Mabalinmo ti Makigayyem ken Jehova

Kayat ni Jehova a mas maam-ammom isuna. Apay? Namnamaenna a no mas maam-ammom dagiti kualidadna, ti panangtratona kadagiti tattao, ken ti kayatna para kenka, mas kayatmo ti makigayyem kenkuana. Talaga kadi a posible nga agbalinka a gayyem ti Dios? (Basaen ti Salmo 25:14.) Ania ti mabalinmo nga aramiden tapno agbalinka a gayyemna? Sungbatan ti Biblia dagita a saludsod ken ibagana kenka no apay a ti pannakigayyem ken Jehova ti kasayaatan a relasion a maadda kenka.

1. Ania ti iyaw-awis ni Jehova kenka?

‘Umasidegka iti Dios, ket umasidegto kenka.’ (Santiago 4:8) Ania ti kayat a sawen dayta? Aw-awisennaka ni Jehova nga agbalin a gayyemna. Pampanunoten ti dadduma a narigat ti makigayyem iti saanda a makita, a kas iti Dios. Ngem iti Saona, ti Biblia, ipakpakaammo ni Jehova ti amin a masapul a maammuantayo maipapan kadagiti kualidadna tapno agbalintayo a nadekket kenkuana. No basaentayo ti mensahe ti Dios kadatayo iti Biblia, lumagda ti pannakigayyemtayo ken Jehova uray ditay makita.

2. Apay a ni Jehova ti kasayaatan nga agbalin a Gayyemmo?

Awanen ti mas mangay-ayat kenka no di ni Jehova. Kayatna a naragsakka ken agkararagka kenkuana no kasapulam ti tulong. ‘Ipalladawmo kenkuana ti amin a pakadanagam, ta ipatpategnaka.’ (1 Pedro 5:7) Kanayon a nakasagana ni Jehova a dumngeg, tumulong, ken mangpalag-an iti rikna dagiti gagayyemna.​—Basaen ti Salmo 94:18, 19.

3. Ania ti kayat ni Jehova nga aramiden dagiti gagayyemna?

Ay-ayaten ni Jehova ti amin a tattao, ngem ibilangna a ‘nasinged a gayyemna dagiti nalinteg.’ (Proverbio 3:32) Kayat ni Jehova nga agporsegi dagiti gagayyemna a mangaramid iti nasayaat ken saan a mangaramid kadagiti ibilangna a dakes. Pampanunoten ti dadduma a saanda a kaya dagiti ipapaaramid ni Jehova. Ngem mannakaawat ni Jehova. Awatenna ti amin a mangay-ayat kenkuana ken mangar-aramid iti amin a kabaelanda a mangparagsak kenkuana.​—Salmo 147:11; Aramid 10:34, 35.

AMMUEM TI AD-ADU PAY

4. Ni Abraham ket gayyem ni Jehova

Ti salaysay ti Biblia maipapan ken Abraham (a maawagan met Abram) matulongannatayo a mangammo no kasano ti agbalin a gayyem ti Dios. Basaen ti maipapan ken Abraham iti Genesis 12:1-4, sa pagsaritaan dagitoy a saludsod:

• Ania ti impaaramid ni Jehova ken Abraham?

• Ania ti inkari ni Jehova kenkuana?

• Ania ti inaramid ni Abraham kadagiti imbilin ni Jehova kenkuana?

5. Ti kayat ni Jehova nga aramiden dagiti gagayyemna

Adda dagiti ekspektarentayo nga aramiden dagiti gagayyemtayo.

• Ania ti kayatmo nga aramiden dagiti gagayyemmo para kenka?

Basaen ti 1 Juan 5:3, sa pagsaritaan daytoy a saludsod:

• Ania ti ekspektaren ni Jehova kadagiti gagayyemna?

