Kayo a “Dagiti Bulongna Saan a Malaylay”

NAKAKITAKA kadin iti lugar iti probinsia a nakaberberde gapu iti naraber a kakaykaywan? Nalabit umanamongka a nakapimpintas dayta. No makakitaka iti kaykayo a dadakkel ken narukbos, panunotem kadi a natikag dayta a lugar? Saan. Mapanunotmo la ketdi nga adda nawadwad a danum a mangbibiag ken mangpalpalangto kadagita.

Maitutop ngarud a dagidiay nasalun-at iti naespirituan ket inyasping ti Biblia kadagiti dadakkel ken narukbos a kaykayo. Kas pagarigan, imutektekam daytoy nagsayaat nga umuna a tallo a bersikulo ti umuna a Salmo:

“Naragsak ti tao a saan a nagna iti pammatigmaan dagidiay nadangkes, ket iti dalan dagiti managbasol saan a nagtalinaed, ken iti tugaw dagiti managuy-uyaw saan a nagtugaw. Ngem ti pakaragsakanna adda iti linteg ni Jehova, ket iti lintegna agbasa iti nababa a timek iti aldaw ken rabii. Ket sigurado nga agbalinto a kas iti kayo a naimula iti igid dagiti pagayusan ti danum, a mangipaay iti bukodna a bunga iti panawenna ket dagiti bulongna saan a malaylay, ket ti isuamin nga aramidenna agballiginto.”

Umasping iti dayta, kastoy ti kuna ti Jeremias 17:7, 8: “Bendito ti nabaneg a lalaki a mangikabil ti panagtalekna ken Jehova, ket ni Jehova ti nagbalin a pagkammatalkanna. Ket isu pudno unay nga agbalinto a kas maysa a kayo a naimula iti igid ti dandanum, a mangparuar kadagiti ramutna iti mismo nga igid ti pagay-ayusan ti danum; ket saannanto a makita no umay ti pudot, no di ket ti bulbulongna pudno nga agbalinto a nabaludbod. Ket iti tawen ti tikag saanto a maringgoran, saanto met a mamingga a mangpataud iti bunga.”

Kadagita a dua a teksto, nausar dagiti kayo kas ilustrasion a mangipakita iti pagbanagan ti tao nga agaramid iti umiso, a pagragsakanna dagiti linteg ti Dios, ken naan-anay nga agtalek kenkuana. Maisaludsodtayo ngarud, Kadagiti ania a wagas a ti kasta a tao ket umasping iti nabaludbod a kayo, iti naespirituan nga anag? Usigentay a naimbag dagitoy a bersikulo.

“Naimula iti Igid Dagiti Pagayusan ti Danum”

Dagiti kayo a nadakamat ket nadeskribir a naimula “iti igid dagiti pagayusan ti danum” wenno “iti igid ti dandanum,” saan la nga iti maysa a karayan wenno waig. Masarakan ti umasping a simboliko a sasao iti Isaias 44:3, 4, a sadiay imbaga ni Jehova a Dios no kasano nga aywananna dagiti agbabbabawi a Judio a nagsubli manipud pannakakautiboda idiay Babilonia. Babaen ken propeta Isaias, kinuna ni Jehova: “Mangibukbokakto iti danum iti daydiay mawaw, ken tumartaredted a barbaresbes iti rabaw ti namaga a disso. . . . Ket pudno unay nga agtubodanto a kasla addada iti tengnga ti berde a karuotan, kas kadagiti alamo iti igid dagiti banawang ti danum.” Ditoy, ti “barbaresbes” ken “dagiti banawang ti danum” ket nakuna nga arigna pagtubuenda dagiti tattao nga agpapaiwanwan iti Dios kas kadagiti narukbos a kayo ti alamo.

Uray ita kadagiti kataltalonan, makakitaka kadagiti banawang ken baresbes nga agay-ayus manipud iti dakkel a gubuayan ti danum, kas iti nauneg a bubon, karayan, dan-aw, wenno dam. Kaaduanna a paset dagita ti irigasion iti kataltalonan wenno plantasion. No dadduma, direkta a maiturong dagita a pagayusan iti nakaimulaan dagiti agbunga a kaykayo. Nalabit mausar met dagiti baresbes kas pagilasinan iti pagbedngan ti sanikua. Padanumanna ti kataltalonan iti maysa a bangir ken padanumanna dagiti narukbos a kayo a naintar iti sabali a bangir.

