Idayawyo ti Dios Saan a ti Tao

ITI naglabas a bulbulan, dagiti managayat iti kinalinteg iti intero a lubong nasursuroda no kasano a maidaydayawda ti Dios bayat a nagtataripnongda iti “Idayawyo ti Dios” a Kombension Distrito dagiti Saksi ni Jehova. Repasuentayo ti makaisuro a programa a naiparang.

Ti naibatay-Biblia a programa ket nagpaut iti tallo nga aldaw iti kaaduan kadagiti nakikombension ken uppat nga aldaw kadagiti nakatabuno iti espesial nga internasional a kombension. Nakangngeg dagiti timmabuno iti nasurok a 30 a Nainkasuratan a paset, agraman dagiti palawag a nangpauneg iti naespirituan a pannakaawat, dagiti kapadasan a makapabileg iti pammati, dagiti demostrasion a nangitampok iti praktikal nga aplikasion dagiti prinsipio ti Biblia, ken maysa a full-costume a drama a nangipakita kadagiti suot a sinango dagiti Kristiano idi umuna a siglo. No natabunuanyo ti maysa kadagiti kombension, apay a diyo repasuen dagiti innotaryo bayat a basbasaenyo daytoy nga artikulo? Masiguradomi nga ipalagipna dagiti nagsayaat ken aglaplapusanan a naespirituan a padaya, ken makaisuro pay.

Tema ti Umuna nga Aldaw: “Maikarika, Jehova, . . . nga Umawat iti Dayag”

Kalpasan ti panglukat a kanta ken kararag, sibabara nga inabrasa ti ispiker ti amin a timmabuno babaen ti maysa a palawag a naisentro iti kangrunaan a nakairantaan ti kombension: “Nagtataripnongtayo Tapno Idaydayawtayo ti Dios.” Iti panangadawna iti Apocalipsis 4:11, impaganetget ti ispiker ti pannakatema ti kombension. Dagus nga inlawlawagna no ania ti kaipapanan ti panangipadayag iti Dios. Babaen ti libro a Salmo, impaganetgetna a ti panangipadayag iti Dios iramanna ti ‘panagdayaw,’ “panagyaman,” ken ‘panangidayaw.’​—Salmo 95:6; 100:4, 5; 111:1, 2.

Ti simmaruno a paset ket napauluan iti “Naparaburan Dagidiay Mangidayaw iti Dios.” Adda makapainteres a nadakamat ti ispiker. Yantangay ti nasurok nga innem a milion a Saksi ni Jehova ket masarakan iti 234 a pagilian iti intero a daga, makuna a maidaydayaw ni Jehova iti aldaw ken rabii. (Apocalipsis 7:15) Karaman iti daytoy a paset ti pananginterbiu kadagiti kakabsat a lallaki ken babbai nga adda iti espesial a kita ti amin-tiempo a panagserbi, ket makapabileg dayta kadagiti timmabuno.

Simmaruno a naipalawag ti “Dagiti Parsua Ipaduyakyakda ti Dayag ti Dios.” Nupay naulimekda, ti pisikal a langlangit itan-okda ti kinanaindaklan ti Dios ken tulongandatayo a mangpauneg ti apresasiontayo iti naayat a panangaywanna. Detalyado a nailawlawag dayta.​—Isaias 40:26.

Nasubok ti kinatarnaw dagiti pudno a Kristiano babaen dagiti pannakaidadanes, ibubusor, nailubongan nga impluensia, ken pagannayasan nga agbasol. Gapuna, sigagagar a nagatension dagiti agdengdengngeg iti palawag a “Magnakayo iti Dana ti Kinatarnaw.” Maysa daytoy a bersikulo por bersikulo a panangilawlawag iti maika-26 a kapitulo ti Salmo, agraman ti pananginterbiu iti maysa nga ages-eskuela a Saksi a nagtalinaed a natibker iti moral ken iti maysa a mangbusbusbos iti adu a panawenna kadagiti kuestionable a paglinglingayan ngem nangaramid kadagiti panagbalbaliw tapno madaeranna ti parikut.

