Agimtuod Dagiti Agtutubo . . .
Tulongannakto Kadi ti Pannakigayyem iti Dios?
ADU nga agtutubo ti dumakkel ita iti sidong ti panagpulkok a di nakapapati iti napalpalabas a kaputotan. Inlawlawag dagiti autor ti nasional a pannakasurbey ti 160,000 nga agtutubo: “Ibaga kadakami dagiti tin-edyer a kaaduan kadagiti pakaburiboranda ket agtaud kadagiti pakarigatan a mariknada a dida kabaelan a pakilangenan; manipud pannakaupay ken kinaliday a manglapunos iti panagtalekda; ken manipud nagannak a di man la makadlaw kadagiti parikutda.” Mabalin a mariknam met a di man la maawatan ti dadduma no kasano kasaem ti biag no maminsan iti maysa nga agtutubo.
Siempre, mabalin nga adda kapasigam a pakagun-odam iti emosional a panangandingay, ket mabalin a mangliwliwa daytoy uray kaskasano. Ngem saan kadi nga agpayso nga addada nasaem a pakarigatan a nasken a sarangtem a bukbukod? Anian ti kinapudno a no dadduma ti la “puso[m] ti makaammo iti bukodna a kinapait.” (Proverbio 14:10) Ngem adda Persona a naan-anay a makatarus kenka, ket ituktukonna ti pannakigayyemna. Nasarakan ti adu nga agtutubo a ti pannakigayyemna ket dakkel a tulong uray pay iti kasasaeman a tiempo.
Pannakigayyem iti Dios
Napagsaludsodan ti maysa nga agtutubo no ania ti kangrunaan a pagyamananna ken ni Jehova a Dios. Ti sungbatna: “Ti pannakaam-ammomi kenkuana ken panagbalin a nasinged a gayyemna.” Wen, posible ti maaddaan iti kasasayaatan a pannakigayyem iti uniberso! Insurat ti salmista: “Ti kinasinged ken ni Jehova addanto kadagiti agbuteng kenkuana.”—Salmo 25:14.
Ti “kinasinged ken ni Jehova”—anian a nagsudi a gundaway! Ipasimudaag ti orihinal a Hebreo a sao ti ideya ti napudno, awan ilimlimedna a pannakisarita iti maysa a naisangsangayan a gayyem. No kasta, daytat’ nadekket a relasion a naikugnal iti ayat, maysa a pribilehio a pannakigayyem a bunga ti panagtalek iti maysa ken maysa. Kas gayyem ti Dios, mariknam a ti pudno a kinapategmo kas maysa a tao ket ipatpateg daytoy sipupudno a makatarus kenka. Ngem ania dagiti gunggona daytoy a pannakigayyem?
“Pagtalkak Nanipud Kinaubingko”
Adu nga agtutubo, agpapan pay iti pammarang a kinaturedda, ket awan iti panagtalek iti bagida. “Ibagak dagiti opinionko sa addanto met mangibaga iti opinionda isu a naan-anay a baliwakton ti opinionko,” insennaay ti 13 ti tawenna a ni Judy. “Awan unay ti panagtalekko iti bagik.” Nupay kasta, mangilanad ti nailangitan a Gayyemtayo iti naisurat a Saona, ti Biblia, iti espesipiko a giya tapno agbiagtayo a sibaballigi. Kinapudnona, nadisenio ti balakad a naited iti libro ti Biblia a Proverbio tapno mangted “iti bumaro [ti] pannakaammo ken abilidad nga agpanunot,” a tumulong kenkuana a mangilinteg iti desdesna. (Proverbio 1:1-4; 3:1-6) Daytoy ti mangted kenka iti panagtalek! Mabalinmo a maammuan ti kasayaatan a pamay-an ti panagbiag.
Mangipaay ti Biblia, agraman dagiti katulongan ti Biblia kas iti daytoy a magasin, iti balakad iti gistay tunggal aspeto ti biag—manipud iti wagas ti panangpili iti gagayyem agingga iti maitutop a kababalinmo kadagiti nagannakmo. (Proverbio 1:8, 9; 13:20) Dagidiay mangipangag iti kasta a panangiturong ‘maliklikanda dagiti pangsilo ni patay.’ (Proverbio 14:27) Kas pagarigan, nakita ti maysa a balasitang nga agnagan Mae ti pananglais ni manangna kadagiti prinsipio ti Biblia. Dayta a manangna ket nakalkaldaang ti nasapa nga ipapatayna gapu iti nalulok nga estilo ti panagbiagna. Inlawlawag ni Mae no kasano a naliklikanna ti kasta nga imoralidad: “Silalawag pay la a malagipko dagiti prinsipio ni Jehova maipapan iti moralidad, ket daytoy ti mangpabileg kaniak. Dagitoy a prinsipio ti tumulong kaniak a mangamiris no kasano kapudno ni Jehova ket ti dalanna ti kasayaatan.”
