PALASIO
Ti naarian a pagtaengan ti maysa nga agturay; no dadduma ti nakalawlawa ken nadaeg a pagtaengan ti maysa a prinsipe wenno nabileg a tao nga aduan kinabaknang. (Da 4:4; Lu 11:21; kitaenyo ti PALASIO TI GOBERNADOR.) Masansan a ti maysa a Hebreo a sao maipaay iti palasio, heh·khalʹ, ket nayaplikar iti templo a naibilang a pagnanaedan ti Soberano nga Apo Jehova. (1Sm 1:9; 1Ar 6:3; Esd 5:14; Da 5:3) Dagiti kadaanan a palasio ket masansan a buklen ti kasla kastilio a sarsarikedked nga addaan kadagiti baluarte a pader ken dadakkel a ruangan. (Ne 1:1; Est 1:2) Nakangayngayed ken nakapimpintas dagiti arubayan ti palasio gapu ta kadawyan nga addaanda iti nakalawlawa a paraangan ken kadagiti naluho a pribado a minuyongan.—Est 1:5.
Dakamaten ti Biblia dagiti palasio ti Asiria (Na 1:1; 2:6), Babilonia (2Ar 20:18; 2Cr 36:7; Isa 39:7; Da 1:4; 5:5), ken Persia (Esd 4:14; Est 7:7, 8). Nadeskribir dagiti palasio ti Babilonia kas “palasio ti napalalo a ragsak.” (Isa 13:22) Ti maysa kadagiti kangayedan a palasio ti kadaanan a lubong ket imbangon ni Solomon, kas ipasimudaag ti panagsiddaaw iti dayta ti reyna ti Sheba.—1Ar 10:4, 5.
Ti palasio ni Solomon, a naipatakder iti Bantay Moria iti abagatan ti templo, ket maysa laeng kadagiti adu a patakder a kukua ti gobierno iti daytoy a lugar, nga agarup 13 a tawen ti pannakaibangonda amin. Dagiti karaman kadagitoy nga agaabay a patpatakder a kukua ti ari ket ti Balay ti Bakir ti Libano, ti Beranda dagiti Adigi, ken ti Beranda ti Trono. Malaksid iti palasio ti ari, adda pay maysa a balay a naisangsangayan nga agpaay iti anak a babai ni Faraon, maysa kadagiti adu nga assawa ni Solomon.—1Ar 7:1-8.
Bassit laeng ti naited kadatayo a detalye ti palasio ni Solomon no idilig kadagiti detalye ti pimmalasio a templo. Ngem sigurado a nakadakdakkel a patakder dayta kas ipakita ti kadakkel dagiti pamuonna a bato. No maipapan iti kaatiddogda, ti rukod dagitoy a batbato ket walo a kasiko (3.6 m; 11.7 pie) ken sangapulo a kasiko (4.5 m; 14.6 pie), ket sigurado a maipada met laeng ti rukod ti kaakaba ken kapuskolda, isu a tinontonelada ti kadagsenda. Dagiti didingna ket nangina a batbato a siaannad a naragadi kadagiti espesipiko a rukod agpadpada iti makin-uneg ken makinruar a sikigan.—1Ar 7:9-11; idiligyo ti Sal 144:12.
Mabalin nga adda iti panunot ti salmista dagiti arkos ken al-alikamen ti palasio ni Solomon idi dinakamatna iti maika-45 a salmo ti maipapan iti “naindaklan a marfil a palasio.” Inyaplikar ni apostol Pablo ti sasao daytoy a salmo ken Jesu-Kristo a nailangitan nga Ari.—Sal 45:8, 15; idiligyo ti Sal 45:6, 7 iti Heb 1:8, 9; Lu 4:18, 21.