Eskuelaan ti Gilead​—50 a Tawenen ken Rumangrang-ay Pay Laeng!

“ADU dagiti lugar a no sadino saan pay a nasaknap ti pannakaikaskasaba ti Pagarian,” kinuna ni N. H. Knorr iti umuna a klase ti Gilead idi Pebrero 1, 1943, ti aldaw a panangrugi ti eskuelaan. Innayonna: “Adda la ketdi ginasut ken rinibo pay a tattao a madanon no ad-adu dagiti trabahador iti tay-ak. Babaen ti di kaikarian a kinamanangaasi ti Apo, ad-adunto pay.”

Ket pudno nga immadu dagiti trabahador​—minilion ti nainayon! Ngimmato ti bilang dagiti agibumbunannag ti Pagarian manipud 129,070 iti 54 a daga idi 1943 agingga iti 4,472,787 iti 229 a daga idi 1992! Dakkel ti naitulong ti Eskuelaan ti Gilead iti panangaskasaba a nagresulta iti dayta nga irarang-ay. Kalpasan ti 50 a tawen, napateg pay laeng ti paset daytoy iti panangsanay kadagiti trabahador a misionero nga agserbi iti sadinoman a pakasapulan kadakuada iti sangalubongan a tay-ak.

Idi Marso 7, 1993, adda 4,798 a sangaili ken kameng ti pamilia ti Bethel iti E.U. a naawis a timmabuno iti panagturpos ti maika-94 a klase iti Jersey City Assembly Hall, idiay New Jersey. Nangipaay met daytoy naisangsangayan nga okasion iti gundaway a mangtaliaw iti 50 a tawen ti Eskuelaan ti Gilead. Kayatyo kadi a maammuan ti uray bassit laeng maipapan iti programa?

Kalpasan ti panglukat a kanta, nangipaay ni George D. Gangas iti Bagi a Manarawidwid iti napasnek a kararag. Sa kalpasan ti panglukat a sasao ti tsirman, ni Carey W. Barber, impamaysa dagiti nagturpos ken amin dagiti timmabuno ti nagimdeng iti agsasagadsad nga ababa a palawag.

Ni Robert W. Wallen ti immuna a nagpalawag, iti tema a “Saanka nga Agmaymaysa.” Buyogen ti nabara a timek, kinunana: ‘Dumtengto dagiti kanito iti biagyo a mariknayo nga agmaymaysakayo, adayo unay iti pamilia ken kadagiti gagayyem.’ Kasano, ngarud, a maikuna a, “Saanka nga agmaymaysa?” Inlawlawagna: ‘Agsipud ta mabalinyo ti makikomunikar ken Jehova a Dios iti aniaman a kanito.’ Indagadagna kadagiti nagturpos nga ipategda ti pribilehio ti panagkararag ken inaldaw nga aramidenda dayta. Iti kasta, kas ken Jesus, mabalindanto a kunaen, “Saanak nga agmaymaysa.” (Juan 16:32) Anian a makaparegta dagidiay a sasao kadagiti nagturpos!

Iti tema a “Salimetmetanyo ti Inanamayo” (naibatay iti inaldaw a teksto ti Marso 7), inlawlawag ni Lyman A. Swingle iti Bagi a Manarawidwid ti pannakasapul iti dua a kualidad​—panagibtur ken inanama. ‘Pannakalalais, kinaulpit, gura, pannakaibalud, uray pay ipapatay​—dagitoy ti rason no apay a nasken nga agibtur dagiti Kristiano,’ kinunana. ‘Saan a nakedngan ti naindaklan a pannakabalin a magun-odan dagiti matalek a Saksi ni Jehova iti kanito ti panagkasapulan. Pudno a makaliwliwa daytoy, aglalo kadakayo a nagturpos.’ Ti met ngay inanama? ‘Nagpateg ti inanama,’ inlawlawagna. ‘No kasano a salakniban ti helmet ti ulo ti tao a nakaaruat iti dayta, kasta met a saluadan ken salakniban ti inanama ti panunot ti Kristiano tapno masalimetmetanna ti kinatarnawna.’​—1 Tesalonica 5:8.