Nupay kasta, saan laeng a panangammo kadagiti pagalagadanna ti ramanen ti pannakigayyem ken ni Jehova. Maimatangam ti personal a panaginteresna iti biagmo. Saritaen ti Biblia ni Ari David, a sinursuruan ti Dios manipud kinaagtutubona. Ni David ket nagbalin a gayyem ti Dios, ket nupay napasaranna ti “adu a dukót,” aktual a naimatanganna nga inwanwan ti Dios ti biagna. Sinarita ni David ti maipapan iti “nakaskasdaaw nga ar-aramid” ti Dios agpaay kenkuana ken ti “takkiag,” wenno bileg nga impaay ni Jehova iti biagna. Maikugnal kadagita a personal a kapadasanna, insurat ni David: “Sika ti inanamak, O Soberano nga Apo Jehova, pagtalkak nanipud kinaubingko.” (Salmo 71:5, 17, 18, 20) Maaddaanka met iti kasta a panagtalek bayat a masagrapmo dagiti bendision ni Jehova iti biagmo. Bayat nga ikagumaam a suroten ti panangiwanwanna—agpapan pay kadagiti karit—agpayso a makipagnakanton iti Dios iti maysa a nagpateg a relasion.—Idiligyo iti Genesis 6:9.
Ti Dios Tulongannatayo a Mangsurot iti Umiso a Dalan
Iti kaadda ti isuamin a pakasulisogan ken pakarigatan ti biag, saan a nalaka ti panangsurot iti panangiwanwan ti Dios. Pudno daytoy nangnangruna ken ni Peggy, a maysa nga adikto iti droga ken balangkantis idi agtutubo. Naparukmana ti pannakaadiktona ken binalbaliwanna ti moral a kabibiagna babaen ti panagadalna iti Biblia, isu a napatanorna ti pannakigayyem iti Dios. Ngem intultuloy ni Peggy a sinaranget dagiti umasping a pakarigatan a nangituggod kenkuana nga agpannuray iti droga tapno makalipat. Idi napagsaludsodan no kasano a naisardengna, isut’ simmungbat: “Makunak a daytat’ babaen laeng iti espiritu ni Jehova.”
Ammo idi ni Peggy a mangmangted ti Dios iti nasantuan nga espirituna, wenno aktibo a puersa, iti gagayyemna sa daytoy ti mangpabileg kadakuada nga agbiag babaen kadagiti pagalagadanna. (Aramid 5:32; 1 Corinto 6:9-11) “Addada tiempo ita a sumken dagidiay a rikriknak idi, nangnangruna no agmaymaysaak,” aminen ni Peggy, “ngem dagus nga agkararagak. Ti abilidad a mangparukma kadagitoy a parikut ket ad-adda a makaparagsak kaniak ngem ti aniaman a nagapuanak iti biagko.” Anian a makaparegta a maammuan a kas maysa a gayyem, matulongannatayo ti Dios “maitunos iti pannakabalinna nga agtigtignay kadatayo, [ken] mangaramid ti ad-adda pay a siwawadwad unay ngem kadagiti isuamin a bambanag a dawaten wenno panunotentayo.”—Efeso 3:20.
Ti espiritu ti Dios ti tumulong kadatayo a mangpatanor kadagiti kualidad kas iti mabayag a panagitured, kinaalumamay, ken panagteppel. (Galacia 5:22, 23) Kasta met a kadagiti kongregasion dagiti Saksi ni Jehova, impaay ti Dios dagiti panglakayen, wenno papastor, a dinutokan ti nasantuan nga espiritu tapno mangted iti praktikal a tulong. Kuna pay ni Peggy: “Nagadu ti mangsarsaranay kaniak iti kongregasion, nangnangruna dagiti panglakayen. Dakkel a tulong dayta.”
