Salsaludsod Dagiti Agbasbasa
Ti kadi kapaliiwan ni David a mabasa iti Salmo 37:25 ken ti kinuna ni Jesus iti Mateo 6:33 kaipapananna a saan a pulos ipalubos ni Jehova a mabisinan ti maysa a Kristiano?
Kinuna ni David a ‘saan pay a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.’ Dayta nga imbagana ket maibatay iti bukodna a kapadasan. Ammona a ti Dios ay-aywananna dagiti nalinteg. (Sal. 37:25) Nupay kasta, di kayat a sawen ti kinuna ni David nga awanto ti adipen ti Dios nga agkurang iti kasapulan ken saanto a pulos mapasamak dayta.
Adda dagiti gundaway a nagpasar ni David iti narigat a kasasaad, kas idi itartarayanna ni Saul. Idi naibusen ti abastoda a taraon, nagkiddaw ni David iti tinapay para kenkuana ken kadagiti kakaduana. (1 Sam. 21:1-6) Isu nga iti daydi a kanito, “agsapsapul [ni David] iti tinapay.” Ngem uray iti dayta a narigat a kasasaad, narikna ni David a saan a binaybay-an ni Jehova. Kinapudnona, awan mabasatayo a nagpalpalama ni David iti kanenna.
Iti Mateo 6:33, mabasatayo nga ipasigurado ti Dios nga ipaayna ti kasapulan dagiti matalek nga adipenna a mangyun-una iti Pagarian. Kinuna ni Jesus: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag [pakairamanan ti taraon, inumen, ken kawes] mainayonto kadakayo.” Ngem imbaga met ni Jesus a gapu iti pannakaidadanes, mabalin a makapasar dagiti ‘kakabsatna’ iti bisin. (Mat. 25:35, 37, 40) Napasaran dayta ni apostol Pablo. Adda dagiti gundaway a nagbisin ken nawaw.—2 Cor. 11:27.
Kinuna ni Jehova a maidadanestayo iti nadumaduma a pamay-an. Mabalin nga ipalubosna a mapaidamantayo iti taraon bayat a mangipapaaytayo iti sungbat kadagiti akusasion ti Diablo. (Job 2:3-5) Kas pagarigan, gapu iti pannakaidadanes, nagpeggad ti biag ti dadduma a kakabsattayo, kas kadagidi naibalud kadagiti kampo konsentrasion dagiti Nazi. Ti maysa a nakadakdakes a pamay-an dagiti Nazi a mangdadael iti kinatarnaw dagiti Saksi ket ti panangipaidamda kadakuada iti taraon. Nagtalinaed a natulnog ken Jehova dagiti matalek a Saksi, ket saanna ida a binaybay-an. Impalubosna a mapasaranda dayta a pakasuotan, no kasano nga ipalpalubosna a mapasaran ti amin a Kristiano ti nagduduma a pakasuotan. Nupay kasta, sigurado a suportaranna ti amin nga agsagsagaba maigapu iti naganna. (1 Cor. 10:13) Laglagipentayo koma ti kunaen ti Filipos 1:29: “Naited kadakayo ti pribilehio maigapu ken Kristo, saan laeng a tapno maaddaankayo iti pammati kenkuana, no di ket tapno agsagaba met maigapu kenkuana.”
Inkari ni Jehova a saanna a baybay-an dagiti adipenna. Kas pagarigan, kuna ti Isaias 54:17: “Aniaman nga igam a mabukelto maibusor kenka saanto nga agballigi.” Ipasigurado daytoy ken ti dadduma pay a kari nga agtalinaedto a natalged ti ili ni Jehova kas grupo. Ngem kas indibidual, mabalin nga agpasar ti maysa a Kristiano kadagiti pakasuotan, a mabalin pay ketdi nga agresulta iti ipapatayna.