Ti Asi ni Jehova Alangonennatayo iti Kinaawan Namnama

“Kaasiannak, O Dios, kas mayannurot iti naayat a kinamanangaasim. Kas mayannurot iti karuay dagiti kaasim punasem dagiti salungasingko.”​—SALMO 51:1.

1, 2. Kasano a ti nadagsen a basol apektaranna ti adipen ni Jehova?

DITAY mabalin a salungasingen ti linteg ni Jehova a di agsagaba. Pudno daytoy no makabasoltayo iti nadagsen iti Dios! Uray no nabayagtayon a matalek nga agserserbi ken Jehova, mabalin a mariribukan wenno maladingitantayo unay no masalungasingtayo ti lintegna. Mabalin a mariknatayo a binaybay-annatayon ni Jehova ket saantayon a maikari nga agserbi kenkuana. Ti basoltayo mabalin nga arignat’ napuskol nga ulep a mangabbong iti lawag ti anamong ti Dios.

² Napasaran idi naminsan ni Ari David iti nagkauna nga Israel ti kasta a kasasaad. Kasano a napasamak daytoy?

Dagiti Biddut Mabalin a Mangituggod iti Nadagsen a Basol

3, 4. Aniat’ napasamak ken Ari David kabayatan ti panawen ti kinarang-ay?

³ Inay-ayat ni David ti Dios ngem nagbiddut kadagiti addangna a nangituggod kadagiti nadagsen a basol. (Idiligyo ti Galacia 6:1.) Mabalin a mapasamak daytoy iti asinoman nga imperpekto a tao, nangruna no addaan iti turay. Kas maysa a narang-ay nga ari, natan-ok ken nabileg ni David. Siasino ti makaitured a mangkarit iti saona? Sidadaan ken situtulok dagiti makabael a lallaki nga agserbi kenkuana, ket tungpalen a dagus dagiti umili ti ipaaramidna kadakuada. Kaskasdi, nagbasol ni David iti panangpaaduna iti assawana ken iti panangbilangna kadagiti tattao.​—Deuteronomio 17:14-20; 1 Cronicas 21:1.

⁴ Iti daytoy a panawen ti material a kinarang-ay, nakaaramid ni David kadagiti nadagsen a basol a maibusor iti Dios ken tao. Wen, ti maysa a basol mangiturong iti sabali a kas naabel a sag-ut a dinisenio ni Satanas! Bayat a makirangranget dagiti padana nga Israelitas kadagiti Ammonita, adda ni David iti tuktok ti palasiona a mangbuybuya iti napintas nga asawa ni Uria a ni Bat-seba nga agdigdigos. Adda ni Uria idiay paggugubatan, ket pinaala ti ari ni Bat-seba iti palasiona sana kinaidda. Darepdepenyo ti pannakakigtotna idi naammuanna iti saan a mabayag a nasikoganna! Pinagawid ni David ni Uria, a namnamaenna a kaiddaenna ni Bat-seba iti kasta agparang nga isut’ makinputot iti ubing. Nupay binartek ni David, nagkedked ni Uria a makikaidda iti asawana. Madanagan unayen ni David, isu a nagsurat iti komandantena a ni Joab a sililimed a binilinna nga ibaonna ni Uria iti sango ti paggugubatan iti kasta masigurado ti ipapatayna. Natay ni Uria iti gubat, dinung-awan ti balona, kalpasanna inasawa ni David ni Bat-seba sakbay a madlaw dagiti umili a masikog.​—2 Samuel 11:1-27.