“Ti Kired Toy Pusok”
“Ti gayyem agayat iti amin a tiempo, ken maysa a kabsat a nayanak no adda riribuk.” Kasta ti kunaen ti Proverbio 17:17 iti The Basic Bible. Nangnangruna a kasapulan ti maysa a gayyem “no adda riribuk.” Nakapadas ni salmista Asaf iti nakaro a pannakariribuk ti panunot, ngem kaskasdi nga immadani iti Dios kas maysa a gayyem. Gapuna, nupay “naduyok ti puso[na]” babaen iti nasaem a rikriknana, nakunana: “Ti Dios ti kired toy pusok.” (Salmo 73:21, 26, 28) Ni Jehova, a pudno a makatarus iti rikrikna ni Asaf, ti nangted kenkuana iti emosional a panangandingay. Ni Jehova isut’ nangpakired ken Asaf tapno saan a mapukawan iti namnama ken kired.
Ti nailangitan a Gayyemtayo ket agbalin met a kas bato a pundasion kenka kabayatan ti narigat a kasasaad. Napasingkedan daytoy ti maysa a tin-edyer babaen ti personal a kapadasanna. Idi agtawen ni Bonnie iti 13, dadduma a babbalasitang iti bassit nga eskuelaan iti probinsiana ti nangrugi a mangisaknap iti mangpadakes, mangpardaya a sayangguseng maipapan kenkuana. Para ken ni Bonnie, daytoy ket pinatin ti isuamin. Adu kadagiti kaeskuelaanna ti immikayen kenkuana, nga inawaganda payen iti manglais a nagnagan. “Adu a rabii a no agawidak ket agsangitak,” inlawlawag ni Bonnie. “Kayatko pay idin a ketlen ti biagko agsipud ta madi unay ti riknak.” Isut’ nagpaandingay iti dadduma a gagayyemna. “Inkagumaak ti makisarita iti tattao, ngem kasla didak maawatan. Imbilangda a nalag-an laeng ti parikutko. No dadduma, nariknak nga agmaymaysaakon.” Aniat’ nangtaginayon iti namnamana agpapan pay iti kasta a pakarigatan? Itultuloyna a kunaen: “No saan a maigapu ken ni Jehova, kinettelko koman ti biagko. Isut’ ay-ayatek unay. Isut’ kasayaatan a gayyemko.” Ita ammonan a ti pannakigayyemna iti Dios isut’ timmulong kenkuana a nangandur iti dayta a makadudog-rikna a kapadasan.
Dakkel a liwliwa ti pannakaammo a maawatan ni Jehova ti kasasaadtayo ken ammona ti eksakto a napasamak no dagiti dadduma ket di mangipakita kadatayo iti pannakipagrikna nga in-inanamaentayo. Kasta met a dakkel a tulong ti pannakaammo a ti Gayyemtayo “ti Ama dagiti nadungngo nga asi” no matratotayo a siuulpit wenno maabusotay pay. No dadduma mabalin a ti mismo a pusotayo ti mangkondenar kadatayo, ngem “ti Dios dakdakkel ngem kadagiti pusotayo ket ammona ti isuamin a bambanag.” (2 Corinto 1:3, 4; 1 Juan 3:20) Pudno a makaliwliwa ti panangammo iti panangmatmat ni Jehova iti maysa a banag. Kas pagarigan, sidadamsak a minolestia ti tallo a lallaki ti maysa a barito nga agtawen iti 13. “Kalpasanna, mabainak unayen ken pinabasolko ti bagik iti napasamak kaniak,” inaminna. “Kasta unay ti leddaangko.” Kalpasanna, rinugianna ti nagsirarak kadagiti naikugnal-Biblia a publikasion ti Watch Tower Society maipapan iti tema a panangrames. “Idi nabasak daytoy nga impormasion, diak napengdan ti riknak ket nagsangitak. Nariknak a kaslattay naikkat ti maysa a dakkel a nadagsen nga awit iti abagak. Maysaak a biktima. Babaen ti panagpannurayko ken ni Jehova, pamilia, ken gagayyem, napagballigiak daytoy a nariribuk a panawen.” Anian a panangandingay ti impaay dagidiay a naikugnal-Biblia a sasao!
Makatulong ti pannakigayyem iti Dios iti adu a wagas! Maaddaantayo iti pudno a panagtalek iti biag, mapatanortayo ti makin-uneg a bileg a mangsurot iti dalan ti Dios, ken maaddaan iti nakired a suporta kabayatan ti narigat a kasasaad. Ngem kasano a mapatanortayo ti kasta a pannakigayyem? Maysa nga artikulo iti masanguanan iti daytoy a serye ti mangilawlawagto.
[Ladawan iti panid 13]
Ti Dios ket makapagbalin a ‘kired ti pusoyo’