Dagiti Kangrunaan a Paset ti Biblia Salmo 42 ingganat’ 72

Manginanamaka ken Jehova

Sarsarangten ni Jehova dagiti suot ti pammati a buyogen ti panagibtur agsipud ta ti Dios ti Kamang ken Manangispalda. Anian a nagsayaat ti pannakaipakita daytoy iti Maikadua a Libro dagiti Salmo! Wen, paneknekan ti Salmo 42 ingganat’ 72 a mabalintay ti agibtur no sikakararag nga aguraytayo ken Jehova nga agtignay a maipaay kadatayo.

“Manginanamaka iti Dios”

Pangngaasiyo ta basaenyo ti Salmo 42 ingganat’ 45. Maladingitan ti maysa a Levita a naidestierro ket di makapan idiay santuario ni Jehova, ngem isu ti kontento a “manginanama iti Dios” nga agtignay kas ti Manangispalna. (Salmo 42, 43) Kalpasanna immay ti panagasug manipud ti agpegpeggad a nasion, nalabit tuktukoyenna ti iraraut dagiti Asirio iti Juda idi kaaldawan ni Ari Ezekias. (Salmo 44) Sumaganad, isu ti naarian a kanta ti panagkasar nga itudtudona ti Mesias, ni Jesu-Kristo.​—Salmo 45.

◆ 42:1​—Kasano a ti salmista naiyarig a kas ‘ti ugsa a mawaw kadagiti baresbes a dandanum’?

Gapu iti sumagmamano a rason, daytoy a Levita ti naidestierro. Napalalo unay ti pannakaikapisna iti panagdayaw idiay santuario ni Jehova a nariknana a kasla maysa a maan-anopan, mawawan nga ugsa, wenno kabayan nga ugsa, nga il-iliwenna unay ti danum iti maysa a naganggangan, awan dandanumna a pagilian. Isu ti ‘mawawan,’ wenno il-iliwenna, ni Jehova ken ti pribilehio a panagdayaw iti Dios idiay santuariona.​—Bersikulo 2.

◆ 45:1​—Ania ti “naimbag a banag” a nangtignay ti puso ti salmista?

Ti paset daytoy a salmo ti agaplikar ken Jesu-Kristo. (Salmo 45:6, 7; Hebreo 1:8, 9) Gapuna natignay ti puso ti salmista babaen ti masanguanan a pasamak​—ti pannakaisaad ti Mesianiko a Pagarian idi 1914. Uray met dagiti Saksi ni Jehova matignayda a mangiwaragawag iti daytoy “naimbag a banag.”

Leksion Agpaay Kadatayo: Ti kapadasan ti salmista a naidestierro ti rebbeng a mangtignay kadatayo a mangipakita ti nauneg a panangipateg iti pannakitimtimpuyog a tagtagiragsakentay ita a kadua ti ili ni Jehova. No ti pannakaibalud gapu iti pannakaidadanes ti temporario a manglapped iti pannakikaduatay kadakuada, mabalintay a mennamennaen dagiti napalabas a rag-o iti sagrado a serbisio ken rebbeng nga ikararagtayo ti panagibtur bayat a “manginanama iti Dios” nga isublinatayo iti aktibo a pannakitimpuyog kadagiti managdaydayawna.​—Salmo 42:4, 5, 11; 43:3-5.

Ti Naasi a Kamangtayo

Basaenyo ti Salmo 46 inganat’ 51. Ni Jehova, ti Kamangtayo, pagpatinggaennanto dagiti gubat. (Salmo 46) Isu ti “Ari iti amin a daga,” ket daytoy di maparmek a Mannalaknib isu ti Diostayo iti Agnanayon. (Salmo 47, 48) Dagiti mairurrurumen masapul a manginanamada ken ni Jehova, ngem amin a ‘nangted ti panagyaman kas datonda’ ket “makitadanto ti panangisalakan ti Dios.” (Salmo 49, 50) No agbidduttayo ngem sibababawitayo, kas ti panagbabawi ni David iti basolna ken Batseba, ti Dios ti mangispal kadatayo manipud panagbasol iti dara agsipud ta ‘ti nadudog ken sibababawi a puso saannanto a laisen.’​—Salmo 51.

◆ 46:2​—Kasanonto nga “agbaliw ti daga”?

