Naruay ti Nasungdo nga Ayat ni Jehova

“Ni Jehova . . . naindaklan iti naayat a kinamanangngaasi.”​—SALMO 145:8.

1. Siasino dagiti ay-ayaten ti Dios?

“TI Dios ket ayat.” (1 Juan 4:8) Dayta a makaay-ayo a sasao paneknekanna a naibatay iti ayat ti panangituray ni Jehova. Agasenyo, uray dagiti tattao a saan nga agdaydayaw kenkuana magunggonaanda manipud iti init ken tudo a siaayat nga ipapaayna! (Mateo 5:44, 45) Gapu iti panagayat ti Dios iti sangatauan, uray dagiti kabusorna mabalinda ti agbabawi, umadani kenkuana, ken gumun-od iti biag. (Juan 3:16) Ngem iti din agbayag, talipuposen ni Jehova dagiti saan nga agbabawi a nadangkes tapno dagidiay agayat kenkuana matagiragsakda ti biag nga agnanayon iti maysa a nalinteg a baro a lubong.​—Salmo 37:9-11, 29; 2 Pedro 3:13.

2. Ania a naisangsangayan nga aspeto ti ayat ti ipakpakita ni Jehova kadagidiay addaan iti nasinged a relasion kenkuana?

² Ipakita ni Jehova ti panagayatna kadagiti pudno nga agdaydayaw kenkuana iti nagsayaat, manayon a wagas. Ti kasta nga ayat ket deskribiren ti maysa a Hebreo a sao a naipatarus kas “naayat a kinamanangngaasi,” wenno “nasungdo nga ayat.” Ni Ari David iti nagkauna nga Israel ipatpategna unay ti naayat a kinamanangngaasi ti Dios. Gapu iti personal a kapadasanna ken panangmennamennana iti pannakilangen ti Dios, addaan kompiansa nga inkanta ni David: “Ni Jehova . . . naindaklan iti naayat a kinamanangngaasi [wenno, “nasungdo nga ayat”].”​—Salmo 145:8.

Pakabigbigan Kadagidiay Nasungdo iti Dios

3, 4. (a) Kasano a ti Salmo 145 tulongannatayo a mangilasin kadagidiay nasungdo ken ni Jehova? (b) Kasano a ti Dios ‘bendituen’ dagiti nasungdo kenkuana?

³ No maipapan ken ni Jehova a Dios, kinuna ni Anna, ti ina ni propeta Samuel: “Ti saksaka dagiti nasungdona saluadanna.” (1 Samuel 2:9) Siasino dagita a ‘nasungdo’? Sumungbat ni Ari David. Iti panangitandudona kadagiti nakaskasdaaw a galad ni Jehova, kinunana: “Dagidiay nasungdom bendituendakanto.” (Salmo 145:10) Mabalin a masdaawkayo no kasano a dagiti tattao mabenditoda ti Dios. Maaramidda dayta kangrunaanna babaen ti panangidayaw wenno panangitan-okda kenkuana.

⁴ No kasta, dagiti nasungdo ken ni Jehova ket dagidiay mangusar iti ngiwatda a mangitan-ok kenkuana. Ania ti kanayon a pagsasaritaanda no aglalangenda ken no addada kadagiti Nakristianuan a gimong? Awan sabali no saan a ti Pagarian ni Jehova! Dagiti nasungdo nga adipen ti Dios umasping ti panangmatmatda iti panangmatmat ni David, a nangikanta: “Ti maipapan iti dayag ti kinaarim [Jehova] saritaendanto, ket ti maipapan iti kinamannakabalinmo sawendanto.”​—Salmo 145:11.

