayo ti panagpakaasitayo ken alangonennatayo iti kinaawan inanama. Nupay kasta, ti aniaman nga umsi nga inyegtayo iti nagan ni Jehova ti kangrunaan koma a pakaseknantayo.​—3/15, panid 18.

▫ Apay a di nainsiriban a pugtuantayo no siasino kadagidiay nabiit pay a natay ti mapagungar wenno di mapagungar?

Awan kalintegantayo a mangeddeng iti daytoy a banag. Ad-adda a nainsiriban no urayentayo dagiti pangngeddeng dagiti nalinteg nga Ukom, ni Jehova a Dios ken ni Jesu-Kristo. Mangipaay daytoy ti ad-adda a talna ti panunottayo a mangasikaso a nasaysayaat iti naituding nga aramidentayo. (Mateo 28:19, 20)​—3/15, panid 31.

▫ Aniat’ isimsimbolo ti pannakabautisar iti danum?

Ti bautismo ket pammarang a simbolo ti dedikasion ti maysa ken Jehova a Dios. Ti pannakaitaneb iti danum ipakpakitana a dagidiay nabautisaran ket nataydan iti kabibiag a naipamaysa iti bagbagida. Ti pannakairukuas iti danum isimsimbolona nga agbibiagda itan a maitunos iti pagayatan ti Dios, nga iyun-unada dayta iti biagda. (Mateo 16:24)​—4/1, pinanid 5-6.