Ti sumaganad a nagpalawag, ni Ralph E. Walls, pinilina ti makaawis a tema a, “Kasanotay a Makapagkamang iti ‘Nalawa a Lugar’?” Ania daytoy “nalawa a lugar”? (Salmo 18:19) “Maysa dayta a kasasaad ti pannakaispal a mangyeg talna iti panunot ken kinatalingenngen iti puso,” inlawlawagna. Iti ania a rumbeng a maispaltayo? ‘Iti bagiyo​—kadagiti bukodyo a pagkapuyan.’ Innayonna: ‘Kasta met, kadagiti makinruar a sirkumstansia a patanoren ni Satanas.’ (Salmo 118:5) Kasanotay a makapagkamang iti nalawa a lugar? ‘Babaen ti panangannurot kadagiti bilbilin ni Jehova iti amin nga aramidentayo ken babaen ti panangiyararaw ken Jehova kadagiti amin a pakaseknantayo a buyogen ti pammati.’

“Aniat’ Agur-uray Kadakayo?” ti tema a pinili ni Don A. Adams. Ket aniat’ agur-uray kadagiti baro a misionero? Panawen ti pannakibagay, inlawlawagna. “Adda met adu a bendision nga agur-uray kadakayo.” Kas ehemplo, dinakamatna ti dua a baro a misionero nga idi a nairuamdan iti nakaitudinganda kinunada: “Panunotenyo ti kasayaatan pay laeng nga aldawyo iti serbisio, ket kasta ti kasasaad iti tunggal aldaw. Kanayon nga agkurangkami iti literatura, ken nagadu dagiti agtarigagay a payadalan kadakami.” Inawis ti nagpalawag ti imatang ti pamilia ken dagiti gagayyem dagiti nagturpos: ‘Awan ti rumbeng a pagdanaganyo maipapan kadagitoy a nagturpos. Matulonganyo ida babaen ti panangparegtayo kadakuada no agsuratkayo.’​—Proverbio 25:25.

Dagiti instruktor ti eskuelaan ti simmaruno a nagpalawag. Ti tema ni Jack D. Redford ket “Dikay Mangnamnama iti Aniaman iti Siasinoman.” Maysa kadagiti karit a pakaipasanguan dagiti nagturpos isu ti pannakilangen kadagiti tao, inlawlawagna. Aniat’ makatulong? “Palabsenyo dagiti biddutda. Dikay mangnamnama iti nalabes kadagiti dadduma. Dikay mangnamnama a kanayon a maited kadakayo a naan-anay ti ipagarupyo a pakaikarianyo. Pasensiaanyo dagiti dadduma kadagiti pagkuranganda, ket ti kastoy a kinaimbag tulongannakayo a makilangen. Ti abilidadyo a makilangen kadagiti sabsabali ti pakarukodan ti kinanataenganyo.” (Proverbio 17:9) Pudno unay, ti panangyaplikar kadaytoy nainsiriban a balakad tulonganna dagiti nagturpos a makibagay kas misionero iti ganggannaet a daga!

“Addaankami iti daytoy a gameng kadagiti damili a basehas,” kuna ti 2 Corinto 4:7. Ni Ulysses V. Glass, ti rehistrador ti Eskuelaan ti Gilead, kinomentuanna daytoy a teksto bayat ti panangisalaysayna iti tema nga “Agtalekkayo Kadagiti Nasubok, Matalek a Kakabsatyo.” Ania dagiti “damili a basehas”? “Datayo nga imperpekto a tattao ti tuktukoyen dagitoy,” kinunana. Ania ti “gameng”? “Isu ti Nakristianuan a ministeriotayo,” inlawlawagna. (2 Corinto 4:1) Ket an-annuentayo ngay daytoy a gameng? “Ti gameng nga intalek ni Jehova kadatayo di rumbeng nga idulin. Gapuna, dakayo a patpatgenmi a masanguanan a misionero, iwarasyo dayta a gameng sadinoman ti papananyo, ken isuroyo dagiti dadduma no kasano nga iwaras dayta.”

Dimteng ti kanito a mangipalagip iti napalabas idi a rinugian ni Albert D. Schroeder ti nagpalawag, ta isu ti rehistrador ti Eskuelaan ti Gilead idi karrugi daytoy. “Kagudua a Siglo a Teokratiko a Panagsanay” ti temana. “Ammo ni Jehova no kasanot’ mangipaay iti epektibo a panangsanay, ken ar-aramidenna daytoy,” kinunana. Kasano? Tinukoy ni Kabsat Schroeder ti panagsanay a maaw-awat iti dua nga eskuelaan a naipasdek 50 a tawenen ti napalabas​—ti Teokratiko nga Eskuelaan ti Panagministro ken ti Eskuelaan ti Gilead. Impatuldona a ti maysa nga instrumento iti panangipaay iti umiso a pannakaammo isu ti New World Translation. Impanamnamana kadagiti nagturpos: “Mabalinyo ti mapan kadagiti ganggannaet a lugar a pakaibaonanyo buyogen ti dakkel a panagtalek a kanayon nga ipaayannakayo ti Sosiedad iti umdas nga umiso a pannakaammo maipapan iti pangpanggep ni Jehova.”