5. Apay nga ammotayo nga umim-imdeng ni Jehova no isu ti isarsarita dagiti nasungdo kenkuana?

⁵ Imdengan ngata ni Jehova ti panangidayaw dagiti nasungdo kenkuana? Wen, imdenganna ti ibagbagada. Iti padto mainaig iti pudno a panagdayaw iti kaaldawantayo, insurat ni Malakias: “Iti dayta a tiempo nagsao iti maysa ken maysa dagidiay agbuteng ken Jehova, tunggal maysa iti kaduana, ket ni Jehova nangipangpangag ken immim-imdeng. Ket maysa a libro a pakalaglagipan nangrugi a masuratan iti sanguananna maipaay kadagidiay agbuteng ken Jehova ken maipaay kadagidiay mangpampanunot iti naganna.” (Malakias 3:16) Makaay-ayo unay ken ni Jehova no dagiti nasungdo isaritada ti maipapan kenkuana, ket laglagipenna ida.

6. Ania a trabaho ti tumulong kadatayo a mangilasin kadagidiay nasungdo iti Dios?

⁶ Ti sabali pay a pakabigbigan dagiti nasungdo nga adipen ni Jehova isu ti kinatured ken sidadaan a pannakisaritada kadagidiay saan nga agdaydayaw iti pudno a Dios. Kinapudnona, dagidiay nasungdo iti Dios “ipakaammoda iti annak ti tattao ti mannakabalin nga ar-aramidna ken ti dayag ti kinangayed ti kinaarina.” (Salmo 145:12) Ikagkagumaanyo kadi ti mangbirok kadagiti gundaway a naan-anay a maisaritayo kadagiti di manamati ti maipapan iti kinaari ni Jehova? Saan a kas kadagiti gobierno ti tao nga asidegen nga aglabas, agnanayon ti kinaari ti Dios. (1 Timoteo 1:17) Naganat a maammuan dagiti tattao ti maipapan iti agnanayon a kinaari ni Jehova ken masapul a dumasigda kenkuana kas pasurotna. “Ti kinaarim maysa a kinaari iti amin a tiempo a di nakedngan,” inkanta ni David, “ket ti panagturaymo adda kadagiti amin nga agsasaruno a kaputotan.”​—Salmo 145:13.

7, 8. Ania ti napasamak idi 1914, ket ania ti mangpaneknek nga agturturay itan ti Dios babaen ti Pagarian ti Anakna?

⁷ Sipud idi 1914, adda kanayonan a rason no apay a nasken nga isarita ti kinaari ni Jehova. Iti dayta a tawen, impasdek ti Dios ti Mesianiko a Pagarian idiay langit ket ni Jesu-Kristo nga Anak ni David ti insaadna nga Ari. Tinungpal ngarud ni Jehova ti karina nga ipasdekna a sititibker ti kinaari ni David iti tiempo a di nakedngan.​—2 Samuel 7:12, 13; Lucas 1:32, 33.

⁸ Agturturay itan ni Jehova babaen ti Pagarian ti Anakna a ni Jesu-Kristo, kas paneknekan ti agtultuloy a pannakatungpal ti pagilasinan ti kaadda ni Jesus. Ti kangrunaan a paset dayta a pagilasinan isu ti trabaho nga impadto ni Jesus nga itungpal ti amin a nasungdo iti Dios, idi kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:3-14) Gapu ta dagiti nasungdo iti Dios sireregta a tungtungpalenda dayta a padto, nasurok nga innem a milion a lallaki, babbai, ken ubbing ti makipaspaset iti daytoy naindaklan, saanto pulos a mauliten a trabaho. Iti din agbayag, madadael ti amin a bumusbusor iti Pagarian ni Jehova.​—Apocalipsis 11:15, 18.

Makagunggona ti Panangituray ni Jehova

9, 10. Ania ti nagdumaan ni Jehova ken dagiti natauan nga agtuturay?