Uray pay no agpukawto dagiti bambantay idiay baybay iti maysa a natural a didigra iti daga, dagidiay agpannuray iti Dios ket awanto ti pagbutnganda. Anianto man ti mapasamak, addaandanto ti di maisin a panagtalek ken Jehova kas Kamangda.

◆ 51:5​—Iti ania a basol ti tuktukoyen ni David?

Saanna a tuktukoyen a ti panagdenna ti panagasawa, ti panagnginaw ken ti panaganak ket basol; ket saanna met a tuktukoyen ti aniaman nga espisipiko a basol ti inana. Imbes ketdi, bigbigbigenna ti mismo a kinamanagbasolna kas kaputotan ni Adan. (Job 14:4; Roma 5:12) Ni Jehova ti nangipakita ti asi ken ni David saan a gapu iti tulag iti Pagarian no di ket agsipud ta isu ti nagbabawi.​—2 Samuel 7:12-16.

Leksion Agpaay Kadatayo: Ti Salmo 46 ti maibagay idi panawen a ti Jerusalem ket agpegpeggad kadagiti Asirio. Agsipud ta pagaammona a ti ‘Dios ket maysa a kamang, sisisibay unay a saranay iti panagdukot,’ nagkararag ni Ari Ezekias ken ni Jehova, ket simimilagro a naispal ti siudad. (2 Ar-ari, kapitulo 19) No addatayo met iti pagdukotan, rebbeng a pagbalinentayo ti Dios kas Kamangtayo. Kasano? Babaen ti panagtalek kenkuana, panangipangag iti Saona, ken panagtalinaed iti organisasionna.

Naipasiguro ti Pannakaispal

Basaenyo ti Salmo 52 ingganat’ 57. Ti Dios parutenna ti dakes a tao ‘iti daga dagiti sibibiag’ ket “iwarwarsina dagiti tultulang” ti asinoman a mangbusor iti ilina. (Salmo 52, 53) Idi isu ti an-anopan ni Saul, sitatalek ni David maipapan ti nadiosan a pannakaispalna, ket kas maysa a biktima iti kinatraidor, intaklinna dagiti dadagsenna ken ni Jehova. (Salmo 54, 55) Ti salmista ti kontento a manginanama ken ni Jehova a mamagpatingga kadagiti isuamin a pakarigatan.​—salmo 56, 57.

◆ 52:8​—Kasano a ti nalinteg naiyarig kas maysa a kayo nga oliva?

Ti kayo nga oliva mabalin nga isimbolona ti kinamanagbunga, kinapintas, ken kinadaeg. (Jeremias 11:16; Oseas 14:6) Iti daytoy a salmo, ti nadangkes a manangigakat agtungpalto iti dakes a pagtungpalan ti naisupadi iti tao a nalinteg a masalakniban ken rumang-ay kas nalangto a kayo ti oliva.

◆ 54:1​—Apay a kuna ni David, “Isalakannak gapu ita naganmo”?

Ti nasantuan a nagan ket awanan kadagiti misterioso a pannakabalin ngem daytat’ mangirepresentar iti Dios a mismo. Gapuna, babaen iti asugna binigbig ni David a ni Jehova ket kabaelanna nga ispalen ti ilina. (Exodo 6:1-8) Nupay impanayag dagiti Zifeos ti ayan ni David ken Ari Saul, ti iraraut dagiti Filesteo iti Israel ti nangguped ti pananganop ni Saul ken David. (1 Samuel 23:13-29; Salmo 54, superscription) Gapuna inispal ni Jehova ni David.

Leksion Agpaay Kadatayo: Dagiti kabusor ni David ti nangkali ti abut iti sanguananna. (Salmo 57:6) Ti kasta nga abut a pangkemmegda kadagiti tattao ipampamatmatna dagiti napeggad a kasasaad wenno intriga a mamagpeggad kadagiti ad-adipen ni Jehova. Ngem dagiti bumusbusor iti ili ti Dios mabalin a makemmegda kadagiti kabukbukodanda a dakes a gakat. Gapuna no agpannuraytayo ken Jehova ken agannadtayo, maipasiguro ti pannakaispaltayo.​—Proverbio 11:21; 26:27.

