Pakaragsakanyo Kadi ‘ti Linteg ni Jehova’?
“Naragsak ti tao a . . . ti pakaragsakanna adda iti linteg ni Jehova.”—SALMO 1:1, 2.
1. Apay a naragsaktayo kas ad-adipen ni Jehova?
SARANAYEN ken bendisionannatayo ni Jehova kas nasungdo nga ad-adipenna. Pudno, adu ti pakasuotantayo. Kaskasdi, nagpaiduma ti ragsaktayo. Saan a nakaskasdaaw dayta yantangay agserserbitayo ‘iti naragsak a Dios,’ ket mangyeg iti rag-o kadagiti pusotayo ti nasantuan nga espirituna. (1 Timoteo 1:11; Galacia 5:22) Ti rag-o ket maysa a kasasaad ti napaypayso a kinaragsak a resulta ti panangnamnama wenno pannakagun-od iti naimbag. Ken awan duadua nga ipapaayannatayo ti nailangitan nga Amatayo kadagiti agkakaimbag a sagut. (Santiago 1:17) Di ngarud pagsiddaawan a naragsaktayo!
2. Aniada a salmo ti usigentayo?
2 Ti kinaragsak ket naitampok iti libro dagiti Salmo, kas koma iti kapitulo 1 ken 2. Kadagiti nagkauna a pasurot ni Jesu-Kristo, ti ari ti Israel a ni David ti bigbigenda a nangisurat iti maikadua a salmo. (Aramid 4:25, 26) Ti di nainaganan a nangputar iti umuna a salmo rinugianna ti naipaltiing a kanta babaen kadagitoy a sasao: “Naragsak ti tao a saan a nagna iti pammatigmaan dagidiay nadangkes.” (Salmo 1:1) Iti daytoy nga artikulo ken iti sumaganad, kitaentayo no kasano a ti Salmo 1 ken 2 ket mangted kadatayo iti rason nga agrag-o.
Ti Tulbek ti Kinaragsak
3. Sigun iti Salmo 1:1, ania ti sumagmamano a rason no apay a naragsak dagiti mangsalsalimetmet kadagiti linteg ti Dios?
3 Ipakita ti Salmo 1 no apay a naragsak ti tao a mangsalsalimetmet kadagiti linteg ti Dios. Inkanta ti salmista ti sumagmamano a pakaigapuan ti kasta a kinaragsak: “Naragsak ti tao a saan a nagna iti pammatigmaan dagidiay nadangkes, ket iti dalan dagiti managbasol saan a nagtalinaed, ken iti tugaw dagiti managuy-uyaw saan a nagtugaw.”—Salmo 1:1.
4. Ania a mapagwadan a panagbiag ti sinalimetmetan da Zacarias ken Elisabet?
4 Tapno pudpudno a naragsak, masapul a tungpalentayo dagiti nalinteg a bilbilin ni Jehova. No maipapan kada Zacarias ken Elisabet, a naaddaan iti naragsak a pribilehio nga agbalin a nagannak ni Juan a Mammautisar, “agpadpadada a nalinteg iti sanguanan ti Dios gapu iti pannagnada nga awan pakababalawanna maitunos kadagiti amin a bilin ken legal a kalikaguman ni Jehova.” (Lucas 1:5, 6) Naragsaktayo no tuladentayo ti inaramidda ken sititibker a liklikantayo ti ‘magna iti patigmaan daydiay nadangkes’ wenno ti agpaiwanwan kadagiti saan a nainsiriban a balakadda.
5. Ania ti makatulong kadatayo a mangliklik “iti dalan dagiti managbasol”?
5 No laksidentayo ti panagpampanunot dagiti nadangkes, kaipapananna a saantay nga ‘agtalinaed iti dalan dagiti managbasol.’ Kinapudnona, masapul nga awantayo iti lugar a masansan nga ayanda—kadagiti lugar ti imoral a paglinglingayan wenno saan a nasayaat ti pakasarsaritaanna. Kasano no kasla masulisogtayo a makiraman kadagiti di nainkasuratan nga aramid dagiti managbasol? No kasta, nasken nga ikararagtayo ti tulong ti Dios tapno makapagtignaytayo maitunos iti sasao ni apostol Pablo: “Dikay agbalin a di agkaasmang a naisangol kadagiti di manamati. Ta ania ti pagkaduaan ti kinalinteg ken kinakillo? Wenno ania ti pakiramanan ti lawag iti sipnget?” (2 Corinto 6:14) No agpannuraytayo iti Dios ken ‘nasin-aw ti pusotayo,’ laksidentayo ti kababalin ken estilo ti panagbiag dagiti managbasol ket salimetmetantayo dagiti nadalus a motibo ken tarigagay, buyogen ti “pammati nga awanan panaginsisingpet.”—Mateo 5:8; 1 Timoteo 1:5.