Ania ti kasasaad dagiti kayo a naimula iti igid ti kakasta a pagayusan? Ti Salmo 1:3 dakamatenna ti kayo “a mangipaay iti bukodna a bunga iti panawenna.” Iti luglugar a nadakamat iti Biblia, addada kaykayo ti higos, granada, mansanas, datiles, ken olibo. Nupay tumayag ti narangpaya a kayo ti higos agingga iti siam a metro, saan unay a tumayag ti kaaduan a kayo nga agbungbunga. Ngem mabalin a rumukbos, lumangto, ken nabunga dagita iti umiso a tiempo.

Idi un-unana, adu a dadakkel a kaykayo ti alamo ti naipataraigid iti karkarayan ken barbaresbes ti Siria ken Palestina. Iti Biblia, no madakamat dagiti kayo ti alamo, masansan a nainaig dagita kadagiti pagayusan ti danum wenno “naapres a ginget.” (Levitico 23:40) Dagiti sause a kapamilia ti kayo nga alamo ket masarakan met kadagiti lugar nga aduan iti danum. (Ezequiel 17:5) Dagitoy a dadakkel ken narukbos a kaykayo nagsayaat ti panangiladawanda iti ideya a kayat nga ipakaammo da Jeremias ken ti salmista: Dagidiay naan-anay nga agtalek iti Dios ken mangtungtungpal iti lintegna agtalinaedda a nasalun-at iti naespirituan, ‘ket agballiginto ti isuamin nga aramidenda.’ Saan kadi a kasta met ti kayattayo​—ti agballigi iti biag?

Pakaragsakanna ti Linteg ni Jehova

Ita, ikagkagumaan dagiti tattao ti agballigi iti nadumaduma a pamay-an. Makumikomda kadagiti aktibidad a namnamaenda a mangpabaknang ken mangpalatak kadakuada, ngem kaaduanna, dida maragpat dagita isu a maupaydanto laeng. Ania ngarud ti mangyeg iti pudno a pannakapnek ken manayon a kinaragsak? Dagiti sasao ni Jesus iti Sermonna iti Bantay ti mangipaay iti sungbat. Kinunana: “Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.” (Mateo 5:3) Wen, magun-odantayo ti pudno a kinaragsak, saan a babaen iti adu a material a banag, no di ket babaen iti panangbigbigtayo a masapul a maaddaantayo iti nasayaat a relasion iti Dios ken agreggettayo a maaddaan iti kasta a relasion. No aramidentayo dayta, agbalintayo a kas kadagiti narukbos a kayo nga agbunga iti umiso a tiempo. Kasanotay a maaddaan iti kasta a nasayaat a relasion iti Dios?

Sigun iti salmista, umuna, adda dagiti nasken a liklikantayo. Dinakamatna ti “pammatigmaan dagidiay nadangkes,” “dalan dagiti managbasol,” ken “tugaw dagiti managuy-uyaw.” Tapno agbalintayo a naragsak, masapul nga adaywantayo dagiti manguy-uyaw wenno dagidiay di pay ketdi mangikankano iti linlinteg ti Dios.

Maikadua, rumbeng a pakaragsakantayo ti linteg ni Jehova. No pagragsakantayo ti maysa a banag wenno aktibidad, kanayon la ketdi nga ipamuspusantayo nga aramiden dayta, di ngamin? No ngarud pagragsakantayo ti linteg ti Dios, ipatpategtayo ti Biblia, kayattay nga ammuen ken tarusan ti ad-adu pay maipapan iti dayta.

Maikatlo, masapul a basaentayo dayta iti “nababa a timek iti aldaw ken rabii.” Kaipapananna a regular a basaentayo ti Biblia ken utobentayo dagiti mabasatayo. Ti koma panagriknatayo iti Sao ti Dios ket kas iti daydiay salmista a nangikanta: “Anian a panagayatko iti lintegmo! Iti intero nga agmalem isu dayta ti pakaseknak.”​—Salmo 119:97.

Wen, no magun-odantayo ti umiso a pannakaammo ken pannakaawat maipapan ken Jehova a Dios ken mapatanortayo ti naan-anay a panagtalek kenkuana ken kadagiti karina, sigurado a sumingedtayo kenkuana. No aramidentayo dayta, agbalintayo a kas iti naragsak a tao a dineskribir ti salmista​—“isuamin nga aramidenna agballiginto.”