⁹ No dedikadotayo a Kristiano, adu ti gunggona nga iyeg ti relasiontayo iti Soberano nga Apo Jehova. (Salmo 71:5; 116:12) Kas pagarigan, gapu ta agbutengtayo iti Dios ken an-annurotentayo ti kinalinteg, matagiragsaktayo ti anamongna ken sumingedtayo kenkuana iti naespirituan. (Aramid 10:34, 35; Santiago 4:8) Maisupadi iti dayta, dagiti natauan nga agtuturay ti masansan a makita a kadua dagiti prominente a tattao, kas koma kadagiti lider ti militar, nabaknang a negosiante, wenno nalatak a tattao iti tay-ak ti ay-ayam ken pelikula. Sigun iti pagiwarnak idiay Africa a Sowetan, kastoy ti kinuna ti maysa a prominente nga opisial ti gobierno maipapan kadagiti napanglaw a lugar iti pagilianna: “Maawatak no apay a kaaduan kadatayo ti agkedked a mapan kadagiti kasta a lugar. Ditay ngamin kayat a panunoten nga adda dagiti kasta a kasasaad. Masidir ti konsiensiatayo ken mabaintayo gapu ta ammotayo a nangina [dagiti lugan] a manmanehuentayo.”

¹⁰ Siempre, adda dagiti natauan nga agtuturay a pudpudno a maseknan iti pagimbagan dagiti iturayanda. Ngem uray ti kasingpetan kadakuada dida am-ammo a talaga dagiti iturayanda. Maisaludsodtayo ngarud: Adda kadi asinoman nga agturay a mangipateg iti amin nga iturayanna, a dagus a tumulong iti tunggal maysa no agkasapulanda iti tulong? Wen, adda. Insurat ni David: “Ni Jehova mangipaay iti saranay kadagiti amin a mapasag, ket patakderenna ti isuamin a maparukob.”​—Salmo 145:14.

11. Aniada a suot ti mapasaran dagiti nasungdo iti Dios, ken ania a tulong ti magun-odda?

¹¹ Adu a suot ken kalamidad ti mapasaran dagiti nasungdo ken ni Jehova a Dios gapu iti kinaimperpektoda ken gapu ta agbibiagda iti lubong nga adda iti sidong ti pannakabalin ni Satanas, “daydiay nadangkes.” (1 Juan 5:19; Salmo 34:19) Mapasaran dagiti Kristiano ti pannakaidadanes. Dadduma ti agsagaba kadagiti nakaro a sakit wenno mapukawan iti ay-ayaten. No dadduma, ti mismo a panagkamali dagiti nasungdo ken ni Jehova ti mabalin a ‘mamagrukob’ kadakuada iti pannakaupay. Ngem aniaman a suot ti umapay kadakuada, kanayon a sidadaan ni Jehova a mangipaay iti liwliwa ken naespirituan a bileg iti tunggal maysa kadakuada. Ti Ari a ni Jesu-Kristo kasta met laeng ti naayat a pannakaseknanna kadagiti nasungdo nga iturayanna.​—Salmo 72:12-14.

Makapnek a Taraon iti Umiso a Tiempo

12, 13. Kasano ti panangpennek ni Jehova kadagiti kasapulan ti “tunggal sibibiag a banag”?

¹² Gapu iti naruay a naayat a kinamanangngaasina, ipaay ni Jehova ti amin a kasapulan dagiti adipenna. Nairaman iti dayta ti panangipaayna iti mangpakired a taraon. Insurat ni Ari David: “Kenka dagiti mata ti isuamin kumitada a siiinanama, ket ipaaymo kadakuada ti taraonda iti panawenna. Uk-ukradem ta imam ken pempennekem ti tarigagay ti tunggal sibibiag a banag.” (Salmo 145:15, 16) Uray kadagiti panawen ti didigra, mabalin nga imaniobra ni Jehova dagiti bambanag tapno dagiti nasungdo kenkuana maaddaanda iti ‘tinapay iti dayta nga aldaw.’​—Lucas 11:3; 12:29, 30.

¹³ Kinuna ni David a mapennek ti kasapulan ti “tunggal sibibiag a banag,” agraman dagiti animal. No saan a gapu iti nawadwad a mula ditoy daga ken iti taaw, awan koma ti oksihena nga angsen wenno pagtaraon dagiti parsua nga adda iti baybay, iti tangatang, ken iti daga. (Salmo 104:14) Ngem ni Jehova siguraduenna a maipaay ti amin a kasapulanda.

