Agpatingganto Kadi Daytoy a Lubong?

Ania ti Saan nga Agpatingga?

SANGATAUAN

Ti kuna ti Biblia: Ti Dios “saanna a pinarsua [ti daga] nga awan serserbina no di ket pinormana a pagnaedan.”​—ISAIAS 45:18.

PLANETA A DAGA

Ti kuna ti Biblia: “Lumabas ti maysa a henerasion, ken umay ti maysa a henerasion, ngem ti daga agtalinaed iti agnanayon.”​—ECLESIASTES 1:4.

TI KAIPAPANANNA: Sigun iti Biblia, ti daga ket saanto a pulos madadael ken kanayon a mapagnaedan. Ania ngarud ti kaipapanan ti panagpatingga, wenno panungpalan, ti lubong?

PANUNOTEM: Inkompara ti Biblia ti um-umay a panungpalan daytoy a lubong iti napasamak idi kaaldawan ni Noe. Iti dayta a tiempo, “napno ti daga iti kinaranggas.” (Genesis 6:13) Ngem gapu ta nalinteg ni Noe, isu ken ti pamiliana ket insalakan ti Dios. Ngem dinadaelna dagiti dakes a tattao babaen ti layus. Maipapan iti napasamak idi, kuna ti Biblia: “Daydi Layus, ti nangdadael iti daan a lubong.” (2 Pedro 3:6, Ti Baro a Naimbag a Damag Biblia) Dayta ti panagpatingga ti lubong iti daydi a tiempo. Ngem ania ti nadadael? Saan a ti daga, no di ket dagiti dakes a tattao iti daga. Isu a no ibaga ti Biblia ti panungpalan ti lubong, saanna a tuktukoyen ti pannakadadael ti planeta. Imbes ketdi, tuktukoyenna ti pannakadadael dagiti dakes a tattao ditoy daga ken ti inaramidda a sistema ti bambanag.

Anianto ti Agpatingga?

PROBLEMA KEN KINADAKES

Ti kuna ti Biblia: “Iti saanen a mabayag, awanton dagiti managdakdakes; kitaemto ti dati nga ayanda, ket awandanton. Ngem dagiti naemma kukuadanto ti daga, ken maragragsakandanto unay iti naruay a talna.”​—SALMO 37:10, 11.

TI KAIPAPANANNA: Ti Layus idi kaaldawan ni Noe saanna nga inikkat a namimpinsan ti kinadakes. Kalpasan ti Layus, pinagbalin manen dagiti dakes a tattao a miserable ti biag ti amin. Ngem iti din agbayag, pagpatinggaenton ti Dios ti kinadakes. Kas imbaga ti salmista: “Awanton dagiti managdakdakes.” Pagpatinggaento ti Dios ti kinadakes babaen ti Pagarianna​—maysa a sangalubongan a gobierno idiay langit a mangituray kadagiti nalinteg a tattao.

PANUNOTEM: Suportaranto ngata dagiti agtuturay ditoy daga ita ti Pagarian ti Dios? Ibaga ti Biblia a saan. Busorendanto ti Pagarian ti Dios, ket kamali dayta. (Salmo 2:2) Anianto ti resultana? Sukatanto ti Pagarian ti Dios ti amin a gobierno ti tao ket “daytanto laeng ti agtalinaed iti agnanayon.” (Daniel 2:44) Ngem apay a masapul nga agpatingga ti panagturay ti tao?

KASAPULAN​—Panagpatingga ti Panagturay ti Tao

Ti kuna ti Biblia: “Saan a naikkan ti tao iti autoridad a mangiturong uray iti addangna.”​—JEREMIAS 10:23.

TI KAIPAPANANNA: Saan a naparsua dagiti tattao a mangituray iti bagida. Saanda a kabaelan nga iturayan ti padada a tao ken solbaren dagiti problemada.

PANUNOTEM: Ibaga ti Britannica Academic a dagiti gobierno iti lubong kasla saanda a kabaelan a “solbaren dagiti problema iti lubong a kas iti kinapanglaw, bisin, sakit, natural a didigra, ken gubat wenno dadduma pay a kinaranggas.” Sa innayonna, ‘patien ti dadduma a maysa laeng a sangalubongan a gobierno ti makasolbar kadagitoy a problema.’ Ngem uray no agkaykaysa ti amin a gobierno ti tao, ti lubong ket iturturayan latta dagiti imperpekto a tattao a saan a makasolbar kadagiti problema a nadakamat. Ti laeng Pagarian ti Dios ti kakaisuna a gobierno nga addaan iti pannakabalin a permanente a mangsolbar kadagiti amin a problema iti intero a lubong.

Isu a sigun iti Biblia, ti panungpalan ti lubong​—ti agdama a dakes a sistema ti bambanag​—ket saan a rumbeng a pagbutngan dagiti naimbag a tattao. Imbes ketdi, nagsayaat a padaanan dayta ta daytoy nadadael a daan a lubong ket masuktanto iti nagsayaat a baro a lubong ti Dios!

Kaanonto a mapasamak amin dagitoy? Ilawlawag ti sumaruno nga artikulo ti sungbat ti Biblia.