Ni Milton G. Henschel, presidente ti Watch Tower Bible and Tract Society of Pennsylvania, ket nagpalawag iti tema nga “Agballigitayo Pay a Naan-anay.” Inadaw ni Kabsat Henschel ti temana manipud iti teksto ti tawen para iti 1943: “Agballigitayo pay a naan-anay gapu iti daydiay nangayat kadatayo.” (Roma 8:37, King James Version) Inlawlawagna a maitutop la unay dayta a teksto ti tawen, agsipud ta bayat ti Gubat Sanglubongan II, napalalot’ pannakaidadanes dagiti kakabsattayo iti adu a pagilian. Inadaw ni Kabsat Henschel ti maysa a ruar ti Watchtower a nangisalaysay iti dayta a teksto ti tawen sana inlawlawag: “Daytoy nga artikulo ti Watchtower [Enero 15, 1943] ket inadal ti umuna a klase ti Gilead iti bulan ti Pebrero, ken insaganana ida iti masanguanan.” Adu kadagiti nagturpos iti napalabas a 50 a tawen ti nagballigi, inlawlawagna. Komusta met ngay ti maika-94 a klase? “Agtalinaedkayo a nadekket ken Jehova, agtalinaedkayo a nadekket iti ayatna, ket sigurado nga agballigikayo.”

Kalpasan dagiti palawag iti agsapa, imbasa ti tsirman ti sumagmamano a kablaaw a naggapu iti nagduduma a pagilian. Kalpasanna dimtengen ti kanito a sigagagar a padpadaanan dagiti 24 a pagassawaan​—ti pannakayawat dagiti diploma. Dagiti estudiante ti Gilead opisial itan a nagturpos iti Gilead! Naggapuda iti 5 a pagilian, ngem naitudingda nga agserbi iti 17 a daga, a pakairamanan ti Hong Kong, Taiwan, Mozambique, ken dadduma a paset ti Makindaya nga Europa.

Kalpasan ti apagbiit a panaginana, nangrugi ti programa iti malem babaen ti napaababa a Panagadal ti Pagwanawanan, nga indauluan ni Robert L. Butler. Kalpasanna imparang dagiti nagturpos ti dadduma kadagiti naisangsangayan a kapadasanda bayat ti panangasabada iti asideg ti Wallkill, Nueva York. Inyanninaw ti programa ti maysa kadagiti bambanag nga awan duadua a nangyeg kadakuada idiay Gilead​—ti nasged a panagayatda iti ministerio iti tay-ak.

Kalpasan ti programa dagiti estudiante, adu kadagiti timmabuno ti mangpampanunot no adda naisangsangayan nga itampok ti programa kas panangrambak iti 50 a tawen ti Eskuelaan ti Gilead. Saanda a napaay!​—Kitaenyo ti naipakuyog a kahon, “Panangtaliaw iti 50 a Tawen ti Eskuelaan ti Gilead.”

Limapulo a tawenen ti napalabas, impakita ni Kabsat Knorr nga isu ket maysa a matalek ken mananginanama a tao. Inyebkasna ti pammatina nga agballigi ti Eskuelaan ti Gilead iti panglukat a sasaona iti umuna a klase, idi a kinunana: “Patienmi, kas ipamatmat ti naganna, a rummuar manipud iti daytoy a disso ti ‘bunton ti pammaneknek’ iti amin a paset ti lubong ket ti kasta a pammaneknek agserbinto kas monumento iti pakaidayawan ti Dios a saan a pulos a madadael. Dakayo kas naordenan a ministro agtalekkayo a naan-anay iti Kangatuan, nga ammoyo nga idalan ken iturongnakayo iti tunggal kanito ti panagkasapulan, ken ammuenyo nga isu met ti Dios ti bendision.”a

Kalpasan ti limapulo a tawen, rumangrang-ay pay laeng ti Eskuelaan ti Gilead! Addaan itan dagiti nagturpos iti maika-94 a klase iti pribilehio a sumurot kadagiti nasurok a 6,500 a nagturpos nga immun-una kadakuada. Sapay koma ta agtalekda a naan-anay iti Kangatuan bayat nga aramidenda ti pasetda iti panangpadakkel iti “bunton ti pammaneknek” nga agserbi kas monumento iti pakaidayawan ni Jehova a Dios.