6. Apay a nasken nga agannadtayo mainaig kadagiti managuyaw?
6 Tapno maay-ayotayo ni Jehova, nasken a ‘ditay makikatugaw kadagiti managuyaw.’ Uyawen dagiti dadduma ti mismo a kinanadiosan, ket kadagitoy ‘maudi nga al-aldaw,’ masansan a nakarkaro pay ti mangumsi a pananguyaw dagiti dati a Kristiano a nagapostata. Pinakdaaran ni apostol Pedro dagiti kapammatianna: “Dungdungnguen, . . . umuna nga ammuenyo daytoy, a kadagiti maudi nga aldaw umayto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti ayan daytoy naikari a kaaddana? Ay ket, nanipud iti aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.’” (2 Pedro 3:1-4) No pulos a ‘ditay makikatugaw kadagiti managuy-uyaw,’ maliklikantayo ti didigra a sigurado a sumangbay kadakuada.—Proverbio 1:22-27.
7. Apay a nasken nga ipapusotayo ti sasao ti Salmo 1:1?
7 Malaksid no ipapusotayo ti panglukat a sasao ti Salmo 1, mabalin a mapukawtayo ti espiritualidad a nagun-odtayo babaen ti panagadal iti Kasuratan. Kinapudnona, mabalin a dakdakes pay ti mapasamak kadatayo. Mabalin a kumapuy ti espiritualidadtayo no rugiantayo nga ipangag ti patigmaan dagiti nadangkes. Kalpasanna, mabalin a regular a makikaduatayo kadakuada. Inton agangay, posible nga agbalintayto nga apostata a managuyaw ken awanan iti pammati. Nalawag, ti pannakigayyem kadagiti nadangkes mabalinna a patanoren kadatayo ti dakes a kababalin a mangdadael iti relasiontayo ken ni Jehova a Dios. (1 Corinto 15:33; Santiago 4:4) Ditay koma pulos ipalubos a mapasamak dayta!
8. Ania ti makatulong kadatayo a mangipamaysa iti isiptayo kadagiti naespirituan a bambanag?
8 Makatulong ti kararag tapno maipamaysatayo ti isiptayo kadagiti naespirituan a bambanag ken maliklikantayo ti makikadua kadagiti nadangkes. “Dikay maringgoran iti aniaman,” insurat ni Pablo, “no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” Indagadag ti apostol a nasken nga utoben dagiti bambanag a napudno, serioso a pakaseknan, nalinteg, nadalus, maay-ayat, naimbag ti pakasarsaritaanda, nasingpet ken nadayaw. (Filipos 4:6-8) Nasken nga agtignaytayo maitunos iti balakad ni Pablo ken ditay tultuladen dagiti nadangkes.
9. Nupay liklikantayo dagiti dakes, kasanotay a matulongan ti amin a kita ti tattao?
9 Nupay likliklikantayo dagiti dakes nga aramid, siaannad a kasabaantayo dagiti dadduma, no kasano nga insarita ni apostol Pablo iti Romano a gobernador a ni Felix ti “maipapan iti kinalinteg ken panagteppel ken iti pannakaukom nga umayto.” (Aramid 24:24, 25; Colosas 4:6) Ikasabatayo ti naimbag a damag ti Pagarian iti amin a kita ti tattao, ket siaayat a tratuentay ida. Agtalektayo a dagidiay “siuumiso nga agannayas iti agnanayon a biag” agbalindanto a manamati ken pagragsakanda ti linteg ti Dios.—Aramid 13:48.