“Agur-uray a Siuulimek”

Basaenyo ti Salmo 58 ingganat’ 64. Gaput’ pannakaseknanna kadagiti kinaulpit, nagkararag ni David a maipaay iti nasantuan nga ibabales a maibusor iti managdakdakes. (Salmo 58, 59) Idi agpegpeggad iti pannakaabakna immasug a maipaay iti pannakaisalakan ket isut’ makasiguro nga ipayatpayatto ti Dios dagiti kabusor. (Salmo 60) Ni Jehova ti maysa a kamang nga agpaay ken David; gapuna mabalinna ti aguray a siuulimek a maipaay ti pannakaisalakan. (Salmo 61, 62) Idi napilitan nga agturong idiay let-ang, nalabit idi immalsa ni Absalom, nasarakan ni David ti rag-o ‘iti salinong dagiti payak ti Dios.’ (Salmo 63) Ti salmista nagkararag met a maipaay iti pannalaknib “kadagiti agar-aramid iti kinakillo” ket isut’ sitatalek a ti nalinteg masarakannanto ti kamangna ken ni Jehova.​—Salmo 64.

◆ 58:3-5​—Kasano a dagiti managdakdakes naiyarigda a kasla uleg wenno karasaen?

Ti naulbod, makapardaya a sasao dagiti managdakdakes mabalinna a dadaelen ti dayaw ti biktimada, a kas ti gita ti maysa nga uleg makapapatay. (Samo 140:3; Roma 3:13; Santiago 3:8) Mainayon pay, dagiti managdakdakes ket “kasda la karasaen a tuleng a rinipkanda ti lapayagda,” ta madida a dumngeg ken umawat ti pannakaiwanwan.

◆ 63:3​—Kasano a ti naayat a kinamanangngaasi ti Dios “nasaysayaat ngem ti biag”?

Ti biag a naisina iti Dios ket agkurang iti pudpudno a panggep. Ngem ti nasungdo nga ayat ni Jehova a naiyebkas ken David ti nangted ti pudpudno a kaipapanan ti biagna. Ti kinasinged iti Dios ti kanayon a pagbalinenna a nabagbagas ti biag a maipaay kadagiti naanamongan nga ad-adipenna, nga ipasigurona kadakuada ti nasantuan a tulong ken pannakaiwanwan, ken tulonganna ida a kumita iti masanguanan iti awan-inggana a naragsak a panagbiag.

Leksion Agpaay Kadatayo: Ni David ti kontento a “manginanama a siuulimek” iti Dios nga agtignay maipaay kenkuana. (Salmo 62:1-7) Agsipud ta agpasakop iti pagayatan ni Jehova, natalged ti riknana ket addaan ti naulimek a panagtalek iti Dios. Naaddaantay ti kasta a panagtalek ken Jehova, “ti talna ti Dios” salwadanna dagiti puspuso ken is-isiptayo bayat nga agur-uraytayo iti nadiosan a pannakaisalakan manipud kadagiti kabusor ken rigrigat.​—Filipos 4:6, 7; Salmo 33:20.

Idaydayawtay ti Manangispaltayo

Basaenyo ti Salmo 65 ingganat’ 72. Naidaydayaw ni Jehova kas ti Gubuayan ti aglaplapusanan nga apit, aglaplapusanan a tudo, nalasbang a mulmula, ken umariwekwek nga arban. (Salmo 65) Rebbengna a maaramid ti panagkanta, “agpaay iti dayag ti naganna.” (Salmo 66) Isut’ rebbeng a maitan-ok, ken isu ti maidaydayaw kas “Dios dagiti pannakaisalakan.” (Salmo 67, 68) Ti panagsagaba ti Mesias naipadto, ket naitan-ok ni Jehova kas “ti Manangispal” nga isu ti panginanamaan ti salmista a maipaay iti tulong. (Salmo 69-71) Ti kasta a panagtalek magunggonaanto, ta ti sangalubongan a kinarang-ay ken pannakaispal manipud pannakairurumen ti naipasiguro bayat ti intero a panagturay ti Mesias.​—Salmo 72.

◆ 68:11​—Asino ti mangbukel iti “dakkel a buyot” dagiti babbai?

