Dagiti Adipen ti Dios Kasda la Kadagiti Kaykayo—Kadagiti Ania a Pamay-an?
ITI panangtukoyna iti tao a pagragsakanna ken al-alagadenna dagiti prinsipio ti Biblia, kuna ti salmista: “Sigurado nga agbalinto a kas iti kayo a naimula iti igid dagiti pagayusan ti danum, a mangipaay iti bukodna a bunga iti panawenna ket dagiti bulongna saan a malaylay, ket ti isuamin nga aramidenna agballiginto.” (Salmo 1:1-3) Apay a maitutop daytoy a panangidilig?
Napaut ti biag dagiti kaykayo. Kas pagarigan, adda dagiti kaykayo ti olibo iti rehion ti Mediteraneo a mapapati nga agtawen iti maysa agingga iti dua a ribu. Kasta met, napaut ti biag dagiti kaykayo a baobab iti makintengnga nga Africa, ken napattapatta nga agtawen iti agarup 4,600 dagiti saleng a bristlecone idiay California. Iti kabakiran, dagiti dadakkel a kaykayo ket masansan a makagunggona iti aglawlaw. Kas pagarigan, dagiti natayag a kaykayo linonganda dagiti naganus a kaykayo, ken dagiti maregreg a bulbulong dagiti kaykayo padam-egenda ti daga.
Dagiti katatayagan a kaykayo iti lubong ket kaaduanna a masarakan kadagiti kabakiran, a sadiay suportaran dagiti kaykayo ti maysa ken maysa. Yantangay nalabit agkikinnawikaw dagiti ramutda, dagiti nagrupo a kaykayo adayo a nabilbilegda a mangsaranget iti bagyo ngem iti agmaymaysa a kayo iti karuotan. No nasaknap dagiti ramut, makaala met ti kayo iti naan-anay a danum ken sustansia iti daga. Adda dagiti kaykayo a naun-uneg ti madanon dagiti ramutda ngem iti katayagda, wenno nasaksaknap ti ramutda ngem iti kasaknap ti sangsanga ken bulbulongda.
Mabalin a tuktukoyen ni apostol Pablo ti maysa a kayo idi inlawlawagna a dagiti Kristiano nasken nga ‘agtultuloyda a magna a naikaykaysa ken Kristo, a naparamut ken maibangbangon kenkuana ken mapatpatibker iti pammati.’ (Colosas 2:6, 7) Kinapudnona, makapagtalinaed a nabileg iti pammati dagiti Kristiano no sititibker a nairamutda ken Kristo.—1 Pedro 2:21.
Kadagiti ania pay a pamay-an a dagiti adipen ti Dios mayaspingda kadagiti kaykayo? Bueno, no kasano a dagiti kaykayo makaawatda iti suporta manipud kadagiti kaykayo iti asidegda, dagiti amin nga agtultuloy a makidanggay iti kongregasion Kristiano makaawatda iti suporta manipud kadagiti kapammatianda. (Galacia 6:2) Dagiti matalek, nataengan a Kristiano, nga addaan kadagiti nasaknap a naespirituan a ramut, matulonganda dagiti kabbaro nga agtalinaed a natibker iti pammati, uray maipasangoda kadagiti arig-bagyo nga ibubusor. (Roma 1:11, 12) Dagiti kabbaro a Kristiano mabalinda ti rumang-ay iti sidong ti mangsalaknib a salinong dagiti aduan kapadasan nga adipen ti Dios. (Roma 15:1) Ken amin a kameng ti sangalubongan a kongregasion Kristiano ti magunggonaan iti makapakired a naespirituan a taraon nga ipapaay ti “dadakkel a kaykayo ti kinalinteg,” ti napulotan a natda.—Isaias 61:3.
Anian a makaparagsak nga amin nga adipen ti Dios ket addaan iti namnama a mangtagiragsak iti kaitungpalan ti kari a masarakan iti Isaias 65:22, nga agkunkuna: “Kas iti al-aldaw ti maysa a kayo kastanto ti al-aldaw ti ilik.”
[Picture Credit Line iti panid 28]
Godo-Foto