Pagragsakanna ti Linteg ni Jehova
10. Ania ti tumulong a mangitukit iti isip ken pusotayo dagiti basbasaentayo kabayatan ti personal a panagadaltayo?
10 No maipapan iti naragsak a tao, innayon a kinuna ti salmista: “Ti pakaragsakanna adda iti linteg ni Jehova, ket iti lintegna agbasa iti nababa a timek iti aldaw ken rabii.” (Salmo 1:2) Kas ad-adipen ti Dios, ‘pagragsakantayo ti linteg ni Jehova.’ Kabayatan ti personal a panagadal ken panagmennamennatayo, nasayaat no agbasatayo buyogen ti “nababa a timek,” a baliksentayo dagiti sasao. No aramidentayo dayta, maitukit iti isip ken pusotayo ti aniaman a paset ti Kasuratan a basbasaentayo.
11. Apay a nasken a basaentayo ti Biblia iti “aldaw ken rabii”?
11 Parparegtaennatayo ti “matalek ken masirib nga adipen” nga inaldaw a basaentayo ti Biblia. (Mateo 24:45) Gapu iti nasged a tarigagay a maparayray ti pannakaawattayo iti mensahe ni Jehova para iti sangatauan, maisingasing a basaentayo ti Biblia “iti aldaw ken rabii”—wen, uray kadagiti tiempo a narigattay a maala ti turogtayo. Indagadag kadatayo ni Pedro: “Kas kayanak a maladaga, patanorenyo ti panagtarigagay iti awan lalaokna a gatas a kukua ti sao, tapno babaen iti dayta dumakkelkayo koma nga agturong iti pannakaisalakan.” (1 Pedro 2:1, 2) Pagragsakanyo kadi ti inaldaw a panagbasa iti Biblia ken panangmennamenna iti Sao ken pangpanggep ti Dios kabayatan ti rabii? Kasta ti narikna ti salmista.—Salmo 63:6.
12. Ania ti aramidentayo no pudno met laeng a pagragsakantayo ti linteg ni Jehova?
12 Agnanayon a naragsaktayo no kaay-ayotayo ti linteg ti Dios. Awan pagkuranganna ken nalinteg, ken dakkel ti magunggona no salimetmetan dayta. (Salmo 19:7-11) Insurat ni adalan a Santiago: “Ti mangsukimat iti perpekto a linteg a kukua ti wayawaya ken agtultuloy iti dayta, daytoy a tao, agsipud ta isu nagbalin, saan a maysa a manglipat a managdengngeg, no di ket maysa a managaramid iti trabaho, naragsakto iti panangaramidna iti dayta.” (Santiago 1:25) No pudno a pagragsakantayo ti linteg ni Jehova, inaldaw nga ipaayantayo iti atension dagiti naespirituan a banag. Kinapudnona, matignaytayo a ‘mangsukimat iti nauneg a bambanag ti Dios’ ken mangyun-una iti biagtayo dagiti interes ti Pagarian.—1 Corinto 2:10-13; Mateo 6:33.
Agbalin a Kas iti Maysa a Kayo
13-15. Iti ania nga anag a mayarigtay iti kayo a naimula iti igid ti gubuayan ti danum?
13 Iti agtultuloy a panangdeskribirna iti nalinteg a tao, kuna ti salmista: “Sigurado nga agbalinto a kas iti kayo a naimula iti igid dagiti pagayusan ti danum, a mangipaay iti bukodna a bunga iti panawenna ket dagiti bulongna saan a malaylay, ket ti isuamin nga aramidenna agballiginto.” (Salmo 1:3) Kas iti amin nga imperpekto a tattao, datayo nga agserserbi ken ni Jehova makapasartayo kadagiti pakarigatan ti biag. (Job 14:1) Mabalin nga agsagabatayo iti pannakaidadanes ken nadumaduma a pakasuotan mainaig iti pammatitayo. (Mateo 5:10-12) Ngem iti tulong ti Dios, maandurantayo dagitoy a pannubok, no kasano a ti maysa a nasalun-at a kayo madaeranna dagiti napigsa nga angin.
14 Ti kayo a naimula iti asideg ti gubuayan ti danum ket saan a magango iti panawen ti kalgaw wenno kabayatan ti tikag. No managbutengtayo iti Dios, ti bilegtayo ket agayus manipud iti daydiay aglaplapusan a Gubuayan—ni Jehova a Dios. Ti Dios ti nagpannurayan ni Pablo iti tulong isu a naikunana: “Ta iti amin a bambanag addaanak iti bileg gapu iti daydiay [ni Jehova] mangmangted kaniak iti pannakabalin.” (Filipos 4:13) No iwanwan ken saranayennatayo ti nasantuan nga espiritu ni Jehova, saantay a kumapuy, nga agbalin a di nabunga wenno natay iti naespirituan. Nabunga ti panagserbitayo iti Dios ken iparparangarangtayo ti bunga ti espirituna.—Jeremias 17:7, 8; Galacia 5:22, 23.