5. Aniat’ napasamak kalpasan ti panagbasol da David ken Bat-seba, ket aniat’ epekto dagiti basolna kenkuana?

⁵ Babaen ken propeta Natan, imbutaktak ti Dios dagiti basol ni David ket kinunana: “Bangonekto ti dakes a maibusor kenka nga agtaud iti balaymo met laeng.” Ket napasamak a natay ti ubing nga impasngay ni Bat-seba. (2 Samuel 12:1-23) Rinames ti inauna nga anak a lalaki ni David a ni Amnon ti mismo a kabsatna iti ama a ni Tamar. Kalpasanna pinatay ti kabsat ni Tamar ni Amnon. (2 Samuel 13:1-33) Pinanggep ti anak ti ari a ni Absalom nga agawen ti trono ken imbabainna ni amana babaen ti panangkaiddana kadagiti kamalala ni David. (2 Samuel 15:1–16:22) Naggibus ti guerra sibil iti ipapatay ni Absalom nga ad-adda a namagladingit ken David. (2 Samuel 18:1-33) Nupay kasta, dagiti basol ni David ti namagpakumbaba kenkuana ken nangipabigbig kenkuana iti pannakasapul ti panagtalinaed a nadekket iti manangngaasi a Diosna. No makabasoltayo, sipapakumbabatay koma nga agbabawi ken umadani ken Jehova.​—Idiligyo ti Santiago 4:8.

6. Apay a nangnangruna a nakabasol ni Ari David?

⁶ Nangnangruna a nakabasol ni David agsipud ta maysa nga agturay nga Israelita a makaammo unay iti Linteg ni Jehova. (Deuteronomio 17:18-20) Saan a kas iti faraon ti Egipto wenno iti ari ti Babilonia nga awanan iti kasta a pannakaammo ken mabalin a masansan a makaaramid iti di makaay-ayo iti Dios. (Idiligyo ti Efeso 2:12; 4:18.) Kas kameng ti maysa a nasion a dedikado ken Jehova, ammo ni David a nadagsen a basol ti pannakikamalala ken ti pammapatay. (Exodo 20:13, 14) Ammo met dagiti Kristiano ti linteg ti Dios. Kas ken David, nupay kasta, masalungasing dagiti dadduma dayta gapu iti nakayanakan a kinamanagbasol, natauan a kinalap-it, ken napigsa a sulisog. No bilang mapasamak daytoy iti asinoman kadatayo, saantay koma nga agtalinaed iti nasipnget a kasasaad a mamagkudrep iti naespirituan a panagkitatayo ken mangabungot kadatayo iti kinaawan namnama.

Mangpabang-ar ti Panangipudno

7, 8. (a) Aniat’ napasamak ken David idi pinadasna nga ilinged dagiti basolna? (b) Apay a rumbeng nga ipudno ken tallikudantayo ti basol?

⁷ No nakaaramidtayo iti nadagsen a panangsalungasing iti linteg ti Dios, mabalin a marigatantayo a mangipudno kadagiti basoltayo, uray ken ni Jehova. Aniat’ mabalin a mapasamak kadagitoy a kasasaad? Idiay Salmo 32, inannugot ni David: “Idi nagulimekak [imbes nga agpudno] dagiti tulangko narmayda bayat ti agmalmalem a panagas-asugko. Ta aldaw ken rabii ta imam [ni Jehova] sibabantot a naiparabaw kaniak. Ti kinalapsatko namalbaliw a kas gapu iti kinatikag ti tiempo ti kalgaw.” (Sal 32 Bersikulo 3, 4) Nautoyan ni nakabasol a David iti panangpadasna nga ilemmeng ti basolna ken ep-epen ti matutuok a konsiensiana. Napukawna ti pigsana gaput’ pannakariribukna, a kas iti kayo a maganggangan iti tiempo ti tikag. Kinapudnona, mabalin a nagsagaba iti mental ken pisikal. Napukawna ti rag-ona. No adda asinoman kadatayo nga adda iti umarngi a kasasaad, aniat’ rumbeng nga aramidentayo?