Nagngudo ti programa iti bigat babaen ti pannakatema a palawag a, “Dagiti Nadayag a Naimpadtuan a Sirmata Gutugotendatayo!” Dinakamat ti ispiker ti ulidan ni propeta Daniel ken da apostol Juan ken Pedro, dagidiay nagutugot ti pammatida babaen dagiti nadayag a naimpadtuan a sirmata mainaig iti pannakaipasdek ken panagtignay ti Mesianiko a Pagarian ti Dios. Kadagidiay nalabit a nakalipat kadagiti nalawag nga ebidensia nga agbibiagtayon iti panawen ti panungpalan, kinuna ti ispiker: “Sapay koma ta dagiti kasta a kakabsat mabigbigda manen ti kinapudno ti kaadda ni Kristo iti nadayag a Pagarian ken matulongan ida a bumileg manen iti naespirituan.”

Nangrugi ti programa iti malem babaen ti palawag a napauluan “Maipalgak Kadagiti Napakumbaba ti Dayag ni Jehova.” Inlawlawag ti ispiker no kasano nga inyulidan ni Jehova ti kinapakumbaba, nupay isu ti kangatuan a Persona iti uniberso. (Salmo 18:35) Maay-ayo ni Jehova kadagidiay pudno a napakumbaba, ngem kagurana dagidiay mangipakita iti kinapakumbaba kadagiti laeng kakadua wenno superiorda idinto ta tratuenda a sigugubsang dagidiay adda iti sidongda.​—Salmo 138:6.

Kalpasanna, nausig ti padto ti Biblia babaen ti maysa a simposium a nangitampok kadagiti nadumaduma nga aspeto ti kangrunaan a tema: “Ti Padto ni Amos​—Ti Mensahena Para iti Kaaldawantayo.” Iti panangipatuldona iti ulidan ni Amos, ti immuna nga ispiker inturongna ti atension iti responsabilidadtayo a mangpakdaar kadagiti tattao maipapan iti umad-adani a panangukom ni Jehova. Ti tema ti palawagna ket “Sawenyo a Situtured ti Sao ti Dios.” Inyimtuod ti maikadua nga ispiker: “Pagpatinggaento ngata ni Jehova ti kinadakes ken panagsagaba ditoy daga?” Ti pasetna a “Ti Panangukom ti Dios Kadagiti Nadangkes” ipakitana a ti panangukom ti Dios ket kanayon a nainkalintegan, di maliklikan, ken napili laeng dagidiay dadaelenna. Ti maudi nga ispiker iti simposium intampokna ti tema a “Ni Jehova Sukimatenna ti Puso.” Dagidiay agtarigagay a mangay-ayo ken ni Jehova nasken nga ipangagda ti sasao ti Amos 5:15: “Guraenyo ti dakes, ket ayatenyo ti naimbag.”

Mabalin a maabuso dagiti naingel nga inumen, kas iti arak a mangparagsak iti puso. Iti palawagna a “Liklikanyo ti Silo ti Nalabes a Panaginum iti Arak,” sinaggaysa ti ispiker dagiti pisikal ken naespirituan a pagdaksan ti nalabes a panaginum iti arak, uray saan nga agbartek. Nangipaay iti mangiwanwan a prinsipio: Gapu ta agduduma ti epekto ti arak iti tunggal tao, makuna a panaglablabes no maapektaranen ti ‘praktikal a kinasirib ken kabaelanyo nga agpanunot,’ kasano man kaadu wenno kabassit ti inumenyo.​—Proverbio 3:21, 22.

Gapu ta agbibiagtayon iti napeggad a tiempo, makaliwliwa ti simmaganad a palawag, “Ni Jehova ti ‘Sarikedkedtayo iti Tiempo ti Riribuk.’” Ti kararag, nasantuan nga espiritu, ken dagiti pada a Kristiano makatulongda tapno makapagballigitayo.