14, 15. Kasano a maipapaay ita ti naespirituan a taraon?

¹⁴ Saan a kas kadagiti animal, adda naespirituan a kasapulan dagiti tattao. (Mateo 5:3) Anian a nagsayaat ti panangpennek ni Jehova kadagiti naespirituan a kasapulan dagiti nasungdo kenkuana! Sakbay ti ipapatayna, inkari ni Jesus a “ti matalek ken masirib nga adipen” ipaayanda dagiti pasurotna iti naespirituan a “taraon iti umiso a tiempo.” (Mateo 24:45) Ti natda kadagiti 144,000 a napulotan buklenda ti klase adipen ita. Babaen kadakuada, ipapaay ni Jehova ti nawadwad a naespirituan a taraon.

¹⁵ Kas pagarigan, kaaduan kadagiti adipen ni Jehova ita ti magunggonaan manipud iti baro ken umiso a patarus ti Biblia iti bukodda a pagsasao. Anian a nagsayaat a bendision ti Baro a Lubong a Patarus ti Nasantuan a Kasuratan! Maysa pay, minilion a katulongan iti panagadal iti Biblia ti agtultuloy a maipabpablaak iti nasurok a 300 a lenguahe. Amin dagitoy a naespirituan a taraon ket bendision kadagiti pudno a managdaydayaw iti intero a daga. Asino ti maikari iti pammadayaw kadagita nga amin a gapuanan? Ni Jehova a Dios. Gapu iti naayat a kinamanangngaasina, pinagbalinna a posible para iti klase adipen a maipaayda ti ‘taraon iti panawenna.’ Babaen kadagita a probision, napennek “ti tarigagay ti tunggal sibibiag” nga adda iti agdama a naespirituan a paraiso. Ken anian a makapagragsak kadagiti adipen ni Jehova ta manamnamada nga asidegen a makitada ti panagbalin ti daga a maysa a literal a paraiso!​—Lucas 23:42, 43.

16, 17. (a) Ania dagiti pagarigan a mangipakita a dimteng ti naespirituan a taraon iti umiso a tiempo? (b) Kasano nga inyebkas ti Salmo 145 ti rikna dagiti nasungdo iti Dios mainaig iti kangrunaan nga isyu a pinataud ni Satanas?

¹⁶ Usigentayo ti maysa a nagsayaat a naespirituan a taraon a naawat iti umiso a tiempo. Idi 1939, bimtak ti Gubat Sangalubongan II idiay Europa. Iti dayta met laeng a tawen, ti Nobiembre 1 a ruar Ti Pagwanawanan ket naglaon iti artikulo a napauluan “Neutralidad.” Gapu iti nalawag nga impormasion a naipaay, nabigbig dagiti Saksi ni Jehova iti intero a lubong a kasapulanda a taginayonen ti naan-anay a neutral a takderda mainaig kadagiti aktibidad dagiti aggugubat a nasion. Nakapungtot kadakuada dagiti gobierno ti agkalaban a dasig kabayatan dayta innem a tawen a panaggugubat. Ngem iti laksid ti pannakaiparit ken pannakaidadanes, dagiti nasungdo iti Dios intultuloyda nga inkasaba ti naimbag a damag ti Pagarian. Manipud 1939 agingga 1946, naparaburanda iti nakaskasdaaw a 157 porsiento a panagrang-ay. Kanayonanna, nakatulong ti nagsayaat a rekord ti kinatarnawda kabayatan ti gubat tapno mailasin dagiti tattao ti pudno a relihion.​—Isaias 2:2-4.