⁸ Mangyeg pammakawan ken bang-ar ti panangipudno iti Dios. “Impudnok met laeng kenka ti basolko, ket ti kinadakesko diak inlinged,” inkanta ni David. “Kinunak: ‘Ipudnok dagiti salungasingko ken Jehova.’ Ket sika pinakawanmo ti kinakas-ang dagiti basolko.” (Salmo 32:5) Mariribukankay aya gapu iti nailemmeng a basol? Saan aya a nasaysayaat nga ipudno ken isardeng ti dakes nga aramid tapno kaasiannakayo ti Dios? Apay a dikay paayaban dagiti panglakayen ti kongregasion tapno tulongandakayo nga umimbag iti naespirituan? (Proverbio 28:13; Santiago 5:13-20) Mapakawankayo no agbabawikayo, ket inton agangay maisubli ti Nakristianuan a rag-oyo. “Naragsak daydiay mapakawan ti salungasingna, a ti basolna maabbongan,” kinuna ni David. “Naragsak ti tao a di pangipatayan ni Jehova iti kinakillo, ken iti espirituna awan ti sikap.”​—Salmo 32:1, 2.

9. Kaano a naputar ti Salmo 51, ken apay?

⁹ Adda sungsungbatan da David ken Bat-seba ken ni Jehova a Dios gapu iti basolda. Nupay madusada koma iti ipapatay gapu kadagiti basolda, kinaasian ida ti Dios. Kinaasianna ni David kangrunaanna gapu iti tulag ti Pagarian. (2 Samuel 7:11-16) Makita iti Salmo 51 ti panagbabawi ni David kadagiti basolna a nakainaigan ni Bat-seba. Pinutar ti managbabawi nga ari daytoy makatukay-rikna a salmo kalpasan nga impabigbig ni propeta Natan iti konsiensiana ti kinakas-ang ti panangsalungasingna iti linteg ti Dios. Inturtured ni Natan nga indatag dagiti basol ni David iti imatangna, a kas dagiti Kristiano a panglakayen masapul a naturedda a mangaramid iti kasta. Imbes nga aglibak ken papatayna ni Natan, sipapakumbaba a nagpudno ti ari. (2 Samuel 12:1-14) Ipakita ti Salmo 51 ti imbagana iti Dios iti kararag maipapan kadagiti nakababain nga aramidna ket maikanatad unay dayta iti panangutob a buyogen ti kararag, nangruna no nagbasoltayo ken agpakpakaasi ken ni Jehova.

Adda Sungsungbatantayo iti Dios

10. Kasano a maalangon ni David iti naespirituan?

¹⁰ Saan a dinawat ni David ti pannakapalabas ti basolna no di ket nagpakpakaasi: “Kaasiannak, O Dios, kas mayannurot iti naayat a kinamanangaasim. Kas mayannurot iti karuay dagiti kaasim punasem dagiti salungasingko.” (Salmo 51:1) Iti panagsalungasingna, linab-awan ni David dagiti beddeng ti Linteg ti Dios. Nupay kasta, adda namnamana a maalangon iti naespirituan no pakawanen ti Dios kas mayannurot iti naayat a kinamanangaasina, wenno nasungdo nga ayat. Ti karuay ti kaasi ti Dios idi napalabas ti nangted iti managbabawi nga ari iti panagtalek a punasen ti Nangaramid kenkuana dagiti salungasingna.

11. Aniat’ impasimudaag dagiti daton iti Aldaw ti Pannakaabbong, ket aniat’ kasapulan ita tapno maisalakantayo?

¹¹ Kas inladawan dagiti daton iti Aldaw ti Pannakaabbong, impasimudaag ni Jehova nga adda pamay-anna a mangpunas iti basol dagiti managbabawi. Ammotayo a kaasian ken pakawanennatayo gapu iti pammatitayo iti daton a subbot ni Jesu-Kristo. No ni David, a dagiti laeng ladawan ken anniniwan daytoy a daton ti adda idi kaaldawanna, ket makapagtalek iti naayat a kinamanangaasi ni Jehova, ad-adda ngarud a makainanama dagiti agdama-aldaw nga adipen ti Dios iti subbot a naipaay a pakaisalakananda!.​—Roma 5:8; Hebreo 10:1.