Ti maudi a palawag iti dayta nga aldaw, “‘Ti Nasayaat a Daga’​—Panirpatan iti Paraiso,” ket nagngudo iti makaparagsak a sorpresa para iti amin​—maysa a baro a publikasion nga aduan kadagiti mapa ti Biblia! Napauluan dayta iti Kitaem ti Nasayaat a Daga.

Tema ti Maikadua nga Aldaw: “Ti Dayagna Ideklarayo Kadagiti Nasion”

Kalpasan a nasukimat ti teksto dayta nga aldaw, naiparang ti maikadua a simposium ti programa, a natemaan “Iyanninawtayo ti Dayag ni Jehova a Kasla Kadagiti Sarming.” Nailawlawag iti umuna a paset ti “Panangirakurak iti Naimbag a Damag iti Sadinoman” ket inramanna dagiti demostrasion dagiti aktual a kapadasan iti tay-ak ti serbisio. Ti maikadua a paset inramanna ti maysa a demostrasion ti panagsarungkar bayat nga imparang ti ispiker ti tema a “Panangikkat iti Abbungot Dagidiay Nabulsekan.” Iti maudi a paset a napauluan “Aramidentayo Dayta nga Ad-adda Pay a Naan-anay iti Ministeriotayo,” makapagagar dagiti interbiu maipapan kadagiti kapadasan iti panangasaba.

Ti simmaruno a paset ti programa ket napauluan “Magurgura nga Awan Gapgapuna.” Naglaon dayta kadagiti makapabileg nga interbiu kadagiti matalek a kakabsat a nangsalimetmet iti kinatarnawda iti sidong ti ibubusor babaen ti tulong ti Dios.

Ti maysa a mapadpadaanan a paset dagiti kombension isu ti palawag ti bautismo a sarunuen ti naan-anay a pannakaitaneb dagiti amin a kualipikado a kandidato. Ti pannakaitaneb iti danum isimbolona ti naan-anay a panagdedikar ti maysa a tao ken ni Jehova. Gapuna, maitutop ti suheto a “Pakaidayawan ti Dios ti Panagbiag a Mayannurot iti Dedikasiontayo.”

Nangrugi ti programa iti malem babaen ti palawag a mangiparparegta iti panangsukimat iti bagi, “Panangtulad iti Panangmatmat ni Kristo iti Kinatan-ok.” Ti ispiker intampokna daytoy makapainteres a punto: Ti kinatan-ok ket bunga ti panangtulad iti kinapakumbaba ni Kristo. Gapuna, ti Kristiano dina koma tarigagayan ti maysa nga annongen tapno mapennekna ti personal nga ambisionna. Nasken nga imtuodenna iti bagina, ‘Sidadaanak kadi a mangitungpal kadagiti makatulong nga annongen a saan nga agpadlaw?’

Adda kadi panawen a napaksuyankayo? Siempre, adda. Inapresiar ti amin ti palawag a “Nabannog Ngem Saan a Napaksuyan.” Ti interbiu kadagiti nabayagen a Saksi ipakitana a mapabilegnatayo ni Jehova “babaen ti espirituna.”​—Efeso 3:16.

Ti kinaparabur ket maysa a galad a nasken a sukayen yantangay saantayo a naikasigudan dayta. Nailawlawag daytoy a napateg a punto iti paset nga “Agbalintay Koma a Naparabur, Sisasagana a Mangiranud.” Nayimtuod pay daytoy a mamagpanunot a saludsod: “Sidadaantay kadi a mangbusbos iti sumagmamano a minuto kada aldaw kadagiti kakabsattayo a nataenganen, masakit, malmaldaangan, wenno naliday?”