[Footnote]

[Kahon iti panid 25]

Estadistika ti Klase

Dagup a bilang dagiti estudiante: 48

Bilang dagiti pagilian a nairepresentar: 5

Bilang dagiti pagilian a nakaitudingan: 17

Promedio nga edad: 32

Promedio a tawen iti kinapudno: 15.3

Promedio a tawen iti amin-tiempo a ministerio: 9.6

[Kahon iti panid 26, 27]

PANANGTALIAW ITI 50 A TAWEN TI ESKUELAAN TI GILEAD

Aniat’ nasaysayaat pay a pangtaliawan iti pakasaritaan ti Gilead no di babaen dagiti kapadasan dagidiay nairaman iti dayta​—dagiti immun-una a nagturpos, dagiti instruktor, ken dadduma pay a timmulong a nangorganisar iti dayta? Naragsakan dagiti timmabuno bayat ti panagimdengda iti paset a “Panangtaliaw iti 50 a Tawen ti Eskuelaan ti Gilead,” nga indauluan ni Theodore Jaracz.

Ania dagiti sirkumstansia a nangituggod iti pannakaipasdek ti eskuelaan? Inlawlawag ni Kabsat Schroeder nga isu ken ti dua pay nga instruktor ket naikkan iti uppat a bulan laeng a mangorganisar iti eskuelaan. “Ngem iti Lunes, Pebrero 1, 1943, nakasaganakamin maipaay iti dedikasion.”

Aniat’ kapadasan dagiti immuna a misionero a naibaon? Linagip ni Kabsat Henschel: “Inkargami kadagiti baul iti shipping department ti Sosiedad dagiti amin a sanikua a kayat nga itugot dagiti misionero. Idi simmangpet dagiti baul, siaannad a linuktan ken inruarda dagiti sanikuada. Kalpasanna inaramidda a muebles dagiti baul.” Kinunana nga idi agangay, nangyurnos ti Sosiedad kadagiti pagtaengan dagiti misionero nga addaan kalalainganna nga alikamen.

Simmaruno iti programa ti panangiranud ti sumagmamano a nagturpos kadagiti immun-una a klase ti Gilead a miembro itan ti pamilia ti Bethel iti E.U. kadagiti lagip, karirikna, ken kapadasanda. Dagiti balikasda tinukayna ti puspuso dagiti amin a timmabuno.

“Idi naawatko ti awis a tumabuno iti umuna a klase, naammuak nga adda kanser ni nanang. Ngem yantangay nagpaypayunir sipud idi agtawen iti 16, siiinget nga imbagana kaniak nga awatek ti awis. Gapuna, maragsakanak a maladingitan, nagluasak a nagpa-South Lansing a buyogen ti panagtalek ken Jehova. Tinagiragsakko unay ken napalalo ti panangipategko iti panagsanay idiay Gilead. Naturpos ni nanang ti naindagaan a kursona kalpasan ti panagturposko.”​—Charlotte Schroeder, nagserbi idiay Mexico ken El Salvador.

“Yantangay saannak a binaybay-an ni Jehova iti paset ti daga a yanko, kinunak iti nakemko a sadinoman ti papanak ket addaak pay met laeng iti dagana, ken saannak a baybay-an. Isu a maragsakanak unay a nangawat iti awis a tumabuno iti umuna a klase.”​—Julia Wildman, nagserbi idiay Mexico ken El Salvador.

“Anian a nakaay-ayat! Mabalinmi ti agsao iti tunggal balay. Iti umuna a bulan, nakaipaimaak iti 107 a libro ken nakaidauloak iti 19 a panagadal iti Biblia. Iti maikadua a bulan, 28 ti yad-adalak iti Biblia. Siempre, adda dagiti nasken a pakairuamanmi​—pudot, salimuot, kiteb. Ngem maysa a nagsayaat a pribilehio ti kaaddami sadiay. Maysa dayta a banag a kankanayon a tagipatgek.”​—Mary Adams, maikadua a klase, maipanggep iti panagserbina idiay Cuba.