15 Iti panangusarna iti Hebreo a sao a naipatarus a “kas iti,” pagdildiligen ti salmista ti dua nga agduma a banag, nupay adda galad a nagpadaanda. Agduma ti tao ken ti kayo, ngem ti kinalangto ti kayo a naimula iti asideg ti gubuayan ti danum ket agparang a nangipalagip iti salmista iti naespirituan a kinarang-ay dagidiay ‘ti pagragsakanda ket ti linteg ni Jehova.’ No pagragsakantayo ti linteg ti Dios, ti al-aldawtayo agbalin a kas iti kapaut ti kayo. Kinapudnona, mabalintay ti agbiag nga agnanayon.—Juan 17:3.
16. Apay ken kasano nga ‘agballigi ti isuamin nga aramidentayo’?
16 Bayat a salsalimetmetantayo ti nalinteg a danatayo, tulongannatayo ni Jehova a mangandur kadagiti pakasuotan ken pakarigatan. Naragsak ken nabunga ti panagserbitayo iti Dios. (Mateo 13:23; Lucas 8:15) ‘Agballigi ti isuamin nga aramidentayo’ gapu ta ti panangaramid iti pagayatan ni Jehova ti kangrunaan a panggeptayo. Gapu ta kanayon a matungpal dagiti panggepna ken pagragsakantayo dagiti bilinna, rumang-aytayo iti naespirituan. (Genesis 39:23; Josue 1:7, 8; Isaias 55:11) Pudno dayta uray maipasangotayo kadagiti pakarigatan.—Salmo 112:1-3; 3 Juan 2.
Kasla Narang-ay ti Nadangkes
17, 18. (a) Nangyarigan ti salmista kadagiti nadangkes? (b) Uray pay rumang-ay iti material ti nadangkes, apay a saan nga agpaut ti kinatalgedda?
17 Anian a nagduma ti pagbanagan ti nadangkes ken ti nalinteg! Adda tiempo nga agparang a narang-ay iti material dagiti nadangkes, ngem saanda a narang-ay iti naespirituan. Nabatad dayta kadagiti kanayonan a sasao ti salmista: “Dagiti nadangkes saanda a kasta, ngem kaslada iti taep nga ipalais ti angin. Dayta ti makagapu a dagidiay nadangkes saandanto nga agtakder iti pannakaukom, wenno uray dagiti managbasol iti gimong dagidiay nalinteg.” (Salmo 1:4, 5) Imutektekanyo ta kuna ti salmista, “dagiti nadangkes saanda a kasta.” Kayatna a sawen a saanda a kas kadagiti nadiosan a tattao, a kalkalpas a naidilig kadagiti nabunga, napaut a kaykayo.
18 Uray pay rumang-ay iti material dagiti nadangkes, saan nga agpaut ti kinatalgedda. (Salmo 37:16; 73:3, 12) Mayarigda iti daydiay maag a nabaknang a lalaki a dinakamat ni Jesus iti ilustrasionna idi nakiddaw kenkuana a bumallaet iti maysa a parikut mainaig iti tawid. Kinuna ni Jesus kadagiti agdengdengngeg: “Pagtalinaedenyo a silulukat dagiti matayo ket agaluadkayo iti tunggal kita ti kinaagum, agsipud ta uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” Inyilustrar ni Jesus daytoy a punto babaen ti panangikunana a ti daga ti maysa a nabaknang a lalaki ket nabunga nga uray la implanona a rakraken dagiti kamaligna ket mangbangon iti daddadakkel a pagurnongan kadagiti amin a naimbag a banag nga ik-ikutanna. Panggepna ngarud ti mangan, uminum, ken agpennek. Ngem kinuna ti Dios: “Maysa a di nainkalintegan, iti daytoy a rabii kalikagumanda kenka ti kararuam. Asino, ngarud, ti agtagikua iti bambanag nga impempenmo?” Kas panangipaganetget iti puntona, innayon ni Jesus: “Kasta ti mapasamak iti tao nga agurnong iti gameng maipaay iti bagina ngem saan a nabaknang iti Dios.”—Lucas 12:13-21.