Mabalin nga adda dagiti masapul a balbaliwantayo kadagiti ugali ken ar-aramidtayo tapno makapagtulnogtayo ken Jehova. Basaen ti Isaias 48:17, 18, sa pagsaritaan daytoy a saludsod:

• Apay a kayat ni Jehova a mangaramid iti panagbalbaliw dagiti gagayyemna?

6. Ti ar-aramiden ni Jehova para kadagiti gagayyemna

VIDEO: Nakaim-imbag ni Jehova Kaniak (3:20)

• Kasano a tinulongan ni Jehova ti babai iti video a manglaban kadagiti negatibo a pampanunoten ken marikriknana?

Basaen ti Isaias 41:10, 13, sa pagsaritaan dagitoy a saludsod:

• Ania ti ikarkari ni Jehova nga aramidenna para iti amin a gagayyemna?

• Panagkunam, nasayaat ngata a Gayyem ni Jehova? Apay?

7. Importante ti komunikasion iti pannakigayyem ken Jehova

Nadekdekket dagiti aggagayyem no adda komunikasionda. Basaen ti Salmo 86:6, 11, sa pagsaritaan dagitoy a saludsod:

• Kasanotayo a makisarita ken Jehova?

• Kasano a makisarita ni Jehova kadatayo?

SUMARIO

Kayat ni Jehova nga agbalinka a Gayyemna, ken tulongannaka nga agbalin a nadekket kenkuana.

Rebiu

• Kasano a tultulongan ni Jehova dagiti gagayyemna?

• Apay a kayat ni Jehova a mangaramid iti panagbalbaliw dagiti gagayyemna?

• Panagkunam, narigat kadi ti agbalin a gayyem ni Jehova? Apay, wenno apay a saan?

AGDISKOBREKA PAY

Kasano a mabalbaliwan ti pannakigayyemmo iti Dios ti biagmo?

“Ni Jehova​—Ti Dios a Maikari nga Am-ammuen” (Ti Pagwanawanan, Pebrero 15, 2003)

Ammuem no kasano ti makigayyem iti Dios.

“Kasanoak nga Agbalin a Gayyem ti Dios?” (Dagiti Saludsod nga Iyimtuod ti Agtutubo​—Dagiti Sungbat nga Epektibo, Tomo 2, kapitulo 35)

Kitaem no apay nga imbaga ti maysa a babai a simmayaat ti biagna gapu iti pannakigayyemna ken Jehova.

“Diak Kayat ti Matay!” (Ti Pagwanawanan No. 1 2017)

Denggem ti ibaga dagiti tin-edyer maipapan ken Jehova.

Kasanoka nga Agbalin a Gayyem ti Dios? (1:46)

6. Agbalintayo a paset ti pamilia ni Jehova no agpabautisartayo

No agpabautisartayo, agbalintayo a paset ti agkaykaysa a sangalubongan a pamilia. Uray no nagduduma ti naggapuan, kasasaad ti biag, wenno napalabastayo, agpapada ti patpatien ken estandarte iti moral a sursurotentayo. Basaen ti Salmo 25:14 ken 1 Pedro 2:17, sa pagsaritaan daytoy a saludsod:

• Ania ti epekto ti panagpabautisar ti maysa iti relasionna ken Jehova ken iti dadduma nga agdaydayaw Kenkuana?

2. Kasanotayo a maaddaan iti naragsak a biag ita?

Naparsuatayo nga agkasapulan iti panangidalan ni Jehova, isu a natural laeng a kayattayo isuna nga am-ammuen ken dayawen. (Basaen ti Mateo 5:3-6.) Kayatna nga agbalintayo a nadekket a gayyemna, ‘magnatayo iti amin a dalanna, ayatentayo,’ ken agserbitayo kenkuana ‘iti amin a pusotayo.’ (Deuteronomio 10:12; Salmo 25:14) No aramidentayo dagita, agbalintayo a pudpudno a naragsak uray adda dagiti problematayo. No agdayawtayo ken Jehova, mariknatayo nga adda direksion ti biagtayo.