“Ti kasasaad ti panawen ti maysa kadagiti dadakkel a karit a nasken a sarangtenmi idiay Alaska. Nakalamlam-ek iti amianan, nga uray la a dumanon ti temperatura iti -50 degrees Celsius ken nalamlam-ek pay. Babaen laeng ti bilog wenno eroplano a madanon dagiti purok dagiti Indian ken dagiti babassit a naiputputong a lugar iti makin-abagatan a daya ti Alaska.”​—John Errichetti, maikatlo a klase.

“Para kaniak, ti Gilead ket maysa nga awis manipud ken Jehova babaen ti naindagaan nga organisasionna a mangpatibker kadatayo iti naespirituan ken mangipakita kadatayo iti nakaay-ayat a wagas ti panagbiag.”​—Mildred Barr, maika-11 a klase, nagserbi idiay Irlandia.

Adu pay a makaparagsak nga interbiu ti simmaruno​—Lucille Henschel (maika-14 a klase, nagserbi idiay Venezuela), Margareta Klein (maika-20 a klase, nagserbi idiay Bolivia), Lucille Coultrup (maika-24 a klase, nagserbi idiay Peru), Lorraine Wallen (maika-27 a klase, nagserbi idiay Brazil), William ken Sandra Malenfant (maika-34 a klase, nagserbi idiay Morocco), Gerrit Lösch (maika-41 a klase, nagserbi idiay Austria), ken David Splane (maika-42 a klase, nagserbi idiay Senegal).

Dagiti met ngay kakabsat a lallaki a nagserbi kas instruktor? Nainterbiu met ti sumagmamano kadakuada​—Russell Kurzen, Karl Adams, Harold Jackson, Fred Rusk, Harry Peloyan, Jack Redford, ken Ulysses Glass. Inutobda ti pribilehioda, nga inyebkasda no kasano nga inapektaranna ida agpapan ita.

Impaay ni Lloyd Barry, a nagserbi idiay Japan, ti makaparagsak a pammaneknek iti kinaepektibo dagiti misionero a nasanay idiay Gilead. Idi 1949, idi a naibaon ti 15 a misionero sadiay, agarup 10 laeng ti agibumbunannag idiay Japan. Ngem kalpasan ti 44 a tawen, addan nasurok a 175,000 a manangiwaragawag ti Pagarian iti dayta a daga! Kalpasanna dinakamat ni Robert Wallen ti naisangsangayan a panagballigi dagiti dadduma a misionero iti panangtulong kadagiti tao iti kinapudno, agraman ti maysa a misionera a nasuroken a 45 a tawen nga agserserbi idiay Panama ken adda natulongannan a 125 a tao a nakagteng iti dedikasion ken bautismo.

Nadanon ti tampok ti intero a programa idi naawis dagiti amin a nagturpos iti Gilead nga adda iti tallaong a sumagpat iti entablado. Pudno a maysa dayta a makapalua a kanito. Atiddog ti pila dagiti kakabsat a lallaki ken babbai​—89 ti miembro ti pamilia ti Bethel malaksid pay kadagiti nagturpos a sangaili​—a nagna kadagiti pasilio ti Assembly Hall a nagturong iti entablado. Kinaragup ida dagiti kakabsat a lallaki a nagserbi kas instruktor kadagiti napalabas a tawen, ket kalpasanna ti maika-94 a klase​—agarup 160 amin!

“Naballigi kadi ti trabaho ti Eskuelaan ti Gilead iti panangsanay kadagiti misionero nga agserbi kadagiti ganggannaet a daga?” sinaludsod ni Kabsat Jaracz. “Ti ebidensia iti napalabas a 50 a tawen ket gumgumluong a wen!”

[Ladawan iti panid 25]

Ti Maika-94 a Nagturpos a Klase ti Watchtower Bible School of Gilead

Iti listaan ditoy baba, dagiti intar nanumeruanda manipud sango nga agpalikud, ket dagiti nagan nailistada manipud kannigid nga agpakannawan iti kada intar.

(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Olsson, E.; Widegren, S. (3) Delgado, F.; Keegan, S.; Leinonen, A.; Finnigan, E.; Fosberry, F.; Halbrook, J.; Berglund, A.; Jones, P. (4) Watson, B.; Frias, C.; Chooh, B.; Halbrook, J.; Purves, J.; Finnigan, S.; Jones, A.; Cuccia, M. (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M. (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.