¹⁷ Saan laeng a naintiempuan no di ket naan-anay a makapnek dagiti naespirituan a taraon nga ipapaay ni Jehova. Bayat ti kangitingitan ti panaggugubat dagiti nasion idi Gubat Sangalubongan II, naparegta ti ili ni Jehova a mangipangpangruna iti banag nga adayo a napatpateg ngem iti bukodda a pannakaisalakan. Tinulongan ida ni Jehova a mangtarus iti kangrunaan nga isyu, a pakairamanan ti intero nga uniberso: ti kalintegan ni Jehova a mangituray. Anian a makaparagsak a maammuan a babaen ti kinasungdoda, adda naitulong ti tunggal Saksi ni Jehova iti pannakaalangon ti kinasoberano ni Jehova ken iti panangpaneknek nga ulbod ti Diablo! (Proverbio 27:11) Saan a kas ken ni Satanas, a nangpardaya iti Dios ken iti wagas ti panangiturayna, dagiti nasungdo ken ni Jehova itultuloyda nga ideklara iti publiko: “Ni Jehova nalinteg iti amin a daldalanna.”​—Salmo 145:17.

18. Aniada a nabiit pay a pagarigan ti mangipakita a naintiempuan ken naan-anay a makapnek dagiti naespirituan a taraon?

¹⁸ Ti maysa pay a pagarigan ti naintiempuan, makapnek a naespirituan a taraon isu ti libro nga Umadanika ken Jehova, a nairuar iti ginasut a “Dagiti Naregta a Manangiwaragawag iti Pagarian” a Kombension Distrito a naangay iti intero a lubong idi 2002/03. Daytoy a libro, a naggapu iti “matalek ken masirib nga adipen” ken impablaak dagiti Saksi ni Jehova, itampokna dagiti agkakaimbag a galad ni Jehova a Dios, agraman dagidiay nadakamat iti Salmo 145. Daytoy a nagsayaat a libro sigurado a dakkel ti maitulongna kadagiti nasungdo iti Dios tapno ad-adda a mayadanida kenkuana.

Tiempo Tapno Ad-adda nga Umadani ken ni Jehova

19. Ania a kritikal a tiempo ti umad-adanin, ket ania ti nasken nga aramidentayo?

¹⁹ Umad-adanin ti maysa a kritikal a tiempo ti pannakarisut ti isyu maipapan iti kinasoberano ni Jehova. Kas naipadto iti Ezequiel kapitulo 38, asidegen a naan-anay a tungpalen ni Satanas ti akemna kas “Gog iti daga ti Magog.” Addanto ti sangalubongan a panangraut iti ili ni Jehova. Naan-anayto nga ikagumaan ni Satanas a dadaelen ti kinatarnaw dagiti nasungdo iti Dios. Iti dayta a tiempo, dagiti agdaydayaw ken ni Jehova masapul nga umararawda kenkuana, nga ipakaasida pay ketdi ti tulongna. Mayaleng-alengto kadi ti nadayaw a panagbuteng ken panagayatda iti Dios? Saan, ta kuna ti Salmo 145: “Ni Jehova asideg kadagidiay amin nga umaw-awag kenkuana, kadagidiay amin nga umawag kenkuana iti kinapudno. Ti tarigagay dagidiay agbuteng kenkuana aramidennanto, ken ti panagpatulongda denggennanto, ket isalakannanto ida. Ni Jehova saluadanna amin dagidiay mangay-ayat kenkuana, ngem amin dagidiay nadangkes talipuposennanto.”​—Salmo 145:18-20.

20. Iti din agbayag, kasano a matungpal dagiti sasao ti Salmo 145:18-20?

²⁰ Anian a makapagagar a mariknanto ti kinaasideg ni Jehova ken ti mangisalakan a pannakabalinna inton talipuposenna ti amin a nadangkes! Iti dayta a kritikal a tiempo, a nakaas-asidegen, ‘dagidiayto laeng umawag kenkuana iti kinapudno’ ti ipangag ni Jehova. Sigurado nga iyaleng-alengna dagiti managinsisingpet. Nalawag nga ipakita ti Sao ti Dios nga awan serserbina ti aniaman a naladaw a panangawag dagiti nadangkes iti naganna.​—Proverbio 1:28, 29; Mikias 3:4; Lucas 13:24, 25.