12. Aniat’ kaipapanan ti panagbasol, ket kasanot’ panangmatmat ni David iti basolna?

¹² Iti panagpakaasina iti Dios, innayon ni David: “Bugguannak iti amin a kinadakesko, ket dalusannak iti basolko. Ta ammok dagiti salungasingko, ket ti basolko kanayon nga adda ditoy sanguanak.” (Salmo 51:2, 3) Ti panagbasol kaipapananna ti pannakaikapis iti marka no kadagiti pagalagadan ni Jehova. Kasta ti naaramid ni David. Ngem saan a kas iti mammapatay wenno mannakikamalala a di mariribukan iti basolna, a madanagan laeng gapu iti pannusa a lak-amenna wenno iti posible a pannakaalana ti sakit. Kas agay-ayat ken Jehova, kagura ni David ti dakes. (Salmo 97:10) Karimonna ti basolna a mismo ket tarigagayanna a punasen ti Dios a mamimpinsan ti basolna. Silalagip ni David kadagiti salungasingna ket pagbabawianna unay ti itutulokna iti dakes a tarigagayna. Kanayon nga adda iti sanguananna ti basolna, ta saan a pulos nga agtalna ti nakabasol a konsiensia ti managbuteng-Dios a tao agingga a di agbabawi, agpudno, ken pakawanen ni Jehova.

13. Apay a naikuna ni David a ti Dios laeng ti nakabasolanna?

¹³ Iti panangaklonna iti basolna ken Jehova, kinuna ni David: “Sika, sika laeng, ti nakabasolak, ken nakaaramidak iti dakes iti sanguanam, iti kasta mapaneknekan a nalintegka no agsaoka, ken agraniagka no mangukomka.” (Salmo 51:4) Linabsing ni David dagiti linteg ti Dios, dina rinaem ti saadna a kas ari, ken “awan duadua a tinabbaawan[na] ni Jehova,” inumsina. (2 Samuel 12:14; Exodo 20:13, 14, 17) Nakabasol met ni David iti kagimongan ti Israel ken kadagiti kameng ti pamiliana, no kasano a ti bautisado a nakabasol pagladingitenna wenno pagsennaayenna ti kongregasion Kristiano ken dagiti ingungotenna. Nupay ammo ti managbabawi nga ari a nakabasol kadagiti padana a tao kas ken Uria, binigbigna ti dakdakkel a sungsungbatanna ken Jehova. (Idiligyo ti Genesis 39:7-9.) Binigbig ni David a nalinteg ti panangukom ni Jehova. (Roma 3:4) Dagiti Kristiano a nakabasol masapul a kasta met ti panangmatmatda.

Dagiti Mangep-ep a Sirkumstansia

14. Ania dagiti mangep-ep a sirkumstansia a dinakamat ni David?

¹⁴ Nupay saan nga inkalintegan ni David ti bagina, kinunana: “Adtoy! Nayanakak iti kinadakes, ket iti basol inyinawnak ni inak.” (Salmo 51:5) Nayanak ni David iti kinadakes, ket napasaran ni inana ti ut-ot ti panagpasngay gapu iti natawid a kinamanagbasol. (Genesis 3:16; Roma 5:12) Di kayat a sawen dagiti saona a dakes ti umiso a panagdenna dagiti agassawa, panaginaw, ken panagpasngay, yantangay ti Dios ti akin-urnos iti panagasawa ken panagpasngay; awan met tuktukoyen ni David nga espesipiko a basol ni inana. Naiyinaw iti basol agsipud ta managbasol dagiti dadakkelna a kas dagiti amin nga imperpekto a tattao.​—Job 14:4.