Nakayawan ti atension dagiti agdengdengngeg iti “Agannadkayo iti ‘Timek Dagiti Ganggannaet.’” Daytoy a palawag inyarigna dagiti pasurot ni Jesus kadagiti karnero nga umimdeng laeng iti timekna kas ti “nasayaat a pastor” ken di mangipangag ‘iti timek dagiti ganggannaet’ babaen dagiti adu nga ahensia nga inimpluensiaan ti Diablo.​—Juan 10:5, 14, 27.

Masapul a sangsangkatunos nga agkanta ti maysa a koro tapno nalawag ti kantada. Tapno maidaydayawda ti Dios, nasken nga agkaykaysa ti amin a pudno a managdaydayaw iti intero a lubong. Gapuna, ti paset nga “Idaydayawyo ti Dios ‘Babaen ti Maymaysa a Ngiwat’” nangted iti makagunggona nga instruksion no kasano a makapagsaotayo amin iti maymaysa a “nasin-aw a pagsasao” ken makapagserbi ken ni Jehova nga “abagan-abaga.”​—Sofonias 3:9.

Dagiti nagannak, nangnangruna dagidiay addaan kadagiti babassit pay nga annak, ti naan-anay a naragsakan iti maudi a palawag iti dayta nga aldaw, “Dagiti Annaktayo​—Napateg a Tawid.” Nairuar ti maysa a baro a publikasion nga addaan iti 256 a panid, a siraragsak a nangsorpresa kadagiti timmabuno. Ti Agsursuroka iti Naindaklan a Mannursuro ket maysa a libro a tumulong kadagiti nagannak a mangbusbos iti tiempo a makagunggona iti naespirituan kadagiti annakda, ti sagut ti Dios kadakuada.

Tema ti Maikatlo nga Aldaw: “Aramidenyo ti Amin a Bambanag a Maipaay iti Dayag ti Dios”

Dagiti pammalagip ti teksto dayta nga aldaw inrubbuatna ti maudi nga aldaw ti kombension kadagiti naespirituan a kapanunotan. Ti umuna a paset ti programa iti daytoy nga aldaw ket nangipaay iti kanayonan nga atension iti urnos ti pamilia. Ti umuna a palawag a, “Nagannak, Pabilgenyo ti Pamiliayo,” insaganana ti isip dagiti agdengdengngeg. Kalpasan a rinepaso ti ispiker dagiti annongen dagiti nagannak a mangipaay iti material a kasapulan ti pamiliada, inlawlawagna a ti kangrunaan nga annongen dagiti nagannak isu ti panangipaayda iti naespirituan a kasapulan dagiti annakda.

Ti simmaruno nga ispiker inturongna ti atension kadagiti annak ken sinukimatna ti suheto a “No Kasano nga Idaydayaw Dagiti Agtutubo ni Jehova.” Kinunana a mayarig dagiti ubbing kadagiti “linnaaw” gapu ta aduda ken makapagin-awa ti regta ti kinaagtutuboda. Maragsakan dagiti nataengan a makipagtrabaho kadakuada iti panagserbi ken ni Jehova. (Salmo 110:3) Karaman iti daytoy a paset ti makaay-ayo nga interbiu kadagiti mapagulidanan nga agtutubo.

Dagiti full-costume a drama a naibatay iti Biblia ket kanayon a makapagagar a paset dagiti kombension distrito, kas iti daytoy a kombension. Ti drama a “Situtured a Panangsaksi iti Laksid ti Ibubusor” impakitada ti kasasaad dagiti pasurot ni Jesus idi umuna a siglo. Saan laeng a manglinglingay no di ket napatpateg pay, makaisuro. Ti diskurso a nangsaruno iti drama, “Ipakaammoyo ti Naimbag a Damag ‘nga Awan Sarday,’” intampokna dagiti napapateg a punto ti drama.