19, 20. (a) Deskribirenyo ti panagirik ken panagtaep idi umuna a panawen. (b) Apay a mayarig dagiti nadangkes kadagiti taep?
19 Ti nadangkes ket “saan a nabaknang iti Dios.” Gapuna, ti seguridad ken kinatalgedda ket kas iti taep, ti naingpis nga ukis ti trigo. Idi umuna a panawen, kalpasan a magapas ti trigo, maipan dayta iti pagirikan, a kaaduanna a maysa a nangato ken nasimpa a lugar. Sadiay a dagiti animal iparingguyodda dagiti pasagad a pagirik tapno maruros dagiti dawa ken maisina dagiti trigo kadagiti taepna. Kalpasanna, sukladenda ti irik. (Isaias 30:24) Agdisso dagiti trigo iti pagirikan, idinto a maipalais ti taep. (Ruth 3:2) Kalpasanna, mayakayak dagiti trigo tapno maikkat dagiti babassit a bato ken dadduma pay a nailaok a rugitna. Inton agangay, mabalinton nga idulin wenno gilingen. (Lucas 22:31) Awanton dagiti taep.
20 No kasano a dagiti trigo nagsublida iti daga ken nataginayonda idinto a naipalais dagiti taep, agtalinaedto met dagiti nalinteg idinto a mapukaw dagiti nadangkes. Awan duadua a naragsaktayo ta agnanayon a matalipuposto dagiti nadangkes. Inton awandan, sibabaknang a mabendisionan dagiti tattao gapu ta pagragsakanda ti linteg ni Jehova. Kinapudnona, dagiti natulnog a tattao awatendanto ti sagut ti Dios a biag nga agnanayon.—Mateo 25:34-46; Roma 6:23.
Ti Naparaburan a “Dalan Dagidiay Nalinteg”
21. Kasano a ni Jehova ‘ammona dagidiay nalinteg’?
21 Kastoy ti maudi a sasao ti umuna a salmo: “Ni Jehova siaammo iti dalan dagidiay nalinteg, ngem ti mismo a dalan dagidiay nadangkes mapukawto.” (Salmo 1:6) Kasano a ti Dios ‘ammona dagidiay nalinteg’? Bueno, no salsalimetmetantayo ti nalinteg a dana, masiguradotayo a makitkita ti nailangitan nga Amatayo ti nadiosan a wagas ti panagbiagtayo ket ibilangnatayo a naanamongan nga ad-adipenna. No kasta, mabalin ken nasken nga iyallatiwtayo kenkuana ti amin a pakadukotantayo buyogen ti panagtalek a pudno a maseknan kadatayo ti Dios.—Ezequiel 34:11; 1 Pedro 5:6, 7.
22, 23. Ania ti pagbanaganto dagiti nadangkes ken dagiti nalinteg?
22 Agtalinaed nga agnanayon ‘ti dalan dagidiay nalinteg.’ Ngem dadaelento ni Jehova dagiti saan nga agbabawi a nadangkes, ket mairaman nga agpatingga ti ‘dalanda’ wenno wagas ti panagbiagda. Makapagtalektayo a matungpal ti sasao ni David: “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna. Dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:10, 11, 29.
23 Anian a ragsaktayo no maysatayo kadagidiay agbiag nga agnanayon iti maysa a paraiso a daga, inton awanen dagiti nadangkes! Dagiti naemma ken nalinteg tagiragsakendanto ti pudpudno a talna gapu ta kanayon a pagragsakanda “ti linteg ni Jehova.” Ngem sakbayna, masapul a matungpal ti “bilin ni Jehova.” (Salmo 2:7a) Tulongannatayo ti sumaganad nga artikulo tapno maammuantayo no ania dayta a bilin ken no ania ti kaipapananna kadatayo ken iti intero a sangatauan.
Ania ti Sungbatyo?
• Apay a naragsak ti nadiosan a tao?
• Ania ti mangipakita a pagragsakantayo ti linteg ni Jehova?
• Kasano a ti maysa a tao mayasping iti nasayaat ti pannakapadanumna a kayo?
• Kasano a ti dana ti nalinteg naiduma iti dana ti nadangkes?
[Ladawan iti panid 11]
Tumulong ti kararag tapno maliklikantayo ti makikadua kadagiti nadangkes
[Ladawan iti panid 12]
Apay a ti nalinteg a tao mayarig iti maysa a kayo?