21. Ania ti mangipakita a dagiti nasungdo ken ni Jehova pagragsakanda nga usaren ti nagan ti Dios?

²¹ Itan ti tiempo a dagiti agbuteng ken ni Jehova ‘umawagda kenkuana iti kinapudno.’ Dagiti nasungdo kenkuana pagragsakanda nga usaren ti naganna kadagiti kararagda ken no agkomentoda kadagiti gimong. Usarenda ti nagan ti Dios kadagiti gagangay a saritaan. Ken situtured nga ipakaammoda ti nagan ni Jehova iti publiko a ministerioda.​—Roma 10:10, 13-15.

22. Apay a napateg nga itultuloy nga idian dagiti nailubongan a kababalin ken tarigagay?

²² Tapno agtultuloy a makagunggona kadatayo ti nasinged a relasiontayo ken ni Jehova a Dios, napateg met nga itultuloytayo nga idian dagiti bambanag a makadangran iti naespirituan kas iti materialismo, saan a nasayaat a paglinglingayan, saan a manangpakawan, wenno kinaawan ti pannakaseknan kadagiti agkasapulan. (1 Juan 2:15-17; 3:15-17) No saan a maatur dagiti kasta a kababalin ken tarigagay, mabalin nga agturongda iti panagaramid iti nadagsen a basol ken pannakaikkat ti anamong ni Jehova. (1 Juan 2:1, 2; 3:6) Nainsiriban a kanayon a panunoten a dagidiay laeng agtalinaed a matalek ken ni Jehova ti agtultuloy a pakitaanna iti naayat a kinamanangngaasi, wenno nasungdo nga ayat.​—2 Samuel 22:26.

23. Ania nga engrande a masanguanan ti agur-uray kadagiti amin a nasungdo iti Dios?

²³ Taginayonentayo ngarud koma a nakasentro ti isiptayo iti engrande a masanguanan nga agur-uray kadagiti amin a nasungdo ken ni Jehova. No aramidentayo dayta, adda nagsayaat a namnamatayo a maibilang kadagidiay mangitan-ok, mangbendito, ken mangidaydayaw ken ni Jehova “iti intero nga agmalem” ken “iti mismo nga agnanayon.” (Salmo 145:1, 2) Sapay koma ngarud ta ‘agtalinaedtayo iti ayat ti Dios maipaay iti agnanayon a biag.’ (Judas 20, 21) Bayat nga agtultuloy a magunggonaantayo kadagiti nagsayaat a galad ti nailangitan nga Amatayo, a pakairamanan ti naruay a naayat a kinamanangngaasi nga ipakpakitana kadagidiay agayat kenkuana, sapay koma ta tuladentayo a kanayon ti panangmatmat ni David a nayebkas kadagiti maudi a sasao ti Salmo 145: “Ti pakaidaydayawan ni Jehova sawento ti ngiwatko; ket ti isuamin a lasag bendituenda koma ti nasantuan a naganna agingga iti tiempo a di nakedngan, iti mismo nga agnanayon.”

Ania ti Sungbatyo?

• Sigun iti Salmo 145, ania ti maysa a pakabigbigan kadagidiay nasungdo iti Dios?

• Kasano a ni Jehova ‘penkenna ti tarigagay ti tunggal sibibiag a banag’?

• Apay a masapul nga umadanitayo ken ni Jehova?

[Ladawan iti panid 16]

Dagiti nasungdo iti Dios pagragsakanda a pagsasaritaan dagiti nabileg nga aramidna

[Ladawan iti panid 17]

Dagiti adipen ni Jehova situtured nga isuroda kadagiti ganggannaet ti dayag ti kinaarina

[Dagiti Ladawan iti panid 18]

Animals: Parque de la Naturaleza de Cabárceno

[Credit Line]

Taraonan ni Jehova ti “tunggal sibibiag a banag”

[Ladawan iti panid 19]

Pabilgen ken iwanwan ni Jehova dagiti nasungdo kenkuana, a mangikararag iti tulongna