15. Nupay ikuenta ti Dios dagiti mangep-ep a sirkumstansia, aniat’ saantay koma nga aramiden?

¹⁵ No nakabasoltayo, mabalintay a dakamaten iti kararagtayo iti Dios dagiti mangep-ep a sirkumstansia a mabalin a nangiturong iti panagbasoltayo. Ngem saantay koma a pagpambar ti di kaikarian a kinamanangaasi ti Dios iti panangaramid ti kinaderrep wenno aramaten ti natawid a kinamanagbasol a kasla asuk a panglinged iti basoltayo. (Judas 3, 4) Inannugot ni David a pinalubosanna nga agay-ayam iti panunotna ti dakes ken timmulok iti sulisog. Ikararagtayo a ditay koma matnag iti sulisog ken agtignaytayo a maitunos iti kasta a kararag.​—Mateo 6:13.

Dawatenyo ti Pannakadalus

16. Ania a galad ti pakaay-ayuan ti Dios, ken kasano koma nga apektaranna ti kababalintayo?

¹⁶ Mabalin nga agparang dagiti tao a kas nasayaat nga indibidual a napasnek iti Dios, ngem makitana ti adda iti unegda. Kinuna ni David: “Adtoy! Tarigagayam [Jehova] ti kinapudno kadagiti kaunggan a paset; ket iti kaunggan a paset ipakaammom kaniak ti kinasirib.” (Salmo 51:6) Nakabasol ni David iti panagulbod ken kinasikap iti panangimaniobrana iti pannakatay ni Uria tapno maabbongan ti kinapudno maipapan iti panagsikog ni Bat-seba. Nupay kasta, ammona a kaay-ayo ti Dios ti kinapudno ken kinasanto. Nasayaat koma ti epekto daytoy iti kababalintayo, ta ukomennatayo ni Jehova no mangallilawtayo. (Proverbio 3:32) Ammo met ni David a no ‘ipakaammo kenkuana [ti Dios] ti kinasirib,’ kas managbabawi nga ari, kabaelanna a tungpalen dagiti pagalagadan ti Dios iti unos ti panagbiagna.

17. Aniat’ kaipapanan ti panangikararag ti pannakadalus babaen ti hisopo?

¹⁷ Gapu ta nabigbig ti salmista ti pannakasapulna iti tulong ti Dios iti panangparmek kadagiti dakes a pagannayasan, impakpakaasina pay: “Dalusannak iti basolko babaen ti hisopo, ket nadalusakto; bugguannak, ket napudpudawakto ngem niebe.” (Salmo 51:7) Ti mula a hisopo (nalabit marjoram, wenno Origanum maru) ti maysa kadagiti us-usarenda idi iti seremonia ti pannakadalus dagiti dati nga agkukutel. (Levitico 14:2-7) Isu a maikanatad nga inkararag ni David ti pannakadalusna iti basolna babaen ti hisopo. Dinawatna met ken Jehova a bugguanna tapno madalusan a naan-anay, napudpudaw ngem ti nadalus a niebe. (Isaias 1:18) No adda kadatayo ita ti duddudogen ti konsiensiana gapu iti naaramidna a basol, agtalektayo koma a no dawatentayo ti pammakawan ti Dios a buyogen ti panagbabawi, madalusannatayo gapu iti daton a subbot ni Jesus.

