Makonkonsiensiaak
—Matulongannak Kadi ti Biblia Tapno Lumag-an ti Riknak?
Sungbat ti Biblia
Wen. Ibaga ti Biblia ti masapul nga aramidentayo tapno saantayon a makonsiensia. (Salmo 32:1-5) No nagbasoltayo ngem talaga nga agbabbabawitayo, pakawanennatayo ti Dios ken tulongannatayo nga agbalbaliw. (Salmo 86:5) Ipakita ti Biblia a no dadduma, adda pagsayaatanna ti pannakakonsiensia—matulongannatayo a mangbalbaliw iti saan a nasayaat nga aramid tapno saantayton a maaramid manen. (Salmo 51:17; Proverbio 14:9) Isu nga ipakita ti Biblia a saan koma a sobra ti pannakakonsiensiatayo, a baka panunotentayo a saantayon a makapagbalbaliw wenno awanen ti serserbitayo iti Dios. No ngamin kasta ti riknatayo, ‘malmestayo iti napalalo a ladingit.’—2 Corinto 2:7, Ti Baro a Naimbag a Damag Biblia.
Ania dagiti makagapu a makonkonsiensiatayo?
Adu ti mabalin a pakakonsiensiaantayo. Baka mariknatayo a nasaktantayo ti tao nga ay-ayatentayo wenno baka saantayo a naaramid ti ammotayo nga umiso. No dadduma, makonkonsiensiatayo uray no saantayo met koma a makonsiensia. Kas pagarigan, no nangato unay ti ekspektarentayo iti bagitayo, mabalin a makonsiensiatayo no saantayo a maabut dagita. Dayta ti makagapu nga ibaga ti Biblia a balanse koma ti ekspektarentayo iti bagitayo.—Eclesiastes 7:16
Ania ti aramidek no makonkonsiensiaak?
Imbes a maawananka iti namnama gapu ta makonkonsiensiaka, ikarigatam nga ilinteg dagiti bambanag. Kasano?
Akseptarem dagiti kamalim. Ikararagmo ken Jehovaa a Dios a pakawanennaka. (Salmo 38:18; Lucas 11:4) Masiguradom a denggennaka ti Dios no talaga nga agbabawika ken ikarigatam a saanen nga uliten dagiti kamalim. (2 Cronicas 33:13; Salmo 34:18) Mabasana ti puso, a saan a makita ti dadduma. No makita ti Dios nga ikarkarigatantayo ti agbalbaliw, “matalek ken nalinteg [isuna] tapno pakawanennatayo kadagiti basoltayo.”—1 Juan 1:9; Proverbio 28:13.
Siempre, no adda napasaktam, mabalin a kasapulan nga aminem dayta ken naimpusuan a dumawatka iti pammakawan kenkuana. Mabalin a saan a nalaka dayta! Baka kasapulam ti tured ken agbalin a napakumbaba. Ngem no naimpusuan nga agpakawanka, adda dua a pagsayaatanna: Mapalag-ananka, ken maadda ti kappia.—Mateo 3:8; 5:23, 24.
Panunotem dagiti bersikulo ti Biblia maipapan iti asi ti Dios. Kas pagarigan, panunotem ti 1 Juan 3:19, 20. Mabasatayo dita nga ibagbaga ti Biblia a mabalin a ‘babalawennatayo ti pusotayo’—kayatna a sawen, mabalin a husgarantayon ti bagitayo ket mariknatayo a saantayo a maikari iti ayat ti Dios. Ngem ibaga met laeng dayta a bersikulo a “dakdakkel ti Dios ngem ti pusotayo.” Kayatna a sawen, ammona ti amin maipapan kadatayo ken talaga a maawatanna ti marikriknatayo ken dagiti pagkapuyantayo. Ammona met a nayanaktayo nga imperpekto isu a posible nga agkamalitayo.b (Salmo 51:5) Saan ngarud a tallikudan ti Dios dagidiay talaga a pagbabbabawyanda ti kamalida.—Salmo 32:5.
Dimo sangkapanunot dagiti naglabas a kamalim. Adu ti mabasatayo iti Biblia maipapan kadagiti lallaki ken babbai a nagaramid iti dakes a bambanag ngem nagbabawyanda dagita. Ti maysa ket ni Saulo a taga-Tarso, a nagbalin a ni apostol Pablo. Kas maysa a Fariseo, siraranggas nga indadanesna dagiti pasurot ni Jesus. (Aramid 8:3; 9:1, 2, 11) Ngem idi naammuanna a ti Dios ken ti Mesias, wenno Kristo, gayam ti konkontraenna, nagbabawi ken nagbalbaliw ket nagbalin a nasayaat a Kristiano. Siempre, nagbabawyan unay ni Pablo dagiti dati nga inar-aramidna, ngem saannan a pinampanunot dagita. Pinampanunot ni Pablo ti dakkel nga asi ti Dios kenkuana ket nagbalin a nagaget a manangaskasaba ken nagtultuloy a nalawag kenkuana ti namnama a biag nga agnanayon.—Filipos 3:13, 14.
Dagiti bersikulo ti Biblia maipapan iti pannakakonsiensia ken pammakawan
Salmo 51:17: “Ti nasugatan ken nadunor a puso, O Dios, saanmonto a laksiden.”
Kaipapananna: Saannaka a baybay-an ti Dios no talaga a pagbabbabawyam dagiti kamalim uray no nasaktam isuna. Kaasiannaka ketdi.
Proverbio 28:13: “Saanto nga agballigi ti mangabbong kadagiti basolna, ngem maipakitaanto iti asi ti mangipudno ken mangtallikud kadagita.”
Kaipapananna: No ipudnotayo dagiti basbasoltayo iti Dios ken agbalbaliwtayo, pakawanennatayo.
Jeremias 31:34: “Pakawanekto ti kamalida ken diakton lagipen ti basolda.”
Kaipapananna: No pinakawannatayon ti Dios, saannan nga ipalagip kadatayo dagiti kamalitayo. Pudpudno ti asina.
b Adda tendensiatayo nga agkamali gapu iti basol a natawidtayo iti umuna a tao, ni Adan. Nagbasolda ken ni baketna a ni Eva iti Dios ket napukawda ti perpekto a biagda ken dagiti agbalinto nga annakda.—Genesis 3:17-19; Roma 5:12.