Kalpasan ti panangusar ni Jehova kadagiti mannakidangadang a lallaki ti Israel a mangparmek iti kabusor, dagiti babbai nga Israelita inwaragawagda ti naimbag a damag ti panagballigi babaen ti musika, kanta, ken salsala. (1 Samuel 18:6, 7; idiligyo iti Exodo 15:20, 21.) Kas panagtulnog kadagiti “sasao” ti Dios, wenno ti bilinna, dagiti lallaki ti Israel nakidangadangda kadagiti kabkabusor a nasnasion idiay Naikari a Daga ket pinarmekda ida. Daytoy ti nangted kadagiti babbai nga Israelita iti naimbag a damag nga iwaragawag iti rambak ti panagballigi. Itatta, dagiti babbai a ministro addaanda met ti naisangsangayan a paset kas dagiti manangiwaragawag ti Pagarian a mangipakpakaammo ti naimbag a damag maipapan kadagiti “sasao” ni Jehova, a ramanenna ti panangted ti pakdaar kadagiti nasnasion a dandanidan parmeken ti Mesianiko nga Ari a ni Jesu-Kristo.

◆ 69:23​—Apay a maikalikagum iti Dios a pagpigergerenna ti lomlomo dagiti kabkabusor?

No dagiti napipigsa a piskel kadagiti lomlomo nairtengda, dagita ti makaipaay iti dakkel a pigsa. Ngem ti pannakapukaw ti pigsa ti mapasamak no dagiti lomlomo agpigergerda, nalabit gapu iti buteng. Iti panagdawatna iti pannakaisalakan, indawat ni David iti Dios a paayenna koma dagiti kabusorna iti pigsada a di umiso ti pannakausarna.

◆ 72:16​—Ania ti kaipapanan daytoy a kinamanagbunga?

‘Ti bunga kas idiay Lebano’ ti mabalin ipakpakitana dagiti binukel a dumadakkelda nga agaassideg unay ken nangato a daytat’ maiyasping kadagiti nakaberberde, narangpaya a kakaykayuan. Nalabit ti terasa agingga kadagiti tuktok ti bantay, dagiti natayag, napuskol a dawa a mangsuportar kadagiti nadagsen a bukbukel ti maiyasping kadagiti nakangatngato a natitibker a cedro iti Lebanon. Itudtudo daytoy ti karkarna nga aglaplapusanan nga apit bayat ti panagturay ti Mesias. Ken ti banag a ‘dagidiay taga ili agrangpayadanto a kas iti ruot’ ipamatmatna a dagiti naindagaan nga iturayan ni Kristo ti pudno nga aglaplapusanan ken adudanto.

Leksion Agpaay Kadatayo: Inkararag ti salmista: “Sika [ni Jehova] a nangiparang kadagiti adu ken naut-ot a pakadanagan, pagbiagennakamto manen ken aonennakamto manen kadagiti kaunegan ti daga.” (Salmo 71:20) Nupay saan a ti Dios ti mangpatpataud kadagita a rigrigat, palubosannatayo a masuot ken tapno makaipaay sungbat iti Manangumsina, ti Diablo. (Santiago 1:13; Proverbio 27:11) Dinto ipalubos ni Jehova ti pannakasulisogtayo iti aglablabes ngem iti kabaelantayo ket matulongannatayo a makalasat kadagiti pakasusuotantayo babaen iti napigsa a pammati. (1 Corinto 10:13; 1 Pedro 1:6, 7) Nakita dagiti napulotan a Kristiano “dagiti adu ken naut-ot a pakadanagan” idi naidadanesda idi kangitingitan ti Gubat Sangalubongan I. Ngem ni Jehova ti ‘nangpabiag kadakuada’ idi 1919, nausarda iti serbisio ti Pagarian, a ti kamaudiananna tinulongan ida ti “dakkel a bunggoy.” (Apocalipsis 7:9) Gapu iti kasta a bunga, pudno unay a ti dayaw ti maiparbeng iti Naindaklan a Manangispal.

Kasapulan ti pammati a manginanama iti Dios nga agtignay nga agpaay kadatayo. Mabalin a kasapulan ti intay panaguray a siuulimek agsipud ta awan ti maaramidantayo a mangbalbaliw iti narigat a kasasaadtayo. Kaskasdi, makapagibturkayo, a kas met laeng dagiti salmista, no kontentotayo a manginanama ken Jehova.