Dawatenyo ti Pannakaisubli

18. Aniat’ kasasaad ni David sakbay a nagbabawi ken nagpudno, ket kasano a ti pannakaammo iti daytoy makatulong ita?

¹⁸ Maawatan ti asinoman a Kristiano a nagsagaba iti nariribuk a konsiensia dagiti sao ni David: “Ipangngegmo [ni Jehova] kaniak ti rag-o ken ragsak, tapno dagiti tulang a rinumekmo maragsakanda.” (Salmo 51:8) Sakbay a nagbabawi ken impudno ni David dagiti basolna, nakaay-ay-ay ti kasasaadna gapu iti nariribuk a konsiensiana. Saan a naay-ayo uray kadagiti kanta ti rag-o ken ragsak nga imparang dagiti agkakalaing a kumakanta ken tumutokar. Nagsagaba iti kasta unay ni managbasol a David gapu iti di pananganamong ti Dios ta inyarigna ti bagina iti tao a narumekrumek dagiti tulangna. Tarigagayanna ti pammakawan, pannakapaimbag iti naespirituan, ken ti pannakaisubli ti rag-o nga adda idi kenkuana. Kasapulan met ita ti managbabawi a nakabasol ti pammakawan ni Jehova tapno magun-odna manen ti rag-o nga adda kenkuana sakbay a nakaaramid iti banag a mamagpeggad iti pannakirelasionna iti Dios. Ti pannakaisubli ti “rag-o ti nasantuan nga espiritu” iti managbabawi a tao ipakitana nga isut’ pinakawanen ni Jehova ken ay-ayatenna. (1 Tesalonica 1:6) Anian a makaliwliwa daytoy!

19. Kasanot’ panagrikna ni David no punasen ti Dios dagiti amin a kinadakesna?

¹⁹ Inkararag pay ni David: “Ilingedmo ta rupam kadagiti basbasolko, ket punasem dagiti amin a kinadakesko.” (Salmo 51:9) Ditay namnamaen a panuynoyan ni Jehova ti basol. Gapuna, dinawat kenkuana ni David nga ilingedna ti rupana kadagiti basolna. Impakpakaasi pay ti ari a punasen ti Dios dagiti amin a kinadakesna, nga ikkatenna amin a kinakillona. No laeng koma aramiden ni Jehova dayta! Alangonenna ti rikna ni David, palag-anenna ti nariribuk a konsiensiana, ken ipakaammona iti managbabawi nga ari a pinakawanen ti naayat a Diosna.

No Ngay Nakabasolkayo?

20. Aniat’ maibalakad iti asinoman a Kristiano a nakabasol iti nadagsen?

²⁰ Ipakita ti Salmo 51 nga asinoman a dedikado nga adipen ni Jehova a nakabasol iti nadagsen ngem managbabawi mabalinna a simamatalek a dawaten kenkuana a kaasianna ken dalusanna iti basolna. No maysakayo a Kristiano a nakabasol, apay a dikay dawaten ti pammakawan ti nailangitan nga Amatayo iti napakumbaba a kararag? Bigbigenyo ti pannakasapulyo iti tulong ti Dios tapno magun-odyo ti anamongna, ken dawatenyo nga isublina ti sigud a rag-oyo. Sitatalek a makapagkararag dagiti managbabawi a Kristiano ken Jehova a buyogen ti kakasta a dawdawat, ta ‘isu mamakawan iti nawadwad.’ (Isaias 55:7; Salmo 103:10-14) Siempre, nasken a paayabanyo dagiti panglakayen ti kongregasion tapno matulongandakayo iti naespirituan.​—Santiago 5:13-15.

21. Aniat’ sumaruno nga intay usigen?

²¹ Ti asi ni Jehova alangonenna dagiti tattaona iti kinaawan namnama. Ngem intay usigen dagiti dadduma pay a naimpusuan a panagpakaasi ni managbabawi a David idiay Salmo 51. Ti panangusigtayo iti daytoy ipakitana a saan a laisen ni Jehova ti nadudog a puso.

Kasanoyo a Sungbatan?

◻ Aniat’ epekto ti nadagsen a basol iti adipen ni Jehova?

◻ Kasano a naapektaran ni David idi a pinadasna nga ilinged ti basolna?

◻ Apay a kinuna ni David a ti Dios laeng ti nakabasolanna?

◻ Nupay ikuenta ti Dios dagiti mangep-ep a sirkumstansia no makabasoltayo, aniat’ saantay koma nga aramiden?

◻ Aniat’ rumbeng nga aramiden ti maysa a Kristiano no nakabasol iti nadagsen?