Pinadpadaanan ti amin a timmabuno ti tampok a paset ti programa iti Domingo, ti palawag publiko a, “Siasino Ita Dagiti Mangidaydayaw iti Dios?” Pinaneknekan ti ispiker no kasano a dagiti kagimongan iti siensia ken relihion dida indaydayaw ti Dios. Dagiti laeng tattao nga agpaay iti naganna, a mangikaskasaba ken mangisursuro iti kinapudno maipapan ken ni Jehova, ti pudno a mangidaydayaw iti naganna ita.

Ti diskurso publiko ket sinaruno ti sumario ti maadal iti magasin a Pagwanawanan iti dayta a lawas. Kalpasanna, nangngegan ti maudi a palawag nga, “‘Agtultuloykayo a Mangpataud iti Adu a Bunga’ a Pakaidayawan ni Jehova.” Indatag ti ispiker ti sangapulo a punto a resolusion nga iyaplikar ti amin a timmabuno, a naisentro iti nadumaduma a pamay-an a maidayaw ni Jehova, ti Namarsua. Sangsangkamaysa a “Wen” ti impukkaw ti amin a timmabuno kadagiti kombension iti intero a daga.

Nagngudo ngarud ti kombension a silalagip ti amin a timmabuno iti tema nga “Idayawyo ti Dios.” Buyogen ti tulong ti espiritu ni Jehova ken ti makitkita nga organisasionna, sapay koma ta kanayontayo nga ikagumaan nga idayaw ti Dios, saan a ti tao.

[Kahon/Dagiti Ladawan iti panid 23]

Dagiti Internasional a Kombension

Dagiti internasional a kombension a nagpaut iti uppat nga aldaw ket naangay iti Africa, Asia, Australia, Europa, Makin-amianan ken Makin-abagatan nga America. Naawis kadagitoy a kombension dagiti napili a delegado a Saksi manipud iti intero a lubong. Iti kastoy a wagas, adda “panagsisinnukat iti pammaregta” dagiti ganggannaet ken dagiti umili. (Roma 1:12) Nagkikita manen dagiti dati nga agaammo, ken nabukel dagiti baro a panaggagayyem. Ti maysa nga espesial a paset dagiti internasional a kombension isu ti programa a napauluan “Damdamag Manipud Kadagiti Sabali a

[Kahon/Dagiti Ladawan iti panid 25]

Dagiti Baro a Publikasion a Mangidayaw iti Dios

Dua a baro a publikasion ti nairuar iti “Idayawyo ti Dios” a Kombension Distrito. Ti mapa ti Biblia a Kitaem ti Nasayaat a Daga ket addaan iti nalagda nga akkub ken 36 a panid dagiti mapa ken retrato dagiti lugar a nadakamat iti Biblia. De kolor ti tunggal panid ken addaan kadagiti mapa dagiti imperio ti Asiria, Babilonia, Medo-Persia, Grecia, ken Roma. Addada met sabali a mapa a mangipakita iti nasaknapan ti ministerio ni Jesus ken ti panagrang-ay ti Kristianidad.

Ti Agsursuroka iti Naindaklan a Mannursuro ket maysa a 256 ti panidna a libro nga addaan iti agarup 230 a ladawan. Mabalin a mangbusbos iti adu a naragsak a tiempo kadagiti annak babaen laeng ti panangbuya kadagiti ladawan ken panangsungbat kadagiti mamagpanunot a saludsod a masarakan iti libro. Nadisenio daytoy baro a publikasion a mangparmek kadagiti panangatake ni Satanas kadagiti agtutubotayo, a kayatna a dadaelen ti moralidadda.

[Ladawan iti panid 23]

Dagiti misionero nangisalaysayda kadagiti makapabileg iti pammati a kapkapadasan

[Dagiti Ladawan iti panid 24]

Ti bautismo ket maysa a napateg a paset kadagiti “Idayawyo ti Dios” a kombension

[Dagiti Ladawan iti panid 24]

Dagiti ubbing ken nataengan agpadpada a tinagiragsakda ti drama